រាជធានីភ្នំពេញ៖ តារាថ្មីដែលកំពុងចាប់ឈោងភាពល្បីឈ្មោះនៅក្នុងពិភពសិល្បៈភាពយន្ត កញ្ញាប៉ុប រចនា បានបដិសេធទៅនឹងព័ត៌មានមួយចំនួនថានាងមានចរិតតួឯក បន្ទាប់ពីបានគ្រងតំណែងតួថ្មីនៅទូរទស្សន៍ប៉ុស្តិ៍លេខ៥ ។ ការបដិសេធពីតារាសម្តែងប៉ុប រចនា បន្ទាប់ពីនាងត្រូវបានជ្រើសរើសឲ្យកាន់តំណែងតួឯកនៅរឿងភាគថ្មីមួយ…
រាជធានីភ្នំពេញ៖ តារាថ្មីដែលកំពុងចាប់ឈោងភាពល្បីឈ្មោះនៅក្នុងពិភពសិល្បៈភាពយន្ត កញ្ញាប៉ុប រចនា បានបដិសេធទៅនឹងព័ត៌មានមួយចំនួនថានាងមានចរិតតួឯក បន្ទាប់ពីបានគ្រងតំណែងតួថ្មីនៅទូរទស្សន៍ប៉ុស្តិ៍លេខ៥ ។
ការបដិសេធពីតារាសម្តែងប៉ុប រចនា បន្ទាប់ពីនាងត្រូវបានជ្រើសរើសឲ្យកាន់តំណែងតួឯកនៅរឿងភាគថ្មីមួយ ឯយ៉ែម ស្រីពេជ្រ ធ្លាប់ជាតួឯកមកជាតួអង្គរងវិញ ។ ទាំងប៉ុប រចនា និងយ៉ែម ស្រីពេជ្រ បានក្លាយជាតួអង្គដ៏គួរឲ្យចាប់អារម្មណ៍មួយសម្រាប់ផលិតករប៉ុស្តិ៍លេខ៥ ក្នុងនោះស្រីពេជ្រ ត្រូវបានគេមើលឃើញថា បានគ្រងតំណែងតួឯកច្រើនជាងប៉ុប រចនា ប៉ុន្តែនៅក្នុងខ្សែរឿងថ្មី ប៉ុស្តិ៍លេខ៥បានជ្រើសរើសប៉ុប រចនា ក្លាយជាតួឯក ហើយរុញឲ្យយ៉ែម ស្រីពេជ្រ ទៅជាតួរងវិញ ។
ក្នុងស្ថានភាពបែបនេះគេគិតថាប៉ុប រចនា ទំនងអាចមានចរិតតួឯកខ្លាំង ក្នុងពេលដែលនាងកំពុងតែមានឈ្មោះបោះសំឡេង ។ យ៉ាងណាក៏ដោយប៉ុប រចនា បានបដិសេធការលើកឡើងនេះ និងបានចាត់ទុកតួនាទីសម្តែងរបស់នាងដោយមិនប្រកាន់តួឯក ឬតួរងនោះឡើយ ដ្បិតតួអង្គទាំងអស់ក្នុងសាច់រឿងសុទ្ធតែសំខាន់ ។
ប៉ុប រចនា បានលើកឡើងកាលពីពេល ថ្មីៗកន្លងមកថា តួឯក ឬតួរងមិនសំខាន់ទេ សំខាន់មានសាច់រឿងលេងដូចគ្នា តួអង្គមួយណាសុទ្ធតែសំខាន់ទាំងអស់ បើមិនមានតួអង្គណាម្នាក់ រឿងក៏មិនអាចថតទៅបានដែរ ហើយនេះក៏មិនមែនជាតំណែងតួឯកលើកដំបូងរបស់នាងដែរ ។
ប៉ុប រចនា និយាយថា «តួឯក ហើយខ្ញុំក៏ធ្លាប់ថតជាតួរងវិញដែរ បើនិយាយឲ្យខ្លីទៅមិនមែនតួឯកតែខ្ញុំមួយទេ តួនៅក្នុងរឿងទាំងអស់សុទ្ធតែមានតួឯករៀងខ្លួន មិនអាចខ្វះតួអង្គណាម្នាក់បានទេ ហើយពិតជាសរសើរអស់ពីចិត្តស្រីស្អាតម្នាក់ហ្នឹង(Yem Srey Pich)ណាស់ដែលគាត់មិនប្រកាន់ ហើយមិនមានចរិតតួឯក »។
រឿង « មិត្តឫស្យា » ដែលទើបតែធ្វើពិធីក្រុងពលីចេញថត កាលពីពេល ថ្មីៗនេះ បានធ្វើឲ្យប៉ុប រចនា ដែលធ្លាប់ជាតួរង បែរជាឈានឡើងតួឯក ។
ទោះជាយ៉ាងណាក្តីប៉ុប រចនា មិនបានដឹងពីមូលហេតុដែលអ្នកដឹកនាំរឿង ជ្រើសរើសនាងសម្តែងជាតួឯកស្រីនៅក្នុងរឿង «មិត្តឫស្យា » នោះទេ ។ នាងសប្បាយចិត្តនៅពេលដែលបានឈរតំណែងនេះ ដូច្នេះហើយនាងនឹង ខិតខំប្រឹងប្រែងសម្តែងឱ្យអស់ពីសមត្ថភាព ដើម្បីឱ្យរឿងទាំងមូលទទួលបានជោគជ័យ ៕
ចែករំលែកព័តមាននេះ