ប្រទេសអាហ្វហ្គានីស្ថាន ៖ ឧត្ដមសេនីយ៍អាប់ឌុលរ៉ាហ្ស៊ិក ដែលធ្លាប់តែគេចផុតពីការប៉ងតាមធ្វើឃាតលោកច្រើនលើក បានស្លាប់ហើយកាលពីថ្ងៃទី១៨ តុលា ក្នុងការវាយប្រហារមួយរបស់ពួកតាលីបង់ ដែលអាចឲ្យមនុស្សរបស់ពួកគេ ចូលក្នុងកិច្ចប្រជុំមួយរបស់បណ្ដាអ្នកទទួលខុសត្រូវជាន់ខ្ពស់។ បែបនេះជាការសម្រេចបំណងតាមកម្ទេចជើងខ្លាំងបំផុតម្នាក់ក្នុងការប្រឆាំងពួកគេ។
ប្រមុខប៉ូលិសខេត្តកាន់ដាហាររូបនេះជាមនុស្សមិនចេះអក្សរ បានឡើងឋានៈយ៉ាងលឿនរហូតក្លាយជាអ្នកទទួលខុសត្រូវ ខាងសន្តិសុខ ដែលខ្លាំងបំផុតមួយរូបរបស់អាហ្វហ្គានីស្ថាន។ ចាត់ទុកជាបង្អែកខ្លាំងមួយប្រឆាំងការបះបោររបស់ពួកតាលីបង់ ការស្លាប់របស់ឧត្ដមសេនីយ៍រូបនោះ នាំឲ្យមានភាពច្រឡោះប្រហោងខាងសន្តិសុខប្រកបដោយគ្រោះថ្នាក់ នៅភាគខាងត្បូងអាហ្វហ្គានីស្ថានជាតំបន់បង្អែកសំខាន់របស់ពួកតាលីបង់។
ផ្នែកនោះនៃប្រទេសពេលនេះអាចប្រឈមមុខរបូតធ្លាក់ក្នុងកណ្ដាប់ដៃពួកតាលីបង់។ គឺឧត្ដមសេនីយ៍ជើងខ្លាំងរូបនេះហើយដែលជាអ្នកធានាសន្តិសុខខេត្តកាន់ដាហារ។
លោកអាប់ឌុលរ៉ាហ្ស៊ិកអាយុ៣៩ឆ្នាំ ដែលត្រួតត្រាតំបន់នោះក្នុងកណ្ដាប់ដៃដែក ត្រូវបានគេនិយាយថា ជាអ្នកសម្លាប់មនុស្សប្រមាណជា៣០០០នាក់ ជាសមាជិកគ្រួសារណា ដែលគេសង្ស័យថា គាំទ្រដល់ពួកតាលីបង់។ ប៉ុន្តែទោះមានការចោទប្រកាន់ពីការធ្វើទារុណកម្ម និងការសម្លាប់មនុស្សច្រើន ដែលលោកបានបដិសេធក្ដី ក៏ប្រមុខប៉ូលិសរូបនោះ ជាមិត្តសម្លាញ់ធំរបស់ឧត្ដមសេនីយ៍ SCOTT MILLER មេបញ្ជាការកងកម្លាំងអូតង់ និងកងទ័ពអាមេរិកនៅអាហ្វហ្គានីស្ថាន។
ឧត្ដមសេនីយ៍ SCOTT MILLER បានសរសេរតាម TWITTER ថា អាហ្វហ្គានីស្ថានបានបាត់បង់អ្នកស្នេហាជាតិម្នាក់ ហើយខ្ញុំសូមចូលរួមរំលែកទុក្ខជាមួយប្រជាជនអាហ្វហ្គានីស្ថាន។ អំពើល្អដែលលោកបានធ្វើសម្រាប់ប្រទេសនឹងពុំអាចបំភ្លេចបានដាច់ខាត។
ឧត្ដមសេនីយ៍ MILLER ស្ថិតនៅជាមួយឧត្ដមសេនីយ៍រ៉ាហ្ស៊ិក កាលពីថ្ងៃទី១៨ តុលា ក្នុងក្រុងកាន់ដាហារ ដែលមានកិច្ចការពារខ្ពស់ សម្រាប់កិច្ចប្រជុំមួយ ផ្ដោតលើសន្តិសុខមុនការបោះឆ្នោតសភានាថ្ងៃទី២០ តុលា នៅអាហ្វហ្គានីស្ថាន។ ឧត្ដមសេនីយ៍រូបនោះសំណាងល្អគេចផុតពីគ្រោះថ្នាក់។ ហើយអ្នកកាសែតម្នាក់ក៏ត្រូវស្លាប់ដែរហើយមនុស្ស១៣នាក់រងរបួស ក្នុងនោះមានអភិបាលខេត្តនិងប្រមុខប៉ូលិសភាគខាងត្បូងប្រទេស។
យោងតាមសេចក្ដីប្រកាសមួយរបស់ពួកតាលីបង់ថា អង្គរក្សម្នាក់របស់អភិបាលខេត្តបានបាញ់ប្រហារសម្លាប់ភ្លាមឧត្ដមសេនីយ៍រ៉ាហ្ស៊ិក ព្រមទាំងប្រមុខភ្នាក់ងារស៊ើបការណ៍ខេត្ត។
លោកអាប់ឌុលរ៉ាហ្ស៊ីកមានប្រពន្ធ៣ជាអ្នកប្រយុទ្ធប្រឆាំងពួកតាលីបង់តាំងពីពួកនេះ សម្លាប់ឪពុកគេនិងពូរបស់គេ កាលពីឆ្នាំ១៩៩៤ គឺ២ឆ្នាំមុនពេលពួកនេះកាន់អំណាចទូទាំងប្រទេស៕
ចែករំលែកព័តមាននេះ