ខេត្តប៉ៃលិន ៖ បុរសម្នាក់រងរបួសក្បាលផ្នែកខាងឆ្វេងធ្ងន់ធ្ងរ សន្លប់ស្តូកស្តឹងនៅនឹងកន្លែង ត្រូវបានគេដឹកបញ្ជូនទៅសង្គ្រោះនៅមន្ទីរពេទ្យបង្អែកខេត្តប៉ៃលិន ខណៈសង្ស័យស្រវឹងបើកម៉ូតូទៅបុកនឹងរង្វង់មូលពេញទំហឹង ។
ហេតុការណ៍នេះបានកើតឡើងកាលពីវេលម៉ោង១និង៣៩នាទីរំលងអធ្រាត្រឈានចូលថ្ងៃទី១៨ ខែតុលា ឆ្នាំ២០១៨ ស្ថិតនៅខាងលិចរង្វង់មូលស្រុកសាលាក្រៅ ក្នុងភូមិអូរឫស្សីលើ ឃុំអូរអណ្តូង ស្រុកសាលាក្រៅ ខេត្តប៉ៃលិន ។
ប្រភពព័ត៌មានបានឱ្យដឹងថា ជនរងគ្រោះ ឈ្មោះ ម៉ី រុម ភេទប្រុស រស់នៅភូមិទំនប់ ឃុំស្ទឹងត្រង់ ស្រុកសាលាក្រៅ ខេត្តប៉ៃលិន រងរបួសក្បាលផ្នែកខាងឆ្វេងធ្ងន់ធ្ងរ ជាអ្នកបើកបរម៉ូតូម៉ាក វ៉េវ ពណ៌ក្រហម ពាក់ស្លាកលេខ កំពង់ឆ្នាំង ១B-៩៩៤១ រងការខូចខាតយ៉ាងដំណំ ។
ប្រភពបន្តទៀតថា មុនពេលកើតហេតុ គេឃើញបុរសរងគ្រោះខាងលើបើកបរម៉ូតូក្នុងល្បឿនលឿន ក្នុងទិសដៅពីជើងទៅត្បូង លុះមកដល់ត្រង់កន្លែងរង្វង់មូល សង្ស័យស្រវឹងហើយមើលអ្វី មិនឃើញ ក៏បុករង្វង់មូល បណ្តាលឱ្យរងរបួសធ្ងន់សន្លប់ស្តូកស្តឹងតែម្តង ចំណែកម៉ូតូបានរងការខូចខាតយ៉ាងដំណំ។
ក្រោយពេលកើតហេតុ អ្នករងរបួសត្រូវគេបញ្ចូនទៅសង្គ្រោះមន្ទីពេទ្យបង្អែកខេត្ត ចំណែកម៉ូតូ ត្រូវបានយកទៅរក្សាទុកនៅក្នុងអធិការដ្ឋាននគរបាលស្រុកសាលាក្រៅ ដើម្បីរង់ចាំគ្រួសារសាច់ញាតិមកទទួល
យកទៅវិញ ៕
ចែករំលែកព័តមាននេះ