ខេត្តកំពង់ស្ពឺ ៖ ម៉ូតូ១គ្រឿងបើកបរដោយបុរសជាប្តីដឹកប្រពន្ធម្នាក់ និងកូនប្រុសម្នាក់ត្រូវរថយន្ត១គ្រឿងបើកបុកចំពីមុខពេញទំហឹង បណ្តាលឲ្យឪពុក និងកូនស្លាប់ភ្លាមៗ ចំណែកស្ត្រីជាប្រពន្ធរបួសធ្ងន់ ។
គ្រោះថ្នាក់ចរាចរណ៍ដ៏រន្ធត់នេះបានកើតឡើងនៅម៉ោង៦និង២០នាទីល្ងាច ថ្ងៃទី១៨ ខែតុលា ឆ្នាំ២០១៨ លើផ្លូវជាតិលេខ៤៤ ស្ថិតក្នុងភូមិអូរគរគី ឃុំតាំងក្រូច ស្រុកសំរោងទង ។
ជនរងគ្រោះទី១-ឈ្មោះប៉ាង ខេង ភេទប្រុស អាយុ៣៧ឆ្នាំ(ស្លាប់) ទី២- ឈ្មោះប៉ាង រក្សា ភេទប្រុស អាយុ៧ឆ្នាំ ត្រូវជាកូន(ស្លាប់) ទី៣-ឈ្មោះមាស ចន្ឋី ភេទស្រី អាយុ៣៥ឆ្នាំ (របួសធ្ងន់) ។ ពួកគេទាំង៣នាក់ប្តី ប្រពន្ធ និងកូនរស់នៅភូមិខ្វាន ឃុំខ្ទុំក្រាំង ស្រុកសំរោងទង ខេត្តកំពង់ស្ពឺ។
ចំណែកអ្នកបង្កមិនស្គាល់អត្តសញ្ញាណ ក្រោយបង្កហេតុបានរត់ចោលរថយន្ត ។
ប្រភពព័ត៌មានពីសាក្សីនៅកន្លែងកើតហេតុ បានឆ្លើយប្រាប់សមត្ថកិច្ចឲ្យដឹងថា នៅមុនពេលកើតហេតុគេបានឃើញរថយន្ត១គ្រឿងម៉ាកតាកូម៉ា ពណ៌ក្រហម គ្មានស្លាកលេខ បើកតាមបណ្តោយផ្លូវជាតិលេខ៤៤ ទិសដៅពីលិចទៅកើត ។ លុះបើកមកដល់ចន្លោះគីឡូម៉ែត្រលេខ១២-១៣ ស្ថិតក្នុងភូមិកើតហេតុខាងលើបានរេចង្កូតបុកម៉ូតូ១គ្រឿង ម៉ាកហុងដាវ៉េវ ពណ៌ខៀវលាយខ្មៅ គ្មានស្លាកលេខ បើកបរដោយបុរសជាប្តី មានដឹកប្រពន្ធម្នាក់ និងកូនតូចម្នាក់ ដែលបើកបញ្ច្រាសទិសគ្នា បណ្តាលឲ្យឪពុក និងកូនស្លាប់ភ្លាមៗនៅកន្លែងកើតហេតុ និងប្រពន្ធ រងរបួសធ្ងន់ ។
ក្រោយកើតហេតុសមត្ថកិច្ចមូលដ្ឋានបានអន្តរាគមន៍បញ្ជូនស្ត្រីរងគ្រោះទៅគ្លីនិកឯកជន រួចស្រាវជ្រាវរកក្រុមគ្រួសារឲ្យមកទទួលយកសពឪពុក និងកូនប្រុសទៅគេហដ្ឋានដើម្បីរៀបចំធ្វើបុណ្យតាមប្រពៃណី ។ ចំណែកយានយន្តទាំង២គ្រឿង សមត្ថកិច្ច យកមករក្សាទុកនៅអធិការដ្ឋាននគរបាលស្រុកសំរោងទង ស្រាវជ្រាវរកអ្នកបង្កហេតុ ដោះស្រាយតាមច្បាប់ ។
ប៉ូលិសចរាចរណ៍បានបញ្ជាក់ថា ជនរងគ្រោះមានពាក់មួកសុវត្ថិភាព ហើយម៉ូតូមានបំពាក់កញ្ចក់មើលក្រោយត្រឹមត្រូវ ។ គ្រោះថ្នាក់ចរាចរណ៍ខាងលើនេះ បណ្តាលមកពីម្ចាស់រថយន្ត បើកបរដោយល្បឿនលឿន ពេលអាសន្នបាត់បង់ម្ចាស់ការបង្កគ្រោះថ្នាក់ដល់អ្នកដទៃ ហើយមិនទទួលខុសត្រូវ ៕
ចែករំលែកព័តមាននេះ