ខេត្តកណ្ដាល ៖ យុវជនម្នាក់បានស្លាប់ដោយសារលង់ទឹក បង្កការភ្ញាក់ផ្អើលកាលពីវេលាម៉ោង ៨និង២០នាទីថ្ងៃទី១៩ តុលា ឆ្នាំ២០១៨ នៅចំណុចក្នុងទន្លេបាសាក់ ភូមិឬស្សីស្រុក ឃុំ ខ្ពប ស្រុក ស្អាង ខេត្ត កណ្តាល។
ជនរងគ្រោះដែលស្លាប់ឈ្មោះ ទូច ណាវីន ភេទប្រុស អាយុ១៨ឆ្នាំ ជាសិស្ស មានទីលំនៅក្នុងភូមិឫស្សីស្រុក ឃុំខ្ពប ស្រុកស្អាង ខេត្តកណ្តាល ។
តាមប្រភពព័ត៌មានបានឱ្យដឹងថា មុនពេលកើតហេតុ ជនរងគ្រោះបានចេញទូកទៅរាយមងជាមួយប្អូនប្រុសឈ្មោះ ទូច ដាវីត ភេទប្រុស អាយុ១៦ឆ្នាំ ជាសិស្ស លុះមកដល់ចំណុចភូមិឫស្សីស្រុក ក៏ចេញទូកពីច្រាំងចំងាយប្រហែល៣០ម៉ែត្រ ស្រាប់តែអាវរបស់ជនរងគ្រោះរុំជាមួយម៉ាស៊ីន ក៏ធ្លាក់ចុះទឹកទាំងមនុស្សនិងម៉ាស៊ីនទៅជាមួយគ្នាតែម្តង។
ឃើញសភាពបែបនោះ ប្អូនប្រុសរបស់ជនរងគ្រោះបានហែលទឹកទៅច្រាំងដើម្បីឲ្យអ្នកជិតខាងជួយបងប្រុសរបស់ខ្លួន ពេលនោះក្រុមគ្រួសារ ក៏បានជួលខ្មែរអ៊ិស្លាមឱ្យចុះរាវរកអស់រយៈពេលប្រហែល៣ម៉ោងទើបរកឃើញសពជនរងគ្រោះ។
ក្រោយមក សមត្ថកិច្ចជំនាញពិនិត្យហេតុ ស្រុក ប៉ុស្តិ៍ ក្រុមប្រឹក្សាឃុំ មេភូមិ ពិនិត្យសពពុំឃើមានស្លាកស្នាមអ្វីគួរឲ្យកត់សំគាល់ឡើយ ។ តាមការសន្និដ្ឋាន ជនរងគ្រោះពិតជាបានស្លាប់ដោយសារលង់ទឹកប្រាកដមែន។
បន្ទាប់ពីពិនិត្យរួច សពត្រូវបានប្រគល់ឲ្យក្រុមគ្រួសារដើម្បីយកទៅធ្វើបុណ្យតាមប្រពៃណី ៕
ចែករំលែកព័តមាននេះ