ខេត្តបាត់ដំបង ៖ យុវជនម្នាក់ដែលអ្នកភូមិផ្ដល់រហ័ស្សនាមថាជា «ចោរសកម្មប្រចាំភូមិ» ត្រូវប្រជាពលរដ្ឋដែលជាម្ចាស់ចម្ការព័ទ្ធចាប់ខ្លួនបានរួមជាមួយនឹងវត្ថុតាង(ផ្លែស្វាយ)ផង ប្រគល់ឲ្យកងរាជអាវុធហត្ថ ខណៈជននេះកំពុងធ្វើសកម្មភាពលួចបេះផ្លែស្វាយអ្នកភូមិ កាលពីវេលាម៉ោង១និង៣០នាទីរសៀល ថ្ងៃទី២០ តុលានេះ…
ខេត្តបាត់ដំបង ៖ យុវជនម្នាក់ដែលអ្នកភូមិផ្ដល់រហ័ស្សនាមថាជា «ចោរសកម្មប្រចាំភូមិ» ត្រូវប្រជាពលរដ្ឋដែលជាម្ចាស់ចម្ការព័ទ្ធចាប់ខ្លួនបានរួមជាមួយនឹងវត្ថុតាង(ផ្លែស្វាយ)ផង ប្រគល់ឲ្យកងរាជអាវុធហត្ថ ខណៈជននេះកំពុងធ្វើសកម្មភាពលួចបេះផ្លែស្វាយអ្នកភូមិ កាលពីវេលាម៉ោង១និង៣០នាទីរសៀល ថ្ងៃទី២០ តុលានេះ នៅចំណុចភូមិកំពង់ឆ្លង ឃុំឈើរទាល ស្រុកបាណន់ ។
មន្ត្រីកងរាជអាវុធហត្ថបានរាយការណ៍ថា ជនសង្ស័យឈ្មោះ វង់ វិសាល ហៅឈុយ អាយុ២៤ឆ្នាំ រស់នៅក្នុងភូមិ ឃុំកើតហេតុខាងលើ ។ ជននេះត្រូវប្រជាពលរដ្ឋតាមចាប់ខ្លួនប្រគល់ឲ្យកម្លាំង កងរាជអាវុធហត្ថ ពេលដែលកំពុងធ្វើសកម្មភាពលួចបេះផ្លែស្វាយក្នុងចម្ការរបស់អ្នកភូមិចំនួន៣កន្លែង ។ មន្ត្រីដដែលបានប្រាប់ថា ម្ចាស់ចម្ការមាន ១- ឈ្មោះផាន់ ពិសិដ្ឋ ភេទប្រុស អាយុ៤២ឆ្នាំ ២-ឈ្មោះណុប ហ៊ីង ភេទប្រុស អាយុ៣៥ឆ្នាំ និង៣- ឈ្មោះទូន វីរៈ ភេទប្រុស អាយុ៣២ឆ្នាំ ។ ជាមួយនឹងការឃាត់ខ្លួនជនសង្ស័យរូបនេះ ម្ចាស់ចម្ការដកហូតបាននូវវត្ថុតាង«ផ្លែស្វាយ»បានមួយចំនួនផង ។
បើតាមម្ចាស់ចម្ការបាននិយាយថា ជនសង្ស័យឈ្មោះវង់ វិសាល ហៅឈុយ នេះ ធ្លាប់ធ្វើសកម្មភាពលួចបេះផ្លែស្វាយតាមចម្ការអ្នកភូមិច្រើនលើកហើយ តែម្ចាស់ចម្ការមិនដែលយកទោសអូសដំណើរទេ គ្រាន់តែធ្វើការណែនាំឲ្យជននេះឈប់លួចតែប៉ុណ្ណោះ តែជននេះមិនស្ដាប់ ឬរាងចាលឡើយ លុះធ្វើសកម្មភាព លើកចុងក្រោយនេះ ក៏ត្រូវម្ចាស់ចម្ការចាប់ប្រគល់ឲ្យសមត្ថកិច្ចតែម្ដងទៅ ។
អ្នកភូមិបានប្រាប់ថា អ្នកភូមិបានដឹង និងស្គាល់ប្រវត្តិយ៉ាងច្បាស់អំពីសកម្មភាពជននេះ ដែលតែងដើរលួចខ្ទេច លួចខ្ទីស្ទើរគ្រប់ទីកន្លែង រហូតអ្នកភូមិខ្លះផ្ដល់រហ័ស្សនាមឲ្យជននេះថា ជា «ចោរសកម្មប្រចាំភូមិ»។
ម្ចាស់ចម្ការបានបញ្ជាក់ថា នៅថ្ងៃកើតហេតុនេះគេបានឃើញជននេះកំពុងលួចបេះស្វាយនៅក្នុងចម្ការចំនួន៣ម្ចាស់ ទើបម្ចាស់ចម្ការតាមក្របួចបានទាំងមនុស្សទាំងផ្លែស្វាយប្រគល់ឲ្យសមត្ថកិច្ចតែម្ដងទៅ ។ ប៉ុន្តែយ៉ាងនេះក្ដីបើតាមចម្លើយបឋមដែលសមត្ថកិច្ចសួរនាំ ជនសង្ស័យឈ្មោះឈុយ បានបដិសេធថា ខ្លួនមិនដែលធ្វើសកម្មភាពលួចជាប្រចាំដូចការចោទប្រកាន់របស់អ្នកភូមិនោះទេ តែបានសារភាពទទួលស្គាល់កំហុសនៅចំពោះមុខម្ចាស់ចម្ការ និងសមត្ថកិច្ចអំពីបទល្មើស«លួចបេះផ្លែស្វាយ» ។
ជុំវិញការឃាត់ខ្លួន«ចោរសកម្មប្រចាំភូមិ» លួចបេះស្វាយខាងលើនេះមានការលេចឮនូវមតិគាំទ្រផង រិះគន់ផង ។ ប្រជាពលរដ្ឋដែលធ្លាប់ស្គាល់ប្រវត្តិលោក«ចោរប្រចាំភូមិ»ខាងលើនេះបាននិយាយថា បើតាមពិនិត្យលើការបទល្មើសដែលជននេះប្រព្រឹត្តហាក់មិនធំដុំទេ បើប្រៀបធៀបនឹងពួកចោរលួច ចោរប្លន់ដទៃទៀត ដែលបានកើតឡើងកន្លងមក ។ ប៉ុន្តែជនឈ្មោះឈុយ នេះបានធ្វើសកម្មភាព«លួច» ជាប្រចាំតែម្ដងមិនថា យប់ឬថ្ងៃទេ ឲ្យតែមានឪកាស ដែលបានបង្កក្ដីបារម្ភ និងអសន្តិសុខខ្លាំងណាស់ ដល់ពលរដ្ឋនៅក្នុងមូលដ្ឋាន ។ ដូច្នេះសមត្ថកិច្ចគួរតែចាប់ជននេះដាក់គុកម្ដងហើយ ដើម្បីឲ្យស្ងប់ស្ងាត់ខ្លះ ។ ជាមួយនឹងការចាប់«ចោរសកម្មប្រចាំភូមិ»លួចផ្លែស្វាយខាងលើនេះ មហាជនក៏បានស្នើឲ្យសមត្ថកិច្ចគ្រប់ស្ថាប័ន គួរបង្កើនការយកចិត្តទុកដាក់ ចំពោះមុខសញ្ញាក្រុមចោរហារយដែលកំពុងធ្វើសកម្មភាពប្រព្រឹត្តអំពើ«ចោរកម្ម»យ៉ាងគគ្រឹកគគ្រេងស្ទើរគ្រប់ទីកន្លែង នាបច្ចុប្បន្ននេះផងដែរ ។
តាមការកត់សម្គាល់បទល្មើសដែលកំពុងបង្កក្ដីបារម្ភខ្លាំងនាសព្វថ្ងៃនេះមានដូចជា «ចោរគាស់ផ្ទះ ចោរកាច់សោលួចម៉ូតូ ចោរឆក់ និងបទល្មើសគ្រឿងញៀន» ដែលបទល្មើសទាំងនេះកំពុងធ្វើឲ្យប៉ះពាល់យ៉ាងធ្ងន់ធ្ងរដល់គោលនយោបាយ«ភូមិឃុំមានសុវត្ថិភាព»ដែលជាគោលនយោបាយដ៏ចម្បងរបស់រាជរដ្ឋាភិបាល ។ ទោះជាយ៉ាងណា ជុំវិញសំណុំរឿងលោក«ចោរសកម្មប្រចាំភូមិ» លួចបេះស្ចាយ ដែលម្ចាស់ចម្ការចាប់ប្រគល់ឲ្យសមត្ថកិច្ចខាងលើនេះ បើតាមមន្ត្រីកងរាជអាវុធហត្ថបានឲ្យដឹងថា ជនសង្ស័យឈ្មោះវង់ វិសាល ហៅឈុយ និងវត្ថុតាងផ្លែស្វាយ ត្រូវបានបញ្ជូនទៅកាន់មូលដ្ឋានកងរាជអាវុធហត្ថស្រុកបាណន់ហើយ ដែលពេលនេះមន្ត្រីជំនាញកំពុងសួរនាំ ដើម្បីចាត់ការតាមនីតិវិធី ។
ប៉ុន្តែយ៉ាងណាសមត្ថកិច្ចគួរតែប្រឹងប្រែងស្វែងរកបំបែកសំណុំរឿងក្រុមចោរទុច្ចរិត ដែលបានប្រព្រឹត្តបទល្មើសធំដុំកន្លងមក ដើម្បីចៀសវាងកុំឲ្យមានការរិះគន់ពីមហាជនថា «ចាប់បានតែលួចបេះស្វាយកំប៉ិកកំប៉ុក រីឯក្រុមចោរលួចចោរប្លន់ ឬក្រុមជួញដូរគ្រឿងញៀនធំដុំបង្ក្រាបមិនបាន ហើយរឹតតែដើរធ្វើសកម្មភាពតាមទំនើងចិត្តគ្រប់ទីកន្លែងផ្គើនសមត្ថកិច្ច» ៕
ចែករំលែកព័តមាននេះ