ប្រុស២នាក់អូសដៃនារីវ័យក្មេងឡើងឡាន… ភ័យពេករត់ហៅបងប្អូនជួយ
- ភ្នំពេញ
រាជធានីភ្នំពេញ ៖ នារីវ័យក្មេងម្នាក់ខឹងឪពុកម្តាយស្តីបន្ទោសស្រាប់តែទៅឈរនៅកណ្តាលផ្លូវទាំងយប់ធ្វើឲ្យបុរស២នាក់បើករថយន្តមកដល់ឃើញស្មានតែនារីរកស៊ីផ្លូវភេទក៏បើកទ្វារអូសដៃឡើងរថយន្តធ្វើឲ្យនាងភ័យរត់ទៅហៅបងប្អូនជួយ ។ ហើយបុរសនោះខឹងដេញបុកក៏ជ្រុលទៅបុកបង្គោលភ្លើង ទើបប្រជាពលរដ្ឋផ្ទុះកំហឹងយកដុំថ្មគប់ធ្វើឲ្យរបួសធ្ងន់ម្នាក់ និងស្រាលម្នាក់ ហេតុការណ៍នេះភ្ញាក់ផ្អើលនៅម៉ោង៩និង៤០នាទីយប់ ថ្ងៃទី១៩ ខែតុលា…
បើតាមសម្តីនារីអាយុ១៦ឆ្នាំ ជាសិស្សថ្នាក់ទី៩ ស្នាក់នៅម្តុំកន្លែងកើតហេតុឱ្យដឹងថា មុនកើតហេតុ រូបនាងត្រូវឪពុកម្តាយស្តីបន្ទោសរឿងលេងទូរស័ព្ទ ព្រោះដល់ថ្ងៃជិតប្រឡងហើយ ដោយសារតែខឹងនឹងឪពុកម្តាយស្តីបន្ទោសរូបនាងក៏ដើរមកឈរលេងនៅលើផ្លូវ៦០ម៉ែត្រ ខណៈនោះស្រាប់តែមានបុរស២នាក់មិនដឹងថាចេញពីផឹកស៊ីកន្លែងណានោះទេ ក្នុងស្ថានភាពស្រវឹងស្រាបានបើករថយន្តម៉ាកកាមរីបាឡែន ពណ៌ទឹកប្រាក់ ពាក់ស្លាកលេខ កណ្ដាល 2B 6323 មកបបួលនាងទៅរួមរក្ស និងទាញដៃនាងឡើងលើរថយន្ត។
នាងបន្តទៀតថា តែរូបនាងមិនព្រមឡើង ហើយភ័យពេករត់ទៅប្រាប់បងប្អូនឪពុកម្តាយនៅក្បែរនោះឱ្យមកជួយ លុះមកដល់ក៏ទាស់សម្តីគ្នាបន្តិចបន្តួចស្រាប់តែបុរស២នាក់នោះខឹងសម្បារយ៉ាងខ្លាំងបញ្ឆេះរថយន្តបើកដេញតាមបុកពួកគាត់ធ្វើឲ្យភ័យស្លន់ស្លោររត់ពេញផ្លូវ តែដោយរថយន្តនោះលឿនពេកក៏ជ្រុលចង្កូតទៅបុកបង្គោលភ្លើងបំភ្លឺផ្លូវបាក់រាបដល់ដីអស់១ដើម និងធ្វើឱ្យរថយន្តខ្ទេចផ្នែកខាងមុខ និងបាក់រ៉ូទីលខាងស្តាំទៅមុខលែងរួច ។
ប្រភពដដែលបន្តថា បន្ទាប់ពីបុកហើយ ប្រជាពលរដ្ឋឃើញទង្វើបុរសទាំងពីរនាក់បែបនេះ ក៏នាំគ្នាយកដុំថ្មគប់កញ្ចក់រថយន្ត និងបុរសទាំង២នោះ បណ្តាលឱ្យបុរសជាអ្នកបើករបួសស្រាល ហើយត្រូវសមត្ថកិច្ចឃាត់ខ្លួនយកទៅសាកសួរនៅប៉ុស្តិ៍នគរបាលចាក់អង្រែលើ ចំណែកម្នាក់ទៀតជាអ្នករួមដំណើររបួសសន្លប់ស្តូកស្តឹងត្រូវរថយន្តសង្គ្រោះដឹកទៅសង្គ្រោះនៅគ្លិនិក ។
ក្នុងហេតុការណ៍នេះដែរ កម្លាំងសមត្ថកិច្ចមូលដ្ឋាន និងជំនាញចុះទៅកន្លែងកើតហេតុ រួចក៏ទំនាក់ទំនងទៅខាងជំនាញចរាចរណ៍ក្រុងចុះទៅស្ទូចយករថយន្តបង្កទៅរក្សាទុកនៅការរិយាល័យចរាចរណ៍ជើងគោករាជធានីភ្នំពេញ ដើម្បីរង់ចាំធ្វើការដោះស្រាយ ចំណែកភាគីខាងនារីដែលត្រូវបុរសរូបនោះបបួលទៅរួមរក្សនោះក៏មិនបានប្តឹងប្តល់ដែរ៕
ចែករំលែកព័តមាននេះ