រាជធានីភ្នំពេញ ៖ ការធ្លាក់ចុះស្មានមិនដល់ពីចំនួនប្រជាពលរដ្ឋ ដែលមិននាំគ្នាទៅកម្សាន្តនៅតំបន់ឆ្នេរសមុទ្រក្នុងខេត្តព្រះសីហនុ នាឱកាសនៃពិធីបុណ្យភ្ជុំបិណ្ឌកន្លងមកនេះ បានបង្ហាញជាសារមួយ ដែលតម្រូវឱ្យរាជរដ្ឋាភិបាល ត្រូវបង្កើនការគិតគូរដោះស្រាយបញ្ហានេះ ខណៈការឃ្លាតឆ្ងាយពីចំនួនអ្នកទេសចរអឺរ៉ុបនិងអ្នកទេសចរជាតិ ។…
រាជធានីភ្នំពេញ ៖ ការធ្លាក់ចុះស្មានមិនដល់ពីចំនួនប្រជាពលរដ្ឋ ដែលមិននាំគ្នាទៅកម្សាន្តនៅតំបន់ឆ្នេរសមុទ្រក្នុងខេត្តព្រះសីហនុ នាឱកាសនៃពិធីបុណ្យភ្ជុំបិណ្ឌកន្លងមកនេះ បានបង្ហាញជាសារមួយ ដែលតម្រូវឱ្យរាជរដ្ឋាភិបាល ត្រូវបង្កើនការគិតគូរដោះស្រាយបញ្ហានេះ ខណៈការឃ្លាតឆ្ងាយពីចំនួនអ្នកទេសចរអឺរ៉ុបនិងអ្នកទេសចរជាតិ ។
«ដោយសារពលរដ្ឋភ័យខ្លាច មិនហ៊ានទៅលេងនៅខេត្តព្រះសីហនុ ទើបក្រសួងមហាផ្ទៃ បង្កើតក្រុមការងារកម្រិតស្រាល ។ បញ្ហាដែលកើតឡើងនៅខេត្តព្រះសីហនុនេះ វាជាបញ្ហាប្រឈមថ្មី ដែលពីមុនមកយើងមិនធ្លាប់ជួបប្រទះទេ ដូច្នេះហើយយើងម្ចាស់ការពីដើមទៅ ប៉ុន្ដែមកដល់ពេលនេះ សភាពការណ៍ដែលថា ត្រួតពិ
និត្យមិនបាននោះ វាមិនដល់ថ្នាក់ហ្នឹងឡើយ ខ្ញុំគិតថា មកដល់ពេលនេះមិនមានបញ្ហាអីធំដុំ ដែលដោះមិនចេញនោះទេ» ។
ខាងលើនេះ ជាប្រសាសន៍របស់សម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ ថ្លែង នាព្រឹកថ្ងៃទី១៨ ខែតុលា ក្រោយពីបញ្ចប់កិច្ចប្រជុំជាមួយគណៈកម្មការទី៤នៃរដ្ឋសភា គឺគណៈកម្មការមហាផ្ទៃ ការពារជាតិ និងមុខងារសាធារណៈ ដឹកនាំដោយលោកហ៊ុន ណេង នៅទីស្ដីការក្រសួងមហាផ្ទៃ ។
សម្តេចក្រឡាហោម ស ខេង ថ្លែងថា បញ្ហាប្រឈមនៅខេត្តព្រះសីហនុគឺជារឿងថ្មី ដែលកម្ពុជាមិនធ្លាប់ជួបប្រទះពីមុនមកទេ ប៉ុន្ដែបញ្ហានេះសមត្ថកិច្ចនិងអាជ្ញាធរពាក់ព័ន្ធអាចគ្រប់គ្រងបានទាំងអស់ ។ បញ្ហាដែលប្រឈមនៅខេត្តព្រះសីហនុ គឺពាក់ព័ន្ធជាមួយនឹងបទល្មើសគ្រឿងញៀន បទល្មើសប្លន់ និងបញ្ហាបរិស្ថានអនាម័យ ប៉ុន្ដែវាមិនមែនជាបញ្ហាធ្ងន់ធ្ងរឡើយ ។ មួយទៀត នៅពេលការវិនិយោគច្រើន បញ្ហាជម្លោះរឿងដីធ្លីក៏កើតឡើងច្រើនដែរ ខណៈដែលអាជ្ញាធរកំពុងតែខិតខំដើម្បីដោះស្រាយបញ្ហាទាំងអស់នេះ ។
គួរបញ្ជាក់ថា កន្លងមកសម្ដេចក្រឡាហោម ស ខេង បានបញ្ជាដល់អង្គភាពសំខាន់ៗចំនួន៤របស់ ក្រសួង មហាផ្ទៃ ឲ្យបង្កើតក្រុមប្រតិបត្តិការ ចុះទៅខេត្តព្រះសីហនុជាបន្ទាន់ ដើម្បីស្រាវជ្រាវនិងជួយបង្ក្រាបបទ ល្មើស បន្ទាប់ពីលេចឡើងនូវសកម្មភាពមិនប្រក្រតីមួយចំនួន ចំណែកខេត្តសៀមរាបសម្តេចមិនបានបញ្ជូន ទៅទេ ។ អង្គភាពចំនួន៤នោះរួមមាន អគ្គនាយកដ្ឋានរដ្ឋបាល អគ្គស្នងការដ្ឋាននគរបាលជាតិ អគ្គនាយក ដ្ឋានអន្តោប្រវេសន៍ និងក្រុមអ្នកច្បាប់របស់ក្រសួងមហាផ្ទៃ ។
សម្ដេចក្រឡាហោម ស ខេង គូសបញ្ជាក់ថា មិនមែនទៅដើម្បីបង្ក្រាបបទល្មើសនោះទេពោលគឺសមត្ថកិច្ចបង្ក្រាបបទល្មើស ជាសមត្ថកិច្ចរបស់អាជ្ញាធរមូលដ្ឋាននៅខេត្តព្រះសីហនុ ហើយក្រុមប្រតិបត្តិការនេះ គ្រាន់ តែពិគ្រោះយោបល់ និងរាយការណ៍ជូនក្រសួងមហាផ្ទៃ ដើម្បីមានវិធានការ ហើយបើក្រសួងដោះស្រាយមិនចេញ ត្រូវរាយការណ៍បន្ដជូនប្រមុខរាជរដ្ឋាភិបាលជាអ្នកសម្រេច ។
ក្នុងពិធីជួបសំណេះសំណាលជាមួយនាយនគរបាលជាន់ខ្ពស់ និងនាយនគរបាលនៃអគ្គនាយកដ្ឋាននគរ បាលអន្តោប្រវេសន៍ កាលពីថ្ងៃទី១៣ ខែកញ្ញាកន្លងមកនេះ លោកនាយឧត្តមសេនីយ៍ សុខ ផល រដ្ឋលេខា ធិការក្រសួងមហាផ្ទៃ បានថ្លែងថា នៅចុងឆ្នាំ២០១៨នេះ ជនជាតិចិននឹងមកកម្ពុជាជាង៥មុឺននាក់ ដើម្បីប្រកបអាជីវកម្មផ្សេងៗ ខណៈកម្ពុជាមានថៅកែចិនកំពុងសាងសង់អគារធំៗជាច្រើន ហើយគោលដៅសំខាន់ៗដែលចិនឆ្ពោះមកនោះ គឺនៅរាជធានីភ្នំពេញ ខេត្តព្រះសីហនុ និងខេត្តសៀមរាប ។
ទាក់ទងនឹងសំណួរថា មានមូលហេតុឬបញ្ហាទើបបានជាប្រជាពលរដ្ឋលែងទៅលេងនៅក្រុងព្រះសីហនុ ? សម្ដេចក្រឡាហោម ស ខេង បញ្ជាក់ថា «ដោយសាររឿងហ្នឹងហើយ បានជាយើងរៀបចំឲ្យមានក្រុម ការងារទៅ ដើម្បីជួយបញ្ហាអស់ហ្នឹង ។ ប៉ុន្ដែខ្ញុំជឿថា ប្រជាជនមួយចំនួនទេ ឯប្រជាជនភាគីច្រើនមិនទាន់មានអីដែរទេ ។ មួយចំនួនគាត់បារម្ភ ដោយសារគាត់បារម្ភហ្នឹងហើយ បានជាយើងយកចិត្តទុកដាក់លើបញ្ហាហ្នឹង ។
សូមបញ្ជាក់ថា ខេត្តព្រះសីហនុនាពេលខាងមុខនឹងក្លាយជាទីក្រុងដែលពោរពេញទៅដោយការអភិវឌ្ឍ ដូចរាជធានីភ្នំពេញនាពេលបច្ចុប្បន្ននេះដែរ ។ គេសង្កេតឃើញថា កាលពីពេលថ្មីៗកន្លងមក នៅក្នុងខេត្តព្រះសីហនុមានបញ្ហាកើតឡើងជាហូរហែ ភាគច្រើនបណ្តាមកពីជនបរទេស ក្នុងនោះជនជាតិចិនភាគច្រើន ។
ខេត្តព្រះសីហនុបច្ចុប្បន្ន ក្លាយជាតំបន់កំពុងអភិវឌ្ឍន៍ និងវិនិយោគយ៉ាងខ្លាំងក្លា ដែលភាគច្រើនវិនិយោគដោយជនជាតិចិន ហើយក៏មានជនជាតិចិនមួយចំនួនបានបង្កបញ្ហាឥតឈប់ឈរ ធ្វើឲ្យប្រជាពលរដ្ឋដែលទៅកម្សាន្តនៅខេត្តព្រះសីហនុមានការភ័យខ្លាច ទើបក្រសួងមហាផ្ទៃបង្កើតក្រុមការងារ ដើម្បីដោះស្រាយបញ្ហានានានៅខេត្តមួយនេះ ៕
ចែករំលែកព័តមាននេះ