ប្រទេសឥណ្ឌា ៖ មនុស្សប្រមាណជា៦០នាក់បានត្រូវស្លាប់កាលពីថ្ងៃទី១៩ តុលា ដោយសាររថភ្លើងមួយបុកមនុស្សម្នាដែលប្រមូលផ្ដុំគ្នាលើផ្លូវដែក សម្រាប់ពិធីបុណ្យមួយ។បណ្ដាសាច់ញាតិជនរងគ្រោះបានរៀបចំធ្វើបាតុកម្មមួយនាថ្ងៃទី២០តុលា ដើម្បីតវ៉ាក្រោយគ្រោះថ្នាក់នោះ។
ប៉ូលិសនាថ្ងៃទី២០ តុលា បើកការស៊ើបអង្កេតរកមូលហេតុនៃសោកនាដកម្មនេះ ក្រោយរថភ្លើងបុកមនុស្សមួយក្រុមដែលប្រមូលផ្ដុំគ្នានៅលើផ្លូវដែក ត្រង់កន្លែងមួយជិតក្រុងអម្រិតសារកាលពីយប់ថ្ងៃទី១៩តុលា។ មនុស្សទាំងនេះជួបជុំគ្នាលើផ្លូវដែកនាឱកាសបុណ្យហ៊ីណ្ឌូមួយនៅក្រុងអម្រិតសារ រដ្ឋPENDJABភាគខាងជើងឥណ្ឌា។
មនុស្សម្នាប្រមូលផ្ដុំគ្នាលើផ្លូវដែកដើម្បីទស្សនាការបាញ់កាំជ្រូច នាយប់ថ្ងៃបុណ្យDUSSEHRA ជាបុណ្យពេញនិយមមួយនៅភាគខាងជើងឥណ្ឌា។ អ្នកទទួលខុសត្រូវម្នាក់របស់ប៉ូលិសមានវត្តមាននៅកន្លែងកើតហេតុនិយាយថា មានសំឡេងលាន់រហ៊ឹងពេលបាញ់កាំជ្រួច អាស្រ័យហេតុនេះបានជាគេសា្ដប់ពុំឮសំឡេងរថភ្លើងដែលមកដល់។
ចំណែកអ្នកបើករថភ្លើងវិញនិយាយប្រាប់ប៉ូលិសថា ពុំបានមើលឃើញមនុស្សម្នា ព្រោះចេញពីផ្លូវកោងពេលងងឹត ហើយរូបគេមើលមិនឃើញទៀតដោយសារផ្សែងកាំជ្រួច។ក្រុមហ៊ុនផ្លូវដែកអះអាងថា គេពុំបានប្រាប់ឲ្យដឹងមុនពីការរៀបចំបុណ្យនៅត្រង់កន្លែងនោះ។
ប៉ូលិសនិយាយថាបានអនុញ្ញាតឲ្យប្រារព្ធពិធីបុណ្យ ដែលតែងប្រព្រឹត្តទៅរៀងរាល់ឆ្នាំនៅកន្លែងនោះ តែបានបញ្ជាក់ថា ពួកអ្នករៀបចំពុំបានរាយការណ៍ប្រាប់សមត្ថកិច្ចឲ្យដឹងមុនទាំងពុំស្នើសុំការអនុញ្ញាតពីសាលាក្រុងទៀតផង។ យោងតាមសារព័ត៌មាននានាថាពួកអ្នកទាំងនេះបានរត់គេចខ្លូនបាត់៕
ចែករំលែកព័តមាននេះ