ខេត្តកំពង់ឆ្នាំង ៖ រថយន្តកាមរីគូទប៉ោងពណ៌ខ្មៅមួយគ្រឿងដែលដឹកឈើប្រណីតពេញបានក្រឡាប់ ហើយទៅបុកនឹងរោងលក់ទឹកកកមួយកាលពីវេលាម៉ោង៤ទៀបភ្លឺថ្ងៃទី២៥ ខែមីនា នៅតាមបណ្តោយផ្លូវជាតិលេខ៥ស្ថិតក្នុងភូមិសាលាផ្លូវវាយ ឃុំស្វាយជ្រុំ ស្រុករលាប្អៀរ។ អ្នកបើកបរបានរងរបួសស្រាល ហើយត្រូវបក្សពួកដែលបើករថយន្តតាមបាននាំចេញយ៉ាងប្រញាប់បំផុត។ ចំណែកឈើគ្រញូងមួយចំនួនធំត្រូវប្រជាពលរដ្ឋលួចជញ្ជូនយកមុនពេលសមត្ថកិច្ចទៅដល់។
មន្ត្រីប៉ូលិសចរាចរណ៍ខេត្តឱ្យដឹងថា រថយន្តនោះពាក់ស្លាកលេខភ្នំពេញ២F០៩៧៦ ដឹកឈើគ្រញូងពេញក្នុងទិសដៅពីលិចទៅកើត លុះទៅដល់ចំណុចកើតហេតុបានក្រឡាប់ជ្រុលទៅបុកហាងលក់ទឹកកកមួយបណ្តាលឱ្យខូចខ្ទេច ចំណែកអ្នកបើកបរលូនចេញ ហើយត្រូវបក្សពួកដែលបើករថយន្តមួយគ្រឿងទៀតដឹកចេញទៅមុនពេលសមត្ថកិច្ចទៅដល់។ ឈើក្នុងរថយន្តប្រមាណ០,៨០ម៉ែត្រគូបត្រូវប្រជាពលរដ្ឋនៅក្បែរនោះនាំគ្នាលួចជញ្ជូនយកអស់ប្រហែលពាក់កណ្តាល។
តាមប្រភពព័ត៌មានមួយថា រថយន្តដឹកឈើនោះត្រូវសមត្ថកិច្ចមួយក្រុមនាំគ្នាដេញស្ទាក់ចាប់ ហើយអ្នកបើកបរដឹងខ្លួនក៏បើកគេចយ៉ាងលឿន លុះដល់ផ្លូវកោងបត់ឆ្វេងក៏ក្រឡាប់តែម្តង។ រថយន្តត្រូវសមត្ថកិច្ចយកទៅរក្សាទុកនៅការិយាល័យចរាចរណ៍ផ្លូវគោកខេត្ត ចំណែកឈើគ្រញូងបានប្រគល់ជូនមេព្រៃតាមនីតិវិធី ៕
ចែករំលែកព័តមាននេះ