រាជធានីភ្នំពេញ ៖ ស្ត្រីម្នាក់មានស្មារតីមិននឹងន៎បានឡើងទៅលើស្ពានជ្រោយចង្វា ហើយលោតចូលទន្លេសាប ប៉ុនប៉ងសម្លាប់ខ្លួនយ៉ាងអង់អាច បណ្តាលឱ្យមានការភ្ញាក់ផ្អើលយ៉ាងខ្លាំងពីអ្នកដំណើរកាលពីវេលាម៉ោង១និង៣០នាទីរសៀលថ្ងៃទី៣ មីនា ២០១១ គឺលោតចំពាក់កណ្តាលស្ពានជ្រោយចង្វាទៅក្នុងទន្លេតែម្តង ប៉ុន្តែសំណាងនាងណាស់ បានសមត្ថកិច្ចយាមស្ពានគោលដៅទី៣ ចេញអូប័រ ទៅជួយសង្គ្រោះស្រង់ចេញពីទឹកទាន់ពេលវេលាមិនបណ្តាលឱ្យស្លាប់នោះទេ ។
ស្ត្រីម្នាក់នេះឈ្មោះហែម រ៉ាឌី អាយុ២៦ឆ្នាំ មានប្តី និងកូន២នាក់ គឺប្រុស១ ស្រី១ ស្នាក់នៅផ្ទះលេខ៣៩ ផ្លូវលេខ៥០៨ សង្កាត់ផ្សារដើមថ្កូ ខណ្ឌចំការមន ។ ស្ត្រីម្នាក់នេះត្រូវបានគេឱ្យដឹងថា ប្តីរបស់នាងដើរចោលនាងយូរខែហើយ ទុកឱ្យនាងរស់នៅលំបាកលំបិនជាមួយកូន២នាក់ ហើយមិនតែប៉ុណ្ណោះ ត្រូវម្តាយ និងសាច់ញាតិជេរស្តី ធ្វើបាបថែមទៀត ទើបនាងខូចចិត្តគិតច្រើនស្ទើរសរសៃប្រាសាទទៅហើយ ។
នៅចំពោះមុខប៉ូលិសស្ត្រីឈ្មោះហែម រ៉ាឌី និយាយស្តីមានពាក្យពេចន៍មិនសូវត្រូវ ស្មារតីមិននឹងន៎…ឥឡូវកំពុងត្រូវបានប៉ូលិសធ្វើការអប់រំ និងរង់ចាំសាច់ញាតិមកទទួលយកនាងទៅធ្វើការអប់រំបន្ត…៕
ចែករំលែកព័តមាននេះ