រាជធានីភ្នំពេញ ៖ ប្រធានសមាគមមីក្រូហិរញ្ញវត្ថុកម្ពុជា(CMA) បានឲ្យដឹងថា បច្ចុប្បន្ននេះ បរិមាណអ្នកស្វែងរកកម្ចីពីមីក្រូហិរញ្ញវត្ថុនានាទូទាំងប្រទេសកំពុងធ្លាក់ចុះ ស្របពេលដែលវិស័យកសិកម្មកម្ពុជា ក៏មាននិន្នាការធ្លាក់ចុះដែរ ដែលតម្រូវឲ្យគ្រឹះស្ថានមីក្រូហិរញ្ញវត្ថុទូទាំងប្រទេស ត្រូវជំរុញការផ្ដល់កម្ចីដល់កសិករឲ្យបានកាន់តែច្រើនដើម្បីពង្រីកវិសាលភាពវិស័យកសិកម្មបន្ថែមទៀត…
រាជធានីភ្នំពេញ ៖ ប្រធានសមាគមមីក្រូហិរញ្ញវត្ថុកម្ពុជា(CMA) បានឲ្យដឹងថា បច្ចុប្បន្ននេះ បរិមាណអ្នកស្វែងរកកម្ចីពីមីក្រូហិរញ្ញវត្ថុនានាទូទាំងប្រទេសកំពុងធ្លាក់ចុះ ស្របពេលដែលវិស័យកសិកម្មកម្ពុជា ក៏មាននិន្នាការធ្លាក់ចុះដែរ ដែលតម្រូវឲ្យគ្រឹះស្ថានមីក្រូហិរញ្ញវត្ថុទូទាំងប្រទេស ត្រូវជំរុញការផ្ដល់កម្ចីដល់កសិករឲ្យបានកាន់តែច្រើនដើម្បីពង្រីកវិសាលភាពវិស័យកសិកម្មបន្ថែមទៀត ។
លោក គា បូរាណ ប្រធានសមាគមរូបនេះបានលើកឡើងថា ក្នុងរយៈពេលប៉ុន្មានឆ្នាំចុងក្រោយនេះ កម្ចីវិស័យកសិកម្មបានធ្លាក់ចុះ តែជំនួសមកវិញដោយកម្ចីលើវិស័យផ្សេង ដូចជាកម្ចីក្នុងវិស័យអចលនទ្រព្យ និងកម្ចីសម្រាប់ប្រើប្រាស់តាមគេហដ្ឋានជាដើម ។ យ៉ាងនេះក្ដី លោកបន្ដថា ៖« បើទោះជាកម្ចីក្នុងវិស័យកសិកម្មធ្លាក់ចុះ តែមិនមែនមានន័យទឹកប្រាក់កម្ចីធ្លាក់នោះទេ គឺចំនួនអ្នកមកខ្ចីប្រាក់សម្រាប់យកទៅប្រើប្រាស់ក្នុងវិស័យកសិកម្មធ្លាក់ចុះ ប៉ុន្តែទំហំទឹកប្រាក់ក្នុងវិស័យនេះ នៅដដែល មិនបានធ្លាក់ចុះទេ »។
លោកបន្តទៀតថា ដើម្បីឲ្យកម្ចីក្នុងវិស័យកសិកម្មកើនឡើងវិញ បណ្ដាមីក្រូហិរញ្ញវត្ថុនានា ត្រូវសហការជាមួយស្ថាប័នណាដែលធ្វើការជាមួយកសិករ ។ ជាក់ស្ដែងបច្ចុប្បន្ននេះ មានមីក្រូហិរញ្ញវត្ថុ និងធនាគារមួយចំនួនសហការជាមួយស្ថាប័នអាហ្គ្រីបាឌី ដែលជាស្ថាប័នជួយជ្រោមជ្រែងកសិករ ឲ្យបង្កើនការផលិតផលិតផលកសិកម្ម តាំងពីការផ្គត់ផ្គង់ពូជ បច្ចេកទេស រហូតដល់ធានាទីផ្សារជូនផងដែរ ។
លោកបញ្ជាក់ថា ៖« ការចាប់ដៃគូជាមួយស្ថាប័នមួយនេះ គឺជាការឱកាសមួយក្នុងការជំរុញកំណើនប្រាក់កម្ចីក្នុងវិស័យកសិកម្មរបស់គ្រឹះស្ថានមីក្រូហិរញ្ញវត្ថុ និងធនាគារ ព្រោះនៅពេលពលរដ្ឋយល់ដឹងពីរបៀបធ្វើកសិកម្មកាន់តែច្រើន ហើយមិនមានទុនសម្រាប់ចាប់ផ្ដើម ឬពង្រីក នោះគឺជាឱកាសរបស់គ្រឹះស្ថានហិរញ្ញវត្ថុក្នុងការផ្ដល់កម្ចីជូនកសិករ » ។ លោកបន្ថែមថា ការផ្ដល់កម្ចីក្នុងវិស័យកសិកម្ម មានហានិភ័យខ្ពស់ជាងវិស័យផ្សេងៗនៅក្នុងប្រទេសកម្ពុជា ហើយកត្តាសំខាន់ដែលធ្វើឲ្យមានហានិភ័យខ្ពស់នោះ ទី១ បញ្ហាទីផ្សាររបស់កសិផល។ ទី២ កត្តាធម្មជាតិ ព្រោះកសិកម្មក្នុងប្រទេសកម្ពុជា ភាគច្រើនពឹងផ្អែកលើទឹកភ្លៀង និងកត្តាមួយទៀតនោះគឺកត្តាថ្លៃដើមដោយសារតែការផលិតក្នុងប្រទេសកម្ពុជាហាក់មានថ្លៃដើមខ្ពស់នៅឡើយ ។
លោក យ៉ង់ ប៉ាក់ នាយកប្រតិបត្តិនៃស្ថាប័នអាហ្គ្រីបាឌី បានឲ្យដឹងថា បច្ចុប្បន្ននេះអាហ្គ្រីបាឌី បានសហការជាមួយស្ថាប័នពាក់ព័ន្ធក្នុងវិស័យកសិកម្មជាច្រើន ដូចជាមីក្រូហិរញ្ញវត្ថុ ក្រុមហ៊ុនធានារ៉ាប់រង ក្រុមហ៊ុនផ្គត់ផ្គង់ពូជ ផ្គត់ផ្គង់ជី និងអ្នកបច្ចេកទេសកសិកម្មជាដើម ។ ម្យ៉ាងទៀត បើសិនជាកសិករផលិតបានផលច្រើនហើយ តែគ្មានទីផ្សារសម្រាប់លក់កសិផលរបស់ពួកគាត់ ក៏ជាបញ្ហាមួយពិបាកដែរសម្រាប់ពង្រីកវិសាលភាពវិស័យកសិកម្មកម្ពុជា ដូចនេះ អាហ្គ្រីបាឌី ក៏បានទាក់ទងជាមួយនឹងក្រុមហ៊ុនធានាទិញកសិផលពីកសិករជាច្រើនផងដែរ ដើម្បីធានាទីផ្សារជូនកសិករ កុំឲ្យមានការព្រួយបារម្ភ ឬមានបញ្ហាទីផ្សារដូចកាលពីមុនៗទៀត ។
លោកបន្តថា រហូតមកដល់បច្ចុប្បន្ននេះអាហ្គ្រីនបាឌី បានធ្វើការជាមួយកសិករជាង ១.៥០០គ្រួសារ ហើយបើគិតជាទឹកប្រាក់សម្រាប់ពង្រីកវិសាលភាពកសិកម្មមានជាង៨០ម៉ឺនដុល្លារអាមេរិក ក៏ប៉ុន្តែក៏មានកសិករជាង៤ពាន់គ្រួសារទៀត បានចុះឈ្មោះចង់ចូលរួមធ្វើការជាមួយក្នុងវិស័យកសិកម្មនេះដែរ ដែលគិតជាទឹកប្រាក់សម្រាប់ការងារនេះ មានជាង៦លានដុល្លារអាមេរិក ។ លោកថា ៖« ទឹកប្រាក់ ដែលត្រូវចំណាយនោះ គឺត្រូវចំណាយទៅលើពូជ ជី ការទិញប័ណ្ណធានារ៉ាប់រងលើដំណាំកសិកម្មរបស់កសិករ ហើយទឹកប្រាក់ទាំងនេះយើងនឹងយកពីបណ្ដាធនាគារ និងមីក្រូហិរញ្ញវត្ថុក្នុងប្រទេសកម្ពុជា ដើម្បីផ្ដល់ជូនកសិករ តែយើងក៏នៅតែធ្វើការជាមួយកសិកររហូតដល់ពួកគាត់ប្រាកដថា អាជីវកម្មរបស់ពួកគាត់នឹងទទួលបានជោគជ័យ » ៕
ចែករំលែកព័តមាននេះ