សង្វេគពេកក្រៃ! សាងផ្នូសរំដោះទុក្ខ… ចុងក្រោយព្រាត់ស្លា.ប់ ព្រាត់រស់
- ភ្នំពេញ
រាជធានីភ្នំពេញ ៖ ដោយសារតែជឿលើហោរាទស្សន៍ទាយ បុរសជាប្តីសុខចិត្តទៅសាងផ្នូស២ឆ្នាំមកហើយ ដើម្បីកុំឲ្យប្តីប្រពន្ធបែកគ្នា ប៉ុន្តែទីបំផុតស្ត្រីជាប្រពន្ធនាំកូនទៅលេងផ្ទះឪពុកម្តាយក្មេក ខណៈភ្លៀងខ្លាំងពេកទឹកលិចផ្លូវជិះម៉ូតូអត់កើតសុខចិត្តចុះដើរសសៀរតាមចិញ្ចើមផ្លូវ តែជាអកុសលឆ្លងចរន្តពីបង្គោលភ្លើងឆក់ដួលផ្កាប់មុខក្នុងទឹកស្លាប់បង្កឲ្យមានការភ្ញាក់ផ្អើលកាលពីម៉ោង៦ព្រលប់ ថ្ងៃទី១៩ ខែតុលា…
ជនរងគ្រោះឆក់ខ្សែភ្លើងខាងលើឈ្មោះ សូ ស៊ីណា ភេទស្រី អាយុ២៩ឆ្នាំ មុខរបរកម្មការិនីរោងចក្រ ស្នាក់នៅក្បែរបឹងតាម៉ាត ភូមិម័ល សង្កាត់ដង្កោ ខណ្ឌដង្កោ មានស្រុកកំណើតនៅភូមិចុងព្រៃ ឃុំជ្រៃធំ ស្រុករមាសហែក ខេត្តស្វាយរៀង ចំណែកប្តីឈ្មោះ ព្រំ តុលា អាយុ២៥ឆ្នាំ ដោយ បានសុំទៅបួសជាព្រះសង្ឃគង់នៅវត្តដក់ពរ ឃុំជ្រៃធំ ស្រុករមាសហែក ខេត្តស្វាយរៀង រយៈពេល២ឆ្នាំហើយ បន្សល់ទុកកូនប្រុសម្នាក់អាយុ២ឆ្នាំ រស់នៅជាមួយម្តាយ ។
តាមការបំភ្លឺពីឈ្មោះ អ៊ុក វ៉ាន់ណេត ភេទប្រុស អាយុ១៨ឆ្នាំ ត្រូវជាប្អូនជីដូនមួយស្នាក់នៅបន្ទប់ជួលក្បែរគ្នាមានស្រុកកំណើតភូមិដក់ពរ ឃុំជ្រៃធំ ស្រុករមាសហែក ខេត្តស្វាយរៀង បានឲ្យដឹងថា មុនកើតហេតុជនរងគ្រោះ និងប្អូនៗជីដូនមួយម្នាក់ ព្រមទាំងកូនប្រុសម្នាក់ទៀត បានជូនជនរងគ្រោះទៅលេងផ្ទះឪពុកម្តាយក្មេករបស់គាត់នៅក្នុងភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ ព្រោះជនរងគ្រោះមិនបានទៅលេងផ្ទះឪពុកក្មេកយូរណាស់មកហើយ ។
ប្រភពដដែលបន្តថា ខណៈពេលនាំគ្នាធ្វើដំណើរមកដល់តាមផ្លូវចំណុចកើតហេតុ ភ្លៀងទឹកជន់លិចផ្លូវទឹកជ្រៅពេកជិះម៉ូតូមិនកើត ក៏នាំគ្នាចុះដើរដោយជនរងគ្រោះដើរតែម្នាក់ឯងដើរសសៀរតាមចិញ្ចើមផ្លូវបណ្តើរនិយាយទូរស័ព្ទបណ្តើរ ចំណែករូបគាត់បណ្តើរម៉ូតូ ហើយប្អូនជីដូនមួយម្នាក់ទៀតបីកូនប្រុសជនរងគ្រោះ ។ ពេលជនរងគ្រោះដើរកាត់ទឹកទាំងនិយាយទូរស័ព្ទផងនោះបានដើរទៅកាន់ប៉ះបង្គោលដែកសំយ៉ាបដំបូលផ្ទះប្រជាពលរដ្ឋនៅតាមចិញ្ចើមផ្លូវជាប់នឹងកាប៊ីនភ្លើង ស្រាប់តែឆ្លងចរន្តឆក់ដួលផ្កាប់មុខក្នុងទឹកស្លាប់ភ្លាមៗនោះគ្មានអ្នកណាហ៊ានចូលជួយទេ ។
ប្រភពដដែលបន្តទៀតថា ដោយសារនៅក្នុងទឹកពេលដែលប្រជាពលរដ្ឋបម្រុងចូលទៅជួយបានឆក់ដែរ ទើបនាំគ្នាយកឈើឆ្កឹះទាញឲ្យឆ្ងាយបន្តិច ទើបលើកចេញឲ្យផុតពីទឹក ជាអកុសលជនរងគ្រោះស្លាប់បាត់ទៅហើយ តែក្រុមគ្រួសារមិនអស់ចិត្តបាននាំគ្នាហៅក្រុមជំនាញសង្គ្រោះទៅពិនិត្យផ្ទាល់ឃើញថា ពិតជាស្លាប់ មានតែរាយការណ៍ទៅសមត្ថកិច្ច ដើម្បីចុះទៅពិនិត្យធ្វើកោសល្យវិច័យ ។
ចែករំលែកព័តមាននេះ