ខេត្តបាត់ដំបង ៖ សេចក្ដីរាយការណ៍បឋមឱ្យដឹងថា កម្លាំងនគរបាលនាយកដ្ឋានបច្ចេកទេសសន្តិសុខផ្ទៃ
ក្នុង ដែលមានកិច្ចសហការជាមួយកម្លាំងនគរបាលនៃស្នងការដ្ឋានខេត្តផង បានចាប់ខ្លួនបុរសម្នាក់តាម
ដីកាតុលាការរាជធានីភ្នំពេញ កាលពីវេលាម៉ោង០១ និង៤០នាទីរសៀលថ្ងៃ១៩ តុលា នេះ ស្ថិតនៅចំណុចក្រុម៨ ភូមិឫស្សី១ ឃំុមោង ស្រុកមោងឫស្សី ដែលជាប់ពាក់ព័ន្ធក្រុមជនប្រដាប់អាវុធប៉ុនប៉ងផ្ដូលរំលំរដ្ឋាភិបាល ។
សេចក្តីរាយការណ៍បន្តថា ជនត្រូវចោទឈ្មោះ ប៉េង សុខា ហៅម៉ៅ ភេទប្រុស អាយុ៥៣ឆ្នាំ មានទីលំនៅក្រុមទី៦ ឃំុត្រែងត្រយឹង ស្រុកភ្នំស្រួច ខេត្តកំពង់ស្ពឺ ។ ជននេះ ត្រូវបានចាប់ខ្លួនតាមដីកាបង្គាប់ឱ្យចាប់ខ្លួនលេខ៦៧៥ “ខ” ដ.ច.ន. ចុះថ្ងៃទី០២ ខែតុលាឆ្នាំ២០១៨ ចេញដោយលោកអុឹម វណ្ណ: ចៅក្រមសើុបសួរ
សាលាដំបូងរាជធានីភ្នំពេញ ដែលជាប់ចោទពីបទ «រៀបចំចាត់តាំងក្រុមជនប្រដាប់អាវុធ និងសន្និធិអាវុធ គ្រឿងផ្ទុះ ដោយគ្មានការអនុញ្ញាតពីអាជ្ញាធរមានសមត្ថកិច្ច» ដែលបានប្រព្រឹត្តនៅរាជធានីភ្នំពេញ, ខេត្តកំពត, ខេត្តពោធិ៍សាត់ និងខេត្តកំពង់ស្ពឺ កាលពីថ្ងៃទី២២ កញ្ញា ២០១៨ ។
ប្រភពបន្តថា ក្រោយពីផ្ទុះរឿងនេះ សមត្ថកិច្ចបានចាប់ខ្លួនបានជាបន្តបន្ទាប់ តែជននេះបានរត់គេចមកសម្ងំលាក់ខ្លួននៅស្រុកមោងប្ញស្សី រហូតកម្លាំងជំនាញស្រាវជ្រាវរកឃើញ ទើបត្រូវចាប់ខ្លួនតាមដីការបស់សាលាដំបូងរាជធានីភ្នំពេញតែម្ដង ។ ពេលនេះ សមត្ថកិច្ចបានបញ្ជូនជនត្រូវចោទរូបនេះ ទៅនាយកដ្ឋានបច្ចេកទេស សន្តិសុខផ្ទៃក្នុងក្រសួងមហាផ្ទៃ ដើម្បីចាត់ការតាមនីតិវិធីហើយ ៕
ចែករំលែកព័តមាននេះ