ប្រទេសរុស្ស៊ី ៖ បើតាមអាជ្ញាធរបានអះអាងឱ្យដឹងថា សិស្សសាលាម្នាក់អាយុ១៨ឆ្នាំ បានបាញ់ប្រហារក្នុងសាលាបច្ចេកទេសមួយដែលគេរៀន កាលពីថ្ងៃទី១៧ ខែតុលា ឆ្នាំ២០១៨ នៅទីក្រុង KERTCT…
ប្រទេសរុស្ស៊ី ៖ បើតាមអាជ្ញាធរបានអះអាងឱ្យដឹងថា សិស្សសាលាម្នាក់អាយុ១៨ឆ្នាំ បានបាញ់ប្រហារក្នុងសាលាបច្ចេកទេសមួយដែលគេរៀន កាលពីថ្ងៃទី១៧ ខែតុលា ឆ្នាំ២០១៨ នៅទីក្រុង KERTCT តំបន់គ្រីមេ ដោយសម្លាប់មនុស្ស១៩នាក់មុនពេលគេសម្លាប់ខ្លួនឯង។
ការវាយប្រហារនោះអមដោយការផ្ទុះមួយនៅខាងក្នុងអគារ បានកើតមានក្នុងទីក្រុងនោះនៃតំបន់គ្រីមេ ដែលរុស្ស៊ីយកពីអ៊ុយក្រែន បញ្ចូលក្នុងដែនដីខ្លួនកាលពីឆ្នាំ២០១៤។
មេដឹកនាំតំបន់គ្រីមេលោកស័រហ្គេយ អាក់ស៊ីយ៉ូណូវ បានថ្លែងតាមទូរទស្សន៍ ROSSIYA 24 ថា ខ្មាន់កាំភ្លើងបានបាញ់សម្លាប់ខ្លួន។ គេជាសិស្សឆ្នាំទី៤ នៃសាលាបច្ចេកទេសនោះ។ ហើយសាកសពរបស់គេត្រូវបានរកឃើញក្នុងបណ្ណាល័យមួយ។ រូបគេពុំធ្លាប់ឆ្លងកាត់ការកាត់ទោសណាមួយឡើយ។
យោងតាមក្រសួងសុខាភិបាលថា តុល្យការបណ្ដោះអាសន្ន ការវាយប្រហារនេះបណ្ដាលឲ្យមនុស្សស្លាប់១៩នាក់ តែគេពុំបានបញ្ជាក់ឡើយថា តើខ្មាន់កាំភ្លើងរាប់បញ្ចូលក្នុងចំណោមអ្នកស្លាប់ទាំងនេះដែរឬយ៉ាងណាឡើយ?
គណៈកម្មាធិការស៊ើបអង្កេតក៏បញ្ជាក់ដែរថា ការពិនិត្យដំបូងលើបណ្ដាសាកសពបញ្ជាក់ថា ជនរងគ្រោះទាំងអស់សុទ្ធតែស្លាប់ដោយត្រូវគ្រាប់កាំភ្លើង។ ហើយគណៈកម្មាធិការនោះដែលទទួលបន្ទុកស៊ើបអង្កេតលើរឿងឧក្រិដ្ឋធំៗនៅរុស្ស៊ីក៏បានលាតត្រដាងថា ខ្មាន់កាំភ្លើងមានឈ្មោះថា វ្ល៉ាឌីស្លាវ រ៉ូស្លីយ៉ាកូវ អាយុ១៨ឆ្នាំ។
តាមរូបភាពផ្សាយតាមបណ្ដាញសង្គមហើយនិងរូបភាព មកពីកាមេរ៉ាត្រួតពិនិត្យរបស់សាលាបង្ហាញយុវជនរូបនេះកាត់សក់ខ្លី ពាក់អាវយឺតពណ៌ស និងស្លៀកខោជើងវែងពណ៌ខ្មៅ ស្ថិតនៅលើជណ្ដើរមួយកាន់កាំភ្លើង១ដើមនៅដៃ។
នាយកសាលាគូសបញ្ជាក់តាមទូរទស្សន៍ថា នោះពុំមែនជាអំពើភេរវកម្មមួយឡើយ តែជាការសម្លាប់មនុស្សយ៉ាងរង្គាលដោយមនុស្សតែម្នាក់។ យោងតាមអ្នកទទួលខុសត្រូវម្នាក់នៃកងកម្លាំងសន្តិសុខថា ខ្មាន់កាំភ្លើងទទួលបានសិទ្ធិស្របច្បាប់ក្នុងការកាន់កាំភ្លើងកាលពីមួយខែមុន ហើយរូបគេឆ្លងកាត់ការពិនិត្យខាងចិត្តសាស្ត្រចាំបាច់នានា។
ពួកអ្នកស៊ើបអង្កេតប្រកាសថា បានរកឃើញគ្រឿងផ្ទុះ២ ដោយមួយគ្រាប់ផ្ទុករបស់ធ្វើពីដែកពេញផ្ទុះក្នុងកង់ទីនសាលា ហើយមួយគ្រាប់ទៀតរកឃើញក្នុងចំណោមឥវ៉ាន់ផ្ទាល់ខ្លួនរបស់ខ្មាន់កាំភ្លើងរួចត្រូវបានយកចេញ។
ជាន់ទីមួយនៃអគាររងការខូចខាតច្រើន ព្រោះមានការផ្ទុះ។ សាលាពហុបច្ចេកទេសក្រុង KERTCT នេះជាសាលាទទួលក្មេងជំទង់ដែលនិយមចូលចិត្តរៀនខាងបច្ចេកទេស៕ វីដេអូឃ្លីបដកស្រង់ចេញពី ៖ Sputnik France Play
ចែករំលែកព័តមាននេះ