រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីបញ្ជាក់ឲ្យដឹងថា កម្ពុជានឹងរៀបចំធ្វើជាម្ចាស់ផ្ទះនៃកិច្ចប្រជុំអាស៊ីអឺរ៉ុបលើកទី១៣ នៅឆ្នាំ២០២០ខាងមុខនេះ ។
ក្នុងជំនួបពិភាក្សាទ្វេភាគីជាមួយនាយករដ្ឋមន្ត្រីចិនលោកលី ខឺឈាង (Li Keqiang) នាយករដ្ឋមន្ត្រីនៃសាធារណរដ្ឋប្រជាមានិតចិនសម្តេចតេជោនាយករដ្ឋ មន្ត្រីបានជម្រាបជូនលោកនាយករដ្ឋមន្ត្រីចិនពីការដែលកម្ពុជានឹងធ្វើជាម្ចាស់ផ្ទះនៃកិច្ចប្រជុំកំពូលអាស៊ីអឺរ៉ុបលើកទី១៣ ក្នុងឆ្នាំ២០២០ខាងមុខដែលតាមរយៈនោះសម្តេចសូមគោរពអញ្ជើញនាយករដ្ឋមន្ត្រីចិនចូល រួមក្នុងកិច្ចប្រជុំកំពូលនោះដែលកម្ពុជាធ្វើជាម្ចាស់ផ្ទះ ។
យោងតាមបណ្តាញសង្គមរបស់សម្តេចតេជោនៅថ្ងៃទី១៩ តុលា ឆ្នាំ២០១៨នេះ បានឲ្យដឹងថាក្នុងជំនួបពិភាក្សាគ្នានោះដែរភាគីទាំងពីរបានឯកភាពគ្នាក្នុងការផ្លាស់ប្តូរនូវមតិជុំវិញកិច្ចសហប្រតិបត្តិការទ្វេភាគី និងបញ្ហាតំបន់ និងអន្តរជាតិ ពិសេសលើទំនាក់ទំនងចិន អាស៊ាន ក្នុងនោះប្រមុខរដ្ឋាភិបាលនៃប្រទេសទាំងពីរបានធ្វើការពិភាក្សាពីការនាំអង្ករពីកម្ពុជាទៅកាន់ប្រទេសចិនដែលកន្លងមកចិនបានផ្តល់កូតានាំចេញអង្ករពីកម្ពុជាទៅកាន់ប្រទេសចិនចំនួន៣០ម៉ឺនតោន ។
លោកនាយករដ្ឋមន្ត្រីចិនបានមានប្រសាសន៍ថា ចិនតែងតែគាំទ្រប្រទេសកម្ពុជា ពិសេសការគាំទ្រដល់កិច្ចប្រជុំកំពូលអាស៊ី អឺរ៉ុប លើកទី១៣ ក្នុងឆ្នាំ២០២០ខាងមុខ ដែលកម្ពុជាធ្វើជាម្ចាស់ផ្ទះ។ លោកបន្តថា ចិននឹងបន្តគាំទ្រដល់ការនាំចូលផលិតផលពីប្រទេសកម្ពុជាទៅកាន់ប្រទេសចិនជាបន្តបន្ទាប់ទៀត ។ ក្នុងជំនួបពិភាក្សាគ្នានោះដែរលោក Li Keqiang បានមានប្រសាសន៍អបអរសាទរជូនចំពោះសម្តេចតេជោ ហ៊ុន សែន ដែលបានជាប់ឆ្នោតជានាយករដ្ឋមន្ត្រីសារជាថ្មីម្តងទៀត ។
លោកមានប្រសាសន៍បន្តថា លោកចង់ឃើញទំនាក់ទំនងកិច្ចសហប្រតិបត្តិការនៃប្រទេសទាំងពីរកម្ពុជា ចិន កាន់តែបោះជំហានទៅមុខខ្លាំងក្លាឡើងថែមទៀត ។ ជាមួយគ្នានោះដែរ សម្តេចតេជោបានរំលឹកជូនលោកនាយករដ្ឋមន្ត្រីចិនអំពីដំណើរនៃការ អញ្ជើញបំពេញទស្សនកិច្ចផ្លូវការ និងការដឹកនាំកិច្ចប្រជុំកំពូលមេគង្គឡាងឆាងនៅកម្ពុជា កាលពីពេលកន្លងមកផងដែរ ៕
ចែករំលែកព័តមាននេះ