រាជធានីភ្នំពេញ ៖ រថយន្ដដឹកជីកសិកម្មមួយគ្រឿងដឹកធ្ងន់លើសចំណុះបើកឡើងស្ពានអាកាសក្បាលថ្នល់មិនរួចក៏រអិលថយក្រោយជាន់ហ្វ្រាំងមិនជាប់បណ្តាលឲ្យរអិលទៅបុកនឹងរបាំងថ្មពុះចែកទ្រូងផ្លូវស្ពានខូចខាតអស់ចំនួនប្រាំ៥ផ្ទាំង ចំណែករថយន្តខូចខាតមួយកំណាត់ផ្នែកខាងក្រោយ។ ហេតុការណ៍ខាងលើនេះដែលបានកើតឡើងកាលពីវេលាម៉ោង១១យប់ថ្ងៃទី១៨ ខែតុលា នៅលើស្ពានអាកាសក្បាលថ្នល់ខាងជើង សង្កាត់ចាក់អង្រែលើ ខណ្ឌមានជ័យ។
រថយន្តបង្កជាប្រភេទរថយន្តដឹកទំនិញ ម៉ាក ហ៊ីយ៉ាន់ដាយ ពណ៌ខៀវ ពាក់ស្លាកលេខ ព្រះសីហនុ ៣A-០៨៨២ នៅក្នុងរថយន្តនោះមានដឹកជីកសិកម្មចំនួន៣០០បេ ស្មើនឹង១៥តោន ដឹកចេញពីក្រុមហ៊ុនយីតាក់គ្រុបលក់ជី នឹងថ្នាំកសិកម្មគ្រប់ប្រភេទ។
ប្រភពព័ត៌មានពីអ្នកធ្វើដំណើរឆ្លងកាត់ទីនោះ និងបានឃើញហេតុការណ៍ផ្ទាល់ បានប្រាប់អោយដឹងថា មុនកើតហេតុគឺរថយន្តបង្កបើកតាមផ្លូវជាតិលេខ២ ក្នុងទិសដៅពីជើងទៅត្បូងឡើងស្ពានអាកាសក្បាលថ្នល់ ខណៈមកដល់ពាក់កណ្ដាលស្ពានដោយសារតែរថយន្តដឹកធ្ងន់ពេកឡើងមិនរួចក៏រអិលថយក្រោយមកក្រោមវិញ ជាន់ហ្វ្រាំងមិនជាប់ ទើបរេចង្កូតទៅបុកនឹងរបាំងថ្មពុះចែកទ្រូងផ្លូវស្ពានបាក់ដួលរលំខូចខាតអស់ចំនួន៥ផ្ទាំង កល់រថយន្តជាប់មកក្រោយលែងរួច ។
ហេតុការណ៍ខាងលើនេះអ្នកធ្វើដំណើរពីក្រោយរថយន្ដនោះភ័យព្រលឹងចុងសក់គ្រប់គ្នា តែសំណាងល្អក្នុងហេតុការណ៍នេះមិនបានបង្កអោយនរណាម្នាក់រងរបួសឡើយ គឺខូចខាត តែទ្រូងផ្លូវស្ពាននឹងរថយន្តបង្កតែប៉ុណ្ណោះ ភ្លាមៗបន្ទាប់ពីកើតហេតុ អ្នកបើកបររថយន្តបង្កបានទុករថយន្តចោល រត់គេចខ្លួនបាត់ស្រមោល បន្សល់ទុកតែរថយន្តនៅកន្លែងកើតហេតុ ទុកអោយសមត្ថកិច្ចវាស់វែងតាមជំនាញតែប៉ុណ្ណោះ។
ក្រោយកើតហេតុ រថយន្ដបង្កខាងលើត្រូវបានខាងកម្លាំងសមត្ថកិច្ចជំនាញចរាចរណ៍ ធ្វើការវាស់វែងនឹងបានយករថយន្តនោះទៅរក្សាទុកនៅការិយាល័យនរគរបាលចរាចរណ៍ផ្លូវគោកនៃស្នងការដ្ធាននរគរបាលរាជ
ធានីភ្នំពេញ រង់ចាំដោះស្រាយនៅពេលក្រោយតាមផ្លូវច្បាប់ ៕
ចែករំលែកព័តមាននេះ