រាជធានីភ្នំពេញ ៖ សេចក្តីរាយការណ៍បឋមឲ្យដឹងថា ស្ត្រីពីរនាក់គឺម្តាយក្មេកជាជនជាតិវៀតណាម សញ្ជាតិចិនហុងកុង និងកូនប្រសាស្រីជនជាតិខ្មែរ ត្រូវបានកម្លាំងសមត្ថកិច្ចមន្ទីរប្រឆាំងគ្រឿងញៀនឃាត់ខ្លួន ពាក់ ព័ន្ធករណីនាំយកថ្នាំញៀនប្រមាណជិត១គីឡូក្រាម ទៅផ្ញើនៅប្រៃសណីយ៍បញ្ជូនទៅប្រទេសអូស្ត្រាលី។
សេចក្តីរាយការណ៍បឋមបន្តថា កាលពីរសៀលថ្ងៃទី១៥ ខែតុលា ស្ត្រីទាំង២បានយកឡាំងស្នោ១កេស បិទស្កុតជិតឈឹង ដែលមានទម្ងន់ប្រមាណជិតមួយគីឡូក្រាម ទៅកាន់បញ្ជរប្រៃសណីយ៍ដែលមានទីតាំងនៅផ្លូវសហព័ន្ធរុស្ស៊ី សង្កាត់ទឹកថ្លា ខណ្ឌសែនសុខ ក្នុងគោលបំណងផ្ញើទៅប្រទេសអូស្ត្រាលីតាមរយៈក្រុមហ៊ុនមួយ។
ក្រោយទទួលបញ្ញើមន្ត្រីគយនិងមន្ត្រីពាក់ពន្ធប្រចាំការនៅទីនោះ រួមទាំងបុគ្គលិកប្រៃសណីយ៍ បានត្រួតពិនិត្យនិងស្គែនមើល ស្រាប់តែចេញលទ្ធផលឃើញមានថ្នាំញៀននៅក្នុងឡាំងនោះ ។ឃើញដូច្នោះសមត្ថកិច្ចប្រចាំការនៅបញ្ជរប្រៃសណីយ៍ បានឃាត់ខ្លួនស្ត្រីចិនទាំង២នាក់នោះនិងបានរាយការណ៍ទៅកាន់មន្ទីរប្រឆាំងគ្រឿងញៀន ដើម្បីឲ្យសមត្ថកិច្ចជំនាញចាត់ការតាមផ្លូវច្បាប់ ។
គ្រាន់តែទទួលបានព័ត៌មាននោះភ្លាម លោកនាយឧត្តមសេនីយ៍ ម៉ក់ ជីតូ អគ្គស្នងការរងនគរបា លជា តិ ទទួលបន្ទុកផែនប្រយុទ្ធប្រឆាំងគ្រឿងញៀន បានដាក់បទបញ្ជាទៅមន្ទីរប្រឆាំងគ្រឿងញៀនក្រសួងមហាផ្ទៃ ក្រោមការដឹកនាំដោយលោកឧត្តមសេនីយ៍ឯក ឡឹក វណ្ណៈ ឲ្យកម្លាំងជំនាញចុះទៅសហការនិងនាំខ្លួនជនសង្ស័យពីរនាក់ រួមជាមួយថ្នាំញៀន១កេស ដោយមានការសម្របសម្រួលពីស្ថាប័នអយ្យការសាលាដំបូងរាជធានីភ្នំពេញ ដើម្បីយកទៅធ្វើការសាកសួរ ។
សេចក្តីរាយការណ៍បន្តថា នៅពេលសមត្ថកិច្ចសាកសួរជនសង្ស័យបានសារភាពថា ពួកគេមិនមែនជាម្ចាស់ថ្នាំញៀននេះទេ ហើយពួកគេក៏មិនដឹងថានៅក្នុងកេសនោះមានថ្នាំញៀនដែរ ។ តាមចម្លើយនៅចំពោះមុខសមត្ថកិច្ចនោះថា ពួកគេត្រូវបានបុរសជាជនជាតិចិនម្នាក់ ពឹងពាក់ឲ្យជួយយកកេសស្នោនោះទៅកាន់ប្រៃសណីយ៍កម្ពុជា ដើម្បីផ្ញើចេញទៅប្រទេសអូស្ត្រាលី ដែលពួកគេមិនបានដឹងថានៅក្នុងកេសនោះមានអ្វីទេ លុះពេលទៅដល់កន្លែងផ្ញើត្រូវសមត្ថកិច្ចឃាត់ខ្លួន ។
ក្រោយពីស្តាប់ចម្លើយជនសង្ស័យកាលពីព្រឹកថ្ងៃទី១៧ ខែតុលា សមត្ថកិច្ចមន្ទីរប្រឆាំងគ្រឿងញៀន បានបង្កើតគណៈកម្មការដែលមានតំណាងព្រះរាជអាជ្ញាចូលរួមបានយកកេសថ្នាំញៀននោះបើកពិនិត្យ ពិតជាមានម្សៅថ្នាំញៀននៅក្នុងនោះមែន ។ ម្សៅថ្នាំញៀនត្រូវបានក្រុមឧក្រិដ្ឋជនប្រើប្រាស់ និងរៀបចំវេចខ្ចប់តាមបច្ចេកទេសជំនាញបំផុត ដោយច្រកថ្នាំក្នុងស្បោងប្លាស្ទិកអ៊ុតមាត់ថង់ជិត ដែលមានទំហំ២ទៅ៣តឹកបិទភ្ជាប់និងសំបកកេស៣ជ្រុង ហើយគេទិញរូបតុក្កតាធំមួយដាក់ចូលកណ្តាលដើម្បីបន្លំភ្នែក ។ ពេលសមត្ថកិច្ចយកស្បោង៣កញ្ចប់នោះចាក់ម្សៅថ្នាំញៀនចេញមក និងយកទៅថ្លឹងឃើញមានទម្ងន់៩៦១.៩០ ក្រាម (ជិត១គីឡូក្រាម) ។
ស្ត្រីចិនទាំង២នាក់ម្នាក់ឈ្មោះ ចាន់ ដារ៉ា ភេទស្រី អាយុ២៧ឆ្នាំ ជនជាតិខ្មែរ និងម្នាក់ឈ្មោះ TAM HIU TING ភេទស្រី អាយុ៥៥ឆ្នាំ ជនជាតិវៀតណាម សញ្ជាតិចិនកុងកុង ។ គ្រឿងញៀនដែលបានដកហូតជាប្រភេទមេតំហ្វេតាមីន (ICE) ទម្ងន់៩៦១.៩០ក្រាម ដែលលាក់បង្កប់ក្នុងជញ្ជាំងកេស ៕
ចែករំលែកព័តមាននេះ