ប្រទេសរុស្ស៊ី-ស៊ីរី ៖ ប្រធានាធិបតីរុស្ស៊ីលោកវ្ល៉ាឌីមៀរពូទីនថ្លែងកាលពីថ្ងៃទី១៨តុលាថា ក្រុមរដ្ឋអ៊ិស្លាមបានឃុំទុកមនុស្សជិត៧០០នាក់ជាចំណាប់ខ្មាំង ក្នុងតំបន់ភាគខាងកើតស៊ីរី ត្រួតត្រាដោយកងកម្លាំងជួយទ្រទ្រង់ដោយសហរដ្ឋអាមេរិកនិងពួកសម្ព័ន្ធមិត្ត។
នៅក្រុងសូតជីជាប់មាត់សមុទ្រខ្មៅលោកពូទីនបញ្ជាក់ថា ក្រុមរដ្ឋអ៊ិស្លាមបានសម្លាប់មនុស្សមួយចំនួនដែលគេចាប់ ហើយដាក់ឱសានវាទមួយដោយគំរាមសម្លាប់ចំណាប់ខ្មាំង១០នាក់ក្នុងមួយថ្ងៃ។ លោកបន្តថា ក្នុងចំណោមចំណាប់ខ្មាំងទាំងនេះមានជនជាតិអាមេរិក និងអឺរ៉ុបជាច្រើននាក់ តែលោកពុំបញ្ជាក់ពីការទាមទារអ្វីខ្លះរបស់ក្រុមជ្រុលនិយមនោះឡើយ។
លោកនិយាយថា ពួកជីហាដបានដាក់ឱសានវាទនិងការទាមទារពិសេសនានា ហើយព្រមានថា បើឱសានវាទទាំងនេះពុំត្រូវបានគោរពទេ នោះពួកគេនឹងសម្លាប់មនុស្ស១០នាក់ក្នុង១ថ្ងៃ។មុននេះពួកនោះបានសម្លាប់មនុស្ស១០នាក់រួចហើយ។
ទីភ្នាក់ងារព័ត៌មានរុស្ស៊ី TASS ធ្លាប់រាយការណ៍កាលពីថ្ងៃទី១៧តុលាថា ពួកយុទ្ធជនក្រុមរដ្ឋអ៊ិស្លាម បានរក្សាទុកចំណាប់ខ្មាំងប្រមាណជា៧០០នាក់ ក្រោយការវាយប្រហារមួយកាលពីថ្ងៃទី១៣ តុលា កន្លងមកនេះ ប្រឆាំងជំរំជនភៀសខ្លួនមួយកន្លែង ក្នុងតំបន់មួយនៃខេត្ត DAIR AZ ZOUR ត្រួតត្រាដោយកងកម្លាំងដែលអាមេរិកជួយទ្រទ្រង់។
TASS បន្តថា មនុស្សប្រមាណជា១៣០គ្រួសារត្រូវបានចាប់នាំទៅកាន់តំបន់ហាជីន ជាមូលដ្ឋានតូចមួយជាប់ទន្លេEUPHRATEមិនឆ្ងាយប៉ុន្មានពីព្រំដែនអ៊ីរ៉ាក់៕
ចែករំលែកព័តមាននេះ