ខេត្តស្វាយរៀង ៖ កងរាជអាវុធហត្ថខេត្តបានដឹកនាំកម្លាំងចុះបង្ក្រាបក្រុមជួញដូរគ្រឿងញៀនចាប់ឃាត់ខ្លួនជនសង្ស័យជាជនជាតិវៀតណាមប្រុសស្រី៣នាក់ និងថ្នាំញៀនម៉ាទឹកកកចំនួន៤០៤កញ្ចប់ និងសម្ភារមួយចំនួនកសាងសំណុំរឿងបញ្ជូនទៅសាលាដំបូងខេត្តស្វាយរៀងព្រឹកថ្ងៃទី១៩ ខែតុលា ឆ្នាំ២០១៨ នេះដើម្បីចាត់ការតាមនីតិវិធី ។ បើតាមមន្ត្រីកងរាជអាវុធហត្ថខេត្តបានឲ្យដឹងថា…
ខេត្តស្វាយរៀង ៖ កងរាជអាវុធហត្ថខេត្តបានដឹកនាំកម្លាំងចុះបង្ក្រាបក្រុមជួញដូរគ្រឿងញៀនចាប់ឃាត់ខ្លួនជនសង្ស័យជាជនជាតិវៀតណាមប្រុសស្រី៣នាក់ និងថ្នាំញៀនម៉ាទឹកកកចំនួន៤០៤កញ្ចប់ និងសម្ភារមួយចំនួនកសាងសំណុំរឿងបញ្ជូនទៅសាលាដំបូងខេត្តស្វាយរៀងព្រឹកថ្ងៃទី១៩ ខែតុលា ឆ្នាំ២០១៨ នេះដើម្បីចាត់ការតាមនីតិវិធី ។
បើតាមមន្ត្រីកងរាជអាវុធហត្ថខេត្តបានឲ្យដឹងថា ករណីចុះបង្ក្រាបនេះកើតឡើងកាលពីវេលាម៉ោង១០និង៥០នាទីយប់ ថ្ងៃទី១៦ ខែតុលា ឆ្នាំ២០១៨ កម្លាំងមន្ទីរយុត្តិធម៌សហការជាមួយកម្លាំងមូលដ្ឋានកងរាជអាវុធហត្ថស្រុកកំពង់រោទិ៍ដឹកនាំដោយលោកវរសេនីយ៍ឯក ស្រី វុត្ថា មេបញ្ជាការរងទទួលការងារយុត្តិធម៌ចុះបង្ក្រាបករណីរក្សាទុក ឬជួញដូរដោយខុសច្បាប់នូវសារធាតុញៀនស្ថិតនៅចំណុចជិតព្រំដែន ស្ថិតភូមិព្រៃវល្លិ៍ ឃុំថ្មី ស្រុកកំពង់រោទិ៍ ខេត្តស្វាយរៀង ឃាត់ខ្លួនជនសង្ស័យបានចំនួន៣នាក់ ប្រុស២នាក់ ស្រី១នាក់ ។
មន្ត្រីជំនាញកងរាជអាវុធហត្ថខេត្តបានឲ្យដឹងទៀតថា ជនសង្ស័យនិងវត្ថុតាងរួមមានទី១-ឈ្មោះ ហ្វៀង ធីធឿ ភេទប្រុស អាយុ៤៣ឆ្នាំ ជនជាតិវៀតណាម មុខរបរមិនពិតប្រាដក មានទីលំនៅភូមិអូយាងតី សង្កាត់បិនហៀប ស្រុកតៀងតីង ខេត្តឡុងអាន ប្រទេសវៀតណាម, ទី២-ឈ្មោះ វិន ធីបី ភេទស្រី អាយុ៥៥ឆ្នាំ ជនជាតិវៀតណាម មុខរបរមិនពិតប្រាកដ មានទីលំនៅខេត្តទីនយ៉ាង ប្រទេសវៀតណាម និងទី៣-ឈ្មោះ ម៉ាយ ង៉ុកឡុង ភេទប្រុស អាយុ៥២ឆ្នាំ ជនជាតិវៀតណាម មានទីលំនៅបច្ចុប្បន្នភូមិឡុងនឿង ស្រុកកឹងឃូក ខេត្តឡុកអាង ប្រទេសវៀតណាម ។
វត្ថុតាងចាប់យកបានរួមមានទី១-ម្សៅក្រាមពណ៌សថ្លា ចំនួន៨កញ្ចប់(តូច៤០៤កញ្ចប់)មានទម្ងន់១០៤.៨៥ក្រាម(គិតទាំងសំបកវិចខ្ចប់), ទី២-កូនសៀវភៅចំនួន១ក្បាល, ទី៣-ថង់សម្រាប់ដាក់គ្រឿងញៀនមួយចំនួន, ទី៤-កូនកន្ត្រៃចំនួន២, ទី៥-នាឡិកាចំនួន១ និងទី៦-លោហៈធាតុពណ៌លឿងចំនួន២វង់ ។ បច្ចុប្បន្នជនសង្ស័យ និងវត្ថុតាងត្រូវបានកសាងសំណុំរឿងតាមនីតិវិឋធីបញ្ជួនខ្លួនទៅសាលាដំបូងខេត្តស្វាយរៀងចាត់កាត់ការតាមផ្លូវច្បាប់ ៕
ចែករំលែកព័តមាននេះ