ខេត្តកំពត ៖ រថយន្តដឹកទូកុងតឺន័រមួយគ្រឿងបានក្រឡាប់ហើយក្បាលរថយន្តបានទៅបុកដើមដូង ។ ហេតុការណ៍នេះបានកើតឡើងកាលពីវេលាម៉ោង៥និង៣០នាទីទៀបភ្លឺថ្ងៃទី២០ តុលា នៅលើកំណាត់ផ្លូវជាតិលេខ៣៣ ត្រង់ចំណុចភូមិកណ្ដាលទួល ឃុំកំពង់ត្រាចខាងលិច ស្រុកកំពង់ត្រាច ខេត្តកំពត។
លោកសេង រតនា អធិការរងទទួលផែនសណ្ដាប់ធ្នាប់ចរាចរស្រុកកំពង់ត្រាចបានឱ្យដឹងថា រថយន្តដឹកកុងតឺន័រមួយគ្រឿង ពាក់ស្លាកលេខ ព្រះសីហនុ ៣A-៣៧៦០ នេះបានបើកបរក្នុងទិសដៅពីលិចទៅកើត លុះមកដល់ភូមិកណ្ដាលទួលស្រាប់តែក្រឡាប់ទៅបុកដើមដូង និងដើមឈើ ។
លោកអធិការរងស្រុកបានឱ្យដឹងថា ក្នុងហេតុការណ៍គ្រោះថ្នាក់ចរាចរណ៍នេះមិនមានអ្នកណាម្នាក់ដឹងពីមូលហេតុនោះទេ ហើយក៍មិនមានមនុស្សណាម្នាក់រងគ្រោះថ្នាក់នោះដែរ មានតែអ្នកបើកបររថយន្តកុងតឺន័រទេរងរបួសតិចតួច បានរត់គេចខ្លួនបាត់ទៅហើយ។
លោកអធិការរងនគរបាលស្រុកបានដឹងបន្តថា តាមការសន្និដ្ឋានរបស់សមត្ថកិច្ច មូលហេតុបណ្តាលឱ្យរថយន្តកុងតឺន័រក្រឡាប់នេះ គឺសង្ស័យថាអ្នកបើកងងុយដេកមួយភាំង លុះពេលដឹងខ្លួនកាច់ចង្កូតរេទៅបុកដើមដូងនៅខាងឆ្វេងដៃទៅវិញ ។
ពលរដ្ឋនៅភូមិកណ្ដាលដែលឃើញហេតុការណ៍គួរឱ្យរន្ធត់នេះបាននិយាយថា រថយន្តកុងតឺន័ររងការខូច
ខាតស្ទើតែទាំងស្រុងទៅហើយ តែបើបុកចំផ្ទះប្រជាពលរដ្ឋវិញ មិនដឹងកើតមានសោកនាដកម្មបែបណានោះទេ។
ទោះជាមានការភ័យបែបនេះក្តី ក៏អ្នកភូមិនៅតែប្រថុយគ្រោះថ្នាក់នាំគ្នាមកដងប្រេងដែលហូរចេញពីរថយន្តកុងតឺន័រដែលបានក្រឡាប់ខាងលើនោះ ៕
ចែករំលែកព័តមាននេះ