ខេត្តកណ្ដាល ៖ មើលសកម្មភាពចោរលួចរថយន្តតាមរយៈកាមេរ៉ាសុវត្ថិភាព តើម្ចាស់ដេកលក់ ឬក្រុមចោរចេះបំបាំងកាយ? ព្រោះកាលពីយប់រំលងអធ្រាត្រឈានចូលថ្ងៃទី២០ ខែតុលា ឆ្នាំ២០១៨ មានករណីចោរលួចរថយន្តម៉ាកបាឡែន១គ្រឿង នៅចំណុចមុខអាហារដ្ឋានយីហោ «ស្រី ពេជ្រ» ស្ថិតនៅជាប់ផ្លូវ១១៥ ភូមិព្រែករាំង សង្កាត់កំពង់សំណាញ់ ក្រុងតាខ្មៅ ។
តាមសមត្ថកិច្ចបានឲ្យដឹងថា ជនរងគ្រោះដែលជាម្ចាស់រថយន្តឈ្មោះ ខុន សេងហ៊ាន ភេទស្រី អាយុ៤០ឆ្នាំ មុខរបរលក់ដូរ មានទីលំនៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល ហើយទ្រព្យសម្បត្តិដែលបាត់បង់មានរថយន្ត១គ្រឿងម៉ាកកាមរីបាឡែនពណ៌ស ស៊េរីឆ្នាំ២០០៣ ពាក់ស្លាកលេខ ភ្នំពេញ ២AR-០២១១ កង់ស្ព័រពណ៌ខ្មៅ ត្រូវចោរលួចយកទៅបាត់ ។
បើតាមជនរងគ្រោះបាន បំភ្លឺប្រាប់សមត្ថកិច្ចឲ្យដឹងថា រថយន្តដែលត្រូវចោរលួចយកទៅនោះ គឺបានទិញជាង៣ខែមកហើយ ។ ពេលទិញបានមកជនរងគ្រោះតែងតែទុកនៅខាងមុខហាងលក់ដូរ (ស្រីពេជ្រ) ដោយចាក់សោរបងសំណាញ់ព័ទ្ធជុំវិញជារៀងរាល់យប់ ។ លុះព្រឹកឡើងស្រាប់តែបាត់រថយន្តនោះ ហើយរបងផ្ទះខាងមុខមានស្នាមកាត់ជុំវិញ។ ពេលឃើញដូច្នោះក៏មានការផ្អើលឆោឡោឡើង និងប្ដឹងសមត្ថកិច្ចនគរបាលប៉ុស្តិ៍រដ្ឋបាលក្រុងតាខ្មៅ ឲ្យបានដឹង ។
ក្រោយពីកើតហេតុ សមត្ថកិច្ចជំនាញក្រុងតាខ្មៅ បានចុះទៅធ្វើការពិនិត្យ និងឆែកមើលកាមេរ៉ាសុវត្ថិភាពឃើញថា មានជនសង្ស័យ២នាក់បានធ្វើសកម្មភាពកាត់សោរទ្វារបងចូលលួចយករថយន្តនោះមែន និងលួចយកទៅបាត់មិនរំខានដល់សមត្ថកិច្ចទៀតផង ។
ពាក់ព័ន្ធករណីខាងលើនេះ សមត្ថកិច្ចបាននិងកំពុងស្វែងរកមុខសញ្ញាក្រុមចោរកាត់របងលួចរថយន្តនោះ តាមរយៈឆែកមើលកាមេរ៉ាសុវត្ថិភាព ៕
គួររំលឹកថា ៖ ហ៊ានម្ល៉េះ…! ចោរថ្លើមធំកាត់សោរបងចូលលួចរថយន្តបានសម្រេច
ចែករំលែកព័តមាននេះ