ខេត្តកំពង់ចាម ៖ យ៉ាងហោចណាស់ មនុស្សចំនួន៦នាក់បានរងរបួស ត្រូវបានបញ្ជូនទៅសង្គ្រោះភ្លាមៗនៅមន្ទីរពេទ្យ ក្រោយពីរថយន្តដឹកអង្ករម៉ាកហ៊ីយ៉ាន់ដាយចំណុះ៥តោន បើកចុះពីលើស្ពានគីហ្សុ៊ណា ដាច់ហ្វ្រាំងបង្កការបុករះ នៅរង្វង់មូលក្បាលស្ពានគីហ្សុ៊ណាវេលាម៉ោង១០និង៥០នាទីព្រឹកថ្ងៃទី១៨ តុលា ២០១៨ ក្នុងភូមិទី៣ សង្កាត់វាលវង់ ក្រុងកំពង់ចាម គឺបុករះរថយន្តដឹកដំឡូងធុនធំ១គ្រឿងទៀត ទើបទៅមុខលែងរួច ។
ទោះបីជាបែបណា លោកវរសេនីយ៍ត្រី ស៊ាម យូសេង អធិការរងនគរបាលក្រុងកំពង់ចាម ទទួលផែនសណ្តាប់ធ្នាប់ឲ្យដឹងថា អាចថាជាសំណាងដែរ ដោយទីតាំងរង្វង់មូលខាងលើ ពេលនេះ មិនសូវមានសកម្មភាពមមារញឹក មនុស្សធ្វើដំណើរទៅវិញទៅមក មិនសូវកកកុញប៉ុន្មាន នាពេលកើតហេតុនោះ ។
លោកថា រថយន្តដឹកអង្ករពាក់ស្លាកលេខភ្នំពេញ 3B 3067 បានបើកចុះពីលើស្ពានគីហ្សុ៊ណា ក្នុងទិសដៅពីកើតមកលិច ដោយល្បឿនលឿន បានបុករះរថយន្ត ម៉ូតូនិងមកបុករថយន្តធំដឹកដំឡូងធុនយក្សលាន់ដូចរន្ទះ រួចក៏ក្រឡាប់ហើយចាក់បាវអង្ករចោលពេញលើថ្នល់ និងខ្ចាយរាយប៉ាយផងដែរចំរង្វង់មូល ។
លោកអធិការរងបានប្រាប់បន្តថា រថយន្តដឹកអង្ករបើកបរដោយឈ្មោះ សឹង សិត ភេទប្រុស អាយុ៣០ឆ្នាំ នៅភូមិព្រែកតាអូក ឃុំរកាកោះ ស្រុកគងពិសី ខេត្តកំពង់ស្ពឺ បានដាច់ហ្វ្រាំងពេលចុះពីលើស្ពាន រួចបុករថយន្តម៉ាកហ៊ីយ៉ាយដាយ ពណ៌បៃតង ពាក់ស្លាកលេខភ្នំពេញ 3C-6042 ដឹកដំឡូងដែលបើកបរដោយឈ្មោះ យឿង រស្មី ភេទប្រុស អាយុ២៦ឆ្នាំ នៅភូមិខ្លូយទី៣ ឃុំមៀន ស្រុកព្រៃឈរ ខេត្តកំពង់ចាម និងបានបុកម៉ូតូម៉ាកC125 ពណ៌ខ្មៅ ពាក់ស្លាកលេខត្បូងឃ្មុំ1F-2791 បើកបរដោយឈ្មោះ ស្រ៊ាន ស្រឿន ភេទប្រុស អាយុ៥០ឆ្នាំ នៅភូមិស្រៃស្ពៃ ឃុំគងជ័យ ស្រុកអូររាំងឪ ខេត្តត្បូងឃ្មុំ ។ ការដាច់ហ្វ្រាំងនេះបណ្តាលឲ្យមនុស្សរងរបួសដល់ទៅចំនួន៦នាក់ ក្នុងនោះធ្ងន់ម្នាក់ជាស្ត្រី ខូចរថយន្ត២គ្រឿងកម្រិតធ្ងន់ធ្ងរ និងម៉ូតូ១គ្រឿង ។
គ្រោះថ្នាក់នេះដោយសារតែរថយន្តដឹកអង្ករ ពេលដែលបើកបរចុះពីលើស្ពានជាន់ហ្វ្រាំងមិនស៊ី ទើបបង្កើតបាននូវមហន្តរាយដ៏ធ្ងន់ធ្ងរ បានរថយន្តយក្សដឹកដំឡូងជួយទប់នៅចំរង្វង់មូល កុំអីមិនដឹងបង្កើតមហន្តរាយធំធេងប៉ុណ្ណាទៀតឡើយ ។លោកអធិការរងនគរបាលក្រុងកំពង់ចាម បញ្ជាក់ទៀតថា បន្ទាប់ពីមានហេតុការណ៍ខាងលើនេះលោកវរសេនីយ៍ត្រី អុឹង ប៊ុន អធិការនគរបាលក្រុងកំពង់ចាម និងលោកឧត្តមសេនីយ៍ត្រី សោម រស់ ស្នងការរងនគរបាលខេត្ត បានដឹកនាំកម្លាំងចុះមកផ្ទាល់ ដោយបានបញ្ជាឱ្យកម្លាំងនគរបាលជួយសម្រួលចរាចរណ៍មិនឲ្យមានការកកស្ទះ ។
រថយន្តដែលក្រឡាប់ត្រូវបានស្ទូចឡើងនិងបានអូសយកមករក្សាទុកនៅអធិការដ្ឋាននគរបាលក្រុងកំពង់ចាម ដោះស្រាយតាមច្បាប់ ។ មានការកត់សម្គាល់ថា ទីតាំងបុករះនេះកើតមានគ្រោះថ្នាក់បន្តបន្ទាប់ ចំនួន៤លើក មកហើយ បានបង្កឲ្យមនុស្សស្លាប់យ៉ាងហោចណាស់ក៏មិនក្រោម១០នាក់ដែរ ដោយសាររថយន្តធុនធ្ងន់បើកចុះពីស្ពានហើយត្រូវដាច់ហ្វ្រាំងដូចគ្នាបែបនេះ ដែលមានតែរង្វង់មូលមួយនេះជួយទប់ដំណើរ ៕
ចែករំលែកព័តមាននេះ