ខេត្តបាត់ដំបង ៖ រថយន្តម៉ាកហាយឡិនឌ័រមួយគ្រឿង ដែលសមត្ថកិច្ចរឹបអូសពាក់ព័ន្ធនឹងករណីជនល្មើសជិះតាមបាញ់សម្លាប់មនុស្ស (អ្នកដឹកទឹកកក) នៅឃុំភ្នំសំពៅ ស្រុកបាណន់ កាលពីដើមខែសីហា កន្លងទៅ ត្រូវបានចៅក្រមស៊ើបសួរសាលាដំបូងខេត្ត សម្រេចប្រគល់ជូនក្រុមគ្រួសារជនល្មើសវិញហើយ កាលពីវេលាម៉ោង១១ថ្ងៃត្រង់ថ្ងៃទី១៨ តុលា ក្រោមហេតុផលមិនជាប់ពាក់ព័ន្ធនឹងបទល្មើស ដែលផ្ទុយពីរបាយការណ៍ដំបូងរបស់សមត្ថកិច្ចពេលចុះដកហូត និងធ្វើឱ្មានមន្ទិលសង្ស័យអំពីភាពមិនប្រក្រតីនៃការប្រគល់វត្ថុតាងនេះ ។ នេះបើតាមប្រភពពីមន្ត្រីនៃស្នងការដ្ឋានខេត្ត ។
ប្រភពព័ត៌មានបានឱ្យដឹងថា រថយន្តដែលពាក់ព័ន្ធនឹងបទល្មើសឧក្រិដ្ឋ ហើយត្រូវលោកចៅក្រមស៊ើបសួរប្រគល់ឱ្យក្រុមគ្រួសារជនល្មើសវិញនោះ ម៉ាកហាយឡិនឌ័រ ពណ៌ទឹកមាស ពាក់ស្លាកលេខភ្នំពេញ2Z-1385 ។ បើតាមប្រភពដដែលថា រថយន្តនេះត្រូវបានកម្លាំងការិយាល័យជំនាញធ្វើការស្រាវជ្រារកឃើញ និងដកហូតបានពីក្រុមគ្រួសារជនល្មើស ក្រោយពីសង្ស័យមានពាក់ព័ន្ធនឹងខ្មាន់កាំភ្លើងជិះធ្វើសកម្មភាពបាញ់សម្លាប់មនុស្សយ៉ាងសាហាវ ក្នុងសំណុំរឿង«ស្នេហាត្រីកោណ» កាលពីខែសីហា នៅក្នុងទឹកដីឃុំភ្នំសំពៅ ស្រុកបាណន់ ។
ប៉ុន្តែត្រូវលោកចៅក្រមស៊ើបសួរដែលកាន់សំណុំរឿងនេះ សម្រេចប្រគល់ឲ្យក្រុមគ្រួសារជនត្រូវចោទវិញហើយ ក្រោយពីមានមេធាវីនៃភាគីជនត្រូវចោទប្រឹងប្រែងរត់ការខ្វែងដៃខ្វែងជើងច្រើនលើកច្រើនសារ ដើម្បីរំដោះរថយន្តនោះផ្ដាច់ចេញពីសំណុំរឿងឧក្រិដ្ឋ ។
កោះសន្តិភាពមិនទាន់អាចទំនាក់ទំនងសុំការបំភ្លឺពីលោកចៅក្រមស៊ើបសួរ ដែលកាន់សំណុំរឿងនេះបានទេ នៅព្រឹកថ្ងៃទី១៩តុលា ។ ប៉ុន្តែលោកឧត្តមសេនីយត្រី ជេត វណ្ណនី ស្នងការរងខេត្ត ដែលទទូលបន្ទុកកិច្ចការនេះ បានប្រាប់កោះសន្តិភាពថា ពិតជាបានប្រគល់រថយន្តនោះជូនម្ចាស់ដើមវិញមែន ដោយលោកបានអះអាងជំនួសលោកចៅក្រមដូច្នេះថា «រថយន្តនោះ មិនពាក់ព័ន្ធក្នុងសំណុំរឿងបទឧក្រិដ្ឋបាញ់សម្លាប់មនុស្សនោះទេ» ។
លោកស្នងការរងបានបញ្ជាក់ទៀតថា « ការដកហូតដំបូងយើងសង្ស័យពាក់ព័ន្ធ តែក្រោយពីលោកចៅក្រមស៊ើបអង្កេត គឺរថយន្តនេះមិនជាប់ពាក់ព័ន្ធ ទើបចៅក្រមស៊ើបសួរសម្រេចប្រគល់ជូនម្ចាស់ដើមវិញ»។ផ្ទុយពីការបំភ្លឺរបស់លោកស្នងការរងជេត វណ្ណនី បើតាមប្រភពពីសមត្ថកិច្ចបានប្រាប់ថា រថយន្តនោះត្រូវបានដកហូតពីអ្នកទិញបន្តម្នាក់នៅភ្នំពេញ ដែលម្ចាស់ (ឪពុកជនត្រូវចោទ) បានយកទៅលក់ ក្រោយពីមានអំពើបាញ់សម្លាប់មនុស្សនៅស្រុកបាណន់បាន២ថ្ងៃ ដែលគេសង្ស័យថា ជនល្មើសអាចជិះរថយន្តនេះ ពេលធ្វើសកម្មភាព ថែមទាំងបានធ្វើកំណត់ហេតុដកហូតត្រឹមត្រូវទៀតផង។
គួរំលឹកថា កាលពីយប់ថ្ងៃទី០៥សីហា២០១៨ នៅចំណុចវាលអន្ទង់ស ស្ថិតក្នុងភូមិក្រពើជើង ឃុំភ្នំសំពៅ ស្រុកបាណន់ មានករណីស្ទាក់បាញ់យ៉ាងសាហាវទៅលើអ្នកបើករថយន្តដឹកទឹកកកម្នាក់ឈ្មោះពេជ្រ ភិសា អាយុ២៣ឆ្នាំ រស់នៅភូមិតាង៉ែន ឃុំតាគ្រាម ស្រុកបាណន់ ត្រូវរបួសចំនួន៥គ្រាប់បណ្ដាលឲ្យស្លាប់ ខណៈអ្នករួមដំណើរ២នាក់រួចពីគ្រោះថ្នាក់ ។
ខ្មាន់កាំភ្លើងមានគ្នា២នាក់ តែមិនត្រូវបានគេស្គាល់អត្តសញ្ញាណទេ។ សាក្សីក្នុងហេតុការណ៏នេះបាននិយាយថា ខ្មាន់កាំភ្លើងជិះរថយន្តម៉ាកហាយឡិបឌ័រ តែមិនចាំស្លាកលេខ។ ពួកគេបានជិះតាមពីក្រោយ ហើយទៅឈប់ពីមុខរថយន្តដឹកទឹកកករបស់ជនរងគ្រោះ រួចចុះបាញ់ប្រហារជាច្រើនគ្រាប់ទៅលើអ្នកបើកបរដោយអាវុធខ្លី។ ក្រោយពីបាញ់រះខ្មាន់កាំភ្លើងទាំង២នាក់ បានបើករថយន្តគេចត្រឡប់ក្រោយវិញបាត់ស្រមោលតែម្ដង។
នៅក្នុងសំណុំរឿងនេះ សមត្ថកិច្ចបានធ្វើការស្រាវជ្រាវ រហូតឈានដល់កំណត់មុខសញ្ញាជនដៃដល់ និងបានធ្វើការសន្និដ្ឋានជាបឋមថា ការបាញ់សម្លាប់មនុស្សយ៉ាងឃោឃៅនេះ គឺជាអំពើឃាតកម្មដែលផ្ដើមចេញពីរឿង«ស្នេហាត្រីកោណ»។ បន្ទាប់ពីស្រាវជ្រាវនិងបានដឹងអំពីទីតាំងលាក់ខ្លួន កម្លាំងព្រហ្មទណ្ឌនៃស្នងការខេត្ត បានសុំសហការជាមួយសមត្ថកិច្ចប្រទេសថៃ តាមចាប់ខ្លួនជនសង្ស័យបានចំនួន២នាក់ នៅថ្ងៃទី១៦សីហា២០១៨ នៅលើទឹកដីខេត្តស្រះកែវ ប្រទេសថៃ។ ជនទាំង២នាក់គឺឈ្មោះប៊ុន ពន្លក អាយុ២២ឆ្នាំ ជាជនដៃដល់ និងឈ្មោះហួន វាសនា អាយុ២៣ឆ្នាំ ជាអ្នកសមគំនិត។
បើតាមសមត្ថកិច្ចបានអះអាងថា ក្រោយពីឃាត់ខ្លួនជនដៃដល់ទាំង២នាក់ កម្លាំងការិយាល័យជំនាញ បានធ្វើការស្រាវជ្រាវស្វែងរករថយន្តដែលជនទាំង២នាក់ជិះធ្វើសកម្មភាព រហូតដកហូតបានរថយន្តដែលពាក់ព័ន្ធ គឺជារថយន្តម៉ាកហាយឡិនឌ័រខាងលើនេះ។ ប៉ុន្តែពេលនេះរថយន្តនេះត្រូវបានតុលាការប្រគល់ឲ្យទៅក្រុមគ្រួសារជនត្រូវចោទវិញហើយ ដោយអាះអាងថា មិនជាប់ពាក់ព័ន្ធក្នុងសំណុំរឿងឧក្រិដ្ឋនេះទេ តែគេសង្ស័យការប្រគល់វត្ថុតាងនេះធ្វើឡើងដោយមិនប្រក្រតី៕
ចែករំលែកព័តមាននេះ