ខេត្តកំពត ៖ រថយន្តដឹកប្រេង១គ្រឿង បានឆាបឆេះសន្ធោសន្ធៅនៅសល់តែគ្រោងឆ្អឹង នៅវេលាម៉ោង១៨និង៣០នាទីថ្ងៃទី១៨ តុលា នៅលើផ្លូវក្រាលក្រួសក្រហមមួយខ្សែក្នុងភូមិសុភី ឃុំស្រែជាខាងជើង ស្រុកដងទង់ ។
បើតាមការរៀបរាប់ឱ្យដឹងពីប្រជាពលរដ្ឋនៅជិតកន្លែងកើតហេតុនិយាយថា រថយន្តកូរ៉េ ពណ៌.ស ចំណុះ១តោនកន្លះដឹកប៊ីដុងប្រេង មកពីទិសខាងលិចទៅកើត ប៉ុន្តែមកដល់ត្រង់ចំណុចខាងលើ ស្រាប់តែឃើញឆេះសន្ធោសន្ធៅតែម្តង ។ ប្រភពឲ្យដឹងថា រថយន្តនេះដឹកប្រេង២០ប៊ីដុង ។
ពលរដ្ឋរូបនោះនិយាយថា ជនរងគ្រោះជាអ្នកបើកបរឈ្មោះ ឃុន វាសនា ភេទប្រុស អាយុ១៧ឆ្នាំ ជាអ្នកសុីឈ្នួលបើករថយន្តដឹកប្រេង ឱ្យឈ្មោះ ជិន ធីឡាង ដែលមានស្ថានីយលក់ប្រេងនៅទីរួមស្រុកដងទង់ ។ អ្នកបើកបររថយន្តវ័យក្មេងពេលឃើញរថយន្តខ្លួនឆេះ បានប៉ុនប៉ងរត់ចូលរថយន្តដែលកំពុងឆេះសម្លាប់ខ្លួន ដោយសារតែខ្លាចថៅកែឱ្យសង ។
ទោះជាការប៉ុនប៉ងសម្លាប់ខ្លួនបែបណានោះ គឺមិនបានសំរេចទេ ព្រោះត្រូវពលរដ្ឋជួយចាប់និងអង្វរឲ្យគេស្ងប់ចិត្តគឺបានត្រឹមតែរងរបួសរលាកដៃជើង ។ នគរបាលបាននិយាយថា រថយន្តដឹកប្រេងដែលឆេះមួយគ្រឿងនេះ គឺបណ្តាលមកពីឆ្លងចរន្តខ្សែអាគុយរថយន្ត ទើបបណ្ដាលឲ្យឆេះ ។
ការដឹកប្រេងឥន្ធនៈជាគ្រឿងចំហេះតាមរថយន្តបែបនេះគឺប្រឈមនឹងហានិភ័យណាស់ ដែលតាមលក្ខណៈបច្ចេកទេសត្រូវតែមានរថយន្តស៊ីទែនត្រឹមត្រូវ ទើបអាចគេចផុតពីគ្រោះថ្នាក់ជាយថាហេតុបែបនេះ ៕
ចែករំលែកព័តមាននេះ