ខេត្តកំពង់ស្ពឺ ៖ មនុស្សប្រុស១ក្រុមស្កាត់មកពីផ្សេងគ្នាបានប្រមូលផ្តុំគ្នាលេងល្បែងស៊ីសង ដោយលួចលាក់ ក្នុងព្រៃក្បែរភូមិ១កន្លែង ហើយត្រូវបានសមត្ថកិច្ចចុះឡោមព័ទ្ធបំបែកសម្បុកឃាត់ខ្លួនបុរសញៀនល្បែងបានចំនួន៤នាក់ ក្រៅពីនោះរត់បាតជើងសព្រាត និងដកហូតម៉ូតូចម្រុះ១៦គ្រឿងរួមទាំងវត្ថុតាងមួយចំនួនទៀត ។
ករណីសមត្ថកិច្ចបំបែកសម្បុកល្បែងស៊ីសងខុសច្បាប់នេះបានធ្វើឡើង កាលពីល្ងាចថ្ងៃទី១៩ ខែតុលា ឆ្នាំ២០១៨ ស្ថិតនៅចំណុចព្រៃខាងត្បូងភូមិរមាំងស្លាប់ ឃុំមានជ័យ ស្រុកឧដុង្គ ។
ប្រភពព័ត៌មានពីសមត្ថកិច្ចអធិការដ្ឋានបានឲ្យដឹងថា មុនឈានដល់បង្ក្រាបទីតាំងបើកវង់ល្បែងស៊ីសងខាងលើនេះមានស្ត្រីក្នុងភូមិបានប្តឹងសមត្ថកិច្ចថា គាត់កើតទុក្ខស្អិតទ្រូង ដោយសារប្តីរបស់គាត់មិនជួយធ្វើការរកស៊ី ស្វែងរកប្រាក់មកជួយផ្គត់ផ្គង់គ្រួសារ គិតតែនៅពពាក់ពពូនគ្នាលេងល្បែងស៊ីសង បំផ្លាញលុយកាក់របស់របរទ្រព្យសម្បត្តិក្នុងផ្ទះ ។
លោកវរសេនីយ៍ឯក ខឹម សាម៉ុន អធិការនគរបាលស្រុកឧដុង្គបន្តថា ក្រោយទទួលពាក្យបណ្ដឹងពីស្ត្រីខាងលើរួច សមត្ថកិច្ចក៏បានសាកសួរ និងស្រាវជ្រាវកំណត់ទីតាំងបើកល្បែងច្បាស់លាស់ ហើយក៏បានស្នើរគោលការណ៍ពីលោកស្នងការ ដើម្បីចុះបង្ក្រាប ។
សមត្ថកិច្ចបន្តថា ពេលកម្លាំងនគរបាលចុះឡោមព័ទ្ធទីតាំងខាងលើនោះក្រុមអ្នកញៀនល្បែងខ្លះ កំពុងតែអ៊ុតអាប៉ាង ហើយពួកគេនាំគ្នាស្រែកហ៊ោរកងរំពងព្រៃ តែពេលពួកគេក្រឡេកឃើញសមត្ថកិច្ច ខ្លះដាក់មេផាយចោលម៉ូតូ ចោលស្បែកជើងទើបសមត្ថកិច្ចឃាត់ខ្លួនបានតែមមុស្ស៤នាក់ និងម៉ូតូ១៦គ្រឿង ។
ចំណែកជនសង្ស័យទី១-ឈ្មោះចាន់ សុន ភេទប្រុស អាយុ៤១ឆ្នាំ រស់នៅភូមិអន្លង់ភេ ឃុំត្រពាំងល្វា ស្រុកឧដុង្គ ទី២-ឈ្មោះសូត្រ ផា ភេទប្រុស អាយុ៤៣ឆ្នាំ រស់នៅភូមិទំពូង ឃុំមានជ័យ ស្រុកឧដុង្គ ទី៣-ឈ្មោះឆេង អាន ភេទប្រុស អាយុ៥៨ឆ្នាំ រស់នៅភូមិទួលកេះ ឃុំក្រាំងចេក ស្រុកឧដុង្គ និងទី៤-ឈ្មោះរិទ្ឋ បារាំង ភេទប្រុស អាយុ៣០ឆ្នាំ ជាម្ចាស់ទីរង រស់នៅភូមិកើតហេតុខាងលើ ។ រីឯវត្ថុតាងរួមមាន ម៉ូតូចម្រុះម៉ាកចំនួន១៦គ្រឿង ,មេអាប៉ោងចំនួន៣គ្រាប់ និងសម្ភារៈផ្សេងៗមួយចំនួនទៀត ។
ក្រោយពេលសមត្ថកិច្ចបង្ក្រាបជនសង្ស័យ រួមទាំងវត្ថុតាងត្រូវមកអធិការដ្ឋាននគរបាលកសាងសំណុំរឿង បញ្ជូនបន្តមកស្នងការដ្ឋាននគរបាលខេត្តចាត់ការតាមនីតិវិធី ដើម្បីឲ្យពួកគេរាងចាល ។ ចំណែកអ្នករត់គេចខ្លួនរួចក៏ត្រូវសមត្ថកិច្ចស្រាវជ្រាវរកចាប់ខ្លួនមកចាត់ការតាមច្បាប់ជាបន្តមិនឲ្យរួចពីសំណាញ់ច្បាប់ទេ ៕
ចែករំលែកព័តមាននេះ