ខេត្តព្រះសីហនុ ៖ សកម្មភាពសំអាតអនាម័យបរិស្ថានពីសំណាក់រដ្ឋបាលឃុំវាលរេញ គេសង្កេតឃើញមានភាពសកម្មផុលផុស ក្នុងការចុះរើសប្រមូលសំរាមតាមទីសាធារណៈនៅត្រង់ចំណុចប្រជុំជន ចំណតរថយន្ត ជាពិសេសនៅចំណុចសួនច្បារង្វង់មូលវាលរេញ ដែលជាកន្លែងចំណុចផ្លូវប្រសព្វ និងជាទីកន្លែលំហែ ហាត់ប្រាណ ពីសំណាក់ពលរដ្ឋគ្រប់មជ្ឈដ្ឋាន ។
ជាមួយនិងសកម្មភាពនេះ លោកខូវ ថានិត មេឃុំវាលរេញដែលជាឃុំប្រជុំជនផ្សារ បានអោយកោះសន្តិ
ភាពដឹងថា ក្រៅតែពីការចុះរៀបចំណ្តាប់ធ្នាប់ នៅមុខប្រជុំជនផ្សារ តាមចិញ្ចើមផ្លូវជាតិ បញ្ហាអនាម័យបរិស្ថាននៅទីប្រជុំជនហើយនោះ ក៏ជាចំណុចយ៉ាងយកចិត្តទុកដាក់បំផុតមួយទៀតពីសំណាក់លោក សរ កក្កដាអភិបាលស្រុកព្រៃនប់ រហូតមានការចុះផ្ទាល់ ហើយណែនាំជាប្រចាំ ដល់មន្ត្រីពាក់ព័ន្ធ ជាពិសេសរដ្ឋបាលឃុំ អោយបង្កើនស្មារតីសហការចុះសំអាត រើសសំរាម និងបំផុសចលនាអោយពលរដ្ឋមានការយល់ដឹងអោយបានច្រើន ជាមួយនិង បញ្ហអនាម័យបរិស្ថាន ។
លោកមេឃុំបានបន្តថា ជាមួយនឹងសកម្មភាពនេះ ធុងសំរាមត្រូវបានផ្តល់មកជាបន្តទៀត តាមរយៈការឧបត្ថម្ភពីរដ្ឋបាលស្រុក ដាក់តាមទីសាធារណៈ ដើម្បីជាការលើកកំពស់ស្មារតីពលរដ្ឋអោយចេះយល់ពីការវេចខ្ចប់ដាក់តាមធុងដែលមាននៅជិតខ្លួន ៕
ចែករំលែកព័តមាននេះ