រាជធានីភ្នំពេញ ៖ បេក្ខជនជាង១ពាន់នាក់ បានចូលប្រឡងប្រកួតប្រជែងសមត្ថភាព ដើម្បីចូលរួមបម្រើការងារក្នុងក្របខណ្ឌក្រសួងការងារបណ្តុះបណ្តាលវិជ្ជាជីវៈសម្រាប់ឆ្នាំ២០១៨ ខណៈក្រសួងមានតម្រូវការមន្ត្រីចំនួន១៤នាក់ប៉ុណ្ណោះ ។
ក្នុងពេលបើកការប្រឡងជ្រើសរើសមន្ត្រីរាជការក្របខណ្ឌក្រសួងការងារ និងបណ្ដុះបណ្ដាលវិជ្ជាជីវៈលោកទៀវ ម៉ាក់តែល អនុរដ្ឋលេខាធិការក្រសួងការងារបានថ្លែងថា ក្នុងការប្រឡងក្របខណ្ឌក្រសួងការងារនៅឆ្នាំ២០១៨នេះមានបេក្ខជនចូលរួមប្រឡងចំនួន១,២១២នាក់ ក្នុងនោះមានបុគ្គលិកជាប់កិច្ចសន្យានៃក្រសួងការងារ៤៥នាក់ ជនពិការ១៧នាក់ ក្រៅពីនេះមានព្រះសង្ឃ សិស្សនិស្សិតជាដើម ។
ការប្រឡងនេះធ្វើឡើងនៅវិទ្យាស្ថានជាតិព្រះកុសមៈនាព្រឹកថ្ងៃទី១៩ ខែតុលា ឆ្នាំ២០១៨លោកទៀវ ម៉ាក់តែល បានបញ្ជាក់ថា គណៈកម្មការរៀបចំការប្រឡងនេះតែងតែរៀបចំការប្រឡងទៅតាមនីតិវិធីដោយបង្កើតឱ្យមានអនុគណៈកម្មការរៀបចំទទួលខុសត្រូវទៅតាមអគារ និងបន្ទប់ប្រឡងនីមួយៗ ។ លោកបន្តថា ក្រសួងការងារក៏បានចេញនូវសេចក្ដីណែនាំសម្រាប់អនុរក្ស និងអ្នកទទួលខុសត្រូវនៅតាមបន្ទប់ក្នុងការពិនិត្យមើលសកម្មភាពប្រឡង និងសកម្មភាពមិនប្រក្រតីផ្សេងៗរបស់បេក្ខជនផងដែរ ។
ទន្ទឹមនឹងនោះក្រសួងក៏បានដាក់ចេញបទបញ្ជាផ្ទៃក្នុងសម្រាប់បេក្ខជនប្រឡងធ្វើយ៉ាងណាឱ្យការប្រឡងជ្រើសរើសមន្ត្រីក្របខណ្ឌឆ្នាំ២០១៨ របស់ក្រសួងការងារ និងបណ្ដុះបណ្ដាលវិជ្ជាជីវៈ ប្រព្រឹត្តទៅប្រកបដោយប្រសិទ្ធភាពតម្លាភាព និងយុត្តិធម៌ ។ លោកអនុរដ្ឋលេខាធិការបានបន្តថា គណៈកម្មការ និងអនុគណៈកម្មការរៀបចំ និងទទួលខុសត្រូវការប្រឡងជ្រើសរើសមន្ត្រីក្របខណ្ឌក្រសួងការងារនេះនៅតែពង្រឹងការងារត្រួតពិនិត្យក៏ដូចជា ការកែសន្លឹកកិច្ចការយ៉ាងហ្មត់ចត់ជានិច្ច ដើម្បីចម្រាញ់យកមន្ត្រីថ្មីប្រកបដោយសមត្ថភាពពិតប្រាកដដែលនឹងក្លាយទៅជាកម្លាំងជួយជំរុញការអភិវឌ្ឍជាតិ ។
បើតាមលោកទៀវ ម៉ាក់តែល សម្រាប់ការប្រឡងឆ្នាំ២០១៨នេះក្រសួងការងារ និងបណ្ដុះបណ្ដាលវិជ្ជាជីវៈត្រូវការមន្ត្រីថ្មីចំនួន១៤នាក់ ។
សូមជម្រាបថា ការប្រឡងជ្រើសរើសមន្ត្រីរាជការក្របខណ្ឌក្រសួងការងារ និងបណ្ដុះ បណ្ដាលវិជ្ជាជីវៈនេះត្រូវបានចែកចេញជាមាន២វិញ្ញាសា៖ វិញ្ញាសាចំណេះដឹងទូទៅ ដែលមា នរយៈពេលប្រឡង២ម៉ោង និងវិញ្ញាសាភាសាអង់គ្លេសដែលមានរយៈពេល១ម៉ោង៣០នាទី ។ ការប្រឡងមានការចូលរួមសហការរៀបចំពីក្រសួងមុខងារសាធារណៈ និងមានការចូលរួមសង្កេតការណ៍ពីអង្គភាពប្រឆាំងអំពើពុករលួយ (ACU) ផងដែរ ៕
ចែករំលែកព័តមាននេះ