រាជធានីភ្នំពេញ ៖ ក្នុងពិធីសំណេះសំណាលជាមួយមន្ត្រីរាជការក្រោមឱវាទរដ្ឋបាលខណ្ឌឫស្សីកែវ នាព្រឹកថ្ងៃទី១៨ តុលានេះ លោក ឃួង ស្រេង អភិបាលរាជធានីភ្នំពេញ បានជំរុញឲ្យអាជ្ញាធរមាន…
រាជធានីភ្នំពេញ ៖ ក្នុងពិធីសំណេះសំណាលជាមួយមន្ត្រីរាជការក្រោមឱវាទរដ្ឋបាលខណ្ឌឫស្សីកែវ នាព្រឹកថ្ងៃទី១៨ តុលានេះ លោក ឃួង ស្រេង អភិបាលរាជធានីភ្នំពេញ បានជំរុញឲ្យអាជ្ញាធរមាន សមត្ថកិច្ចទាំងអស់ជាពិសេស អាជ្ញាធរខណ្ឌឫស្សីកែវ ត្រូវបង្កា ទប់ស្កាត់ បទល្មើសគ្រប់ប្រភេទ ការរៀបចំសណ្តាប់ធ្នាប់ និងការទប់ស្កាត់ជនអន្តោប្រវេសន៍ដែលរស់នៅតាមដងទន្លេសាប រួមនឹងការថែរក្សាបរិស្ថានទន្លេឲ្យបានល្អប្រសើរ។ លោក ឃួង ស្រេង បានថ្លែងថា គោលបំណងដែលលោក ទៅជួបបងប្អូនមន្ត្រីរបស់ខណ្ឌឫស្សីកែវនៅពេលនេះ គឺដើម្បីសួរសុខទុក្ខ មន្ត្រីរធ្វើការងារបានអ្វីខ្លះ ហើយនៅខ្វះចំណុចណាខ្លះដើម្បីបំពេញបន្ថែម ធ្វើយ៉ាងណាបម្រើ ប្រជាពលរដ្ឋឲ្យកាន់តែល្អប្រសើរ។
លោកបានកោតសរសើរចំពោះរដ្ឋបាលខណ្ឌឫស្សីកែវ រួមទាំងកម្លាំងមានសមត្ថកិច្ចទាំងអស់ដែលបានយកអស់កម្លាំងកាយចិត្តក្នុងកិច្ចការពារសន្តិសុខ សណ្តាប់ធ្នាប់ រួមនឹងការផ្តល់សេវាជូនប្រជាពលរដ្ឋបាលល្អប្រសើរ រហូតទទួលបានស្នាដៃជាច្រើន។ ប៉ុន្តែ ខណ្ឌឫស្សីកែវក៏មានបញ្ហាប្រឈម ដែលត្រូវអនុវត្តបន្ត ក្នុងនោះមានបញ្ហាសណ្តាប់ធា្នប់ មិនទាន់រៀបចំ បានល្អប្រសើរនៅឡើយ ដូចជាប្រជាពលរដ្ឋមិនទាន់គោរពច្បាប់ចរាចរណ៍ បញ្ហាគ្រឿងញៀន នៅតែកើតមាន ការចុះកិច្ចសន្យាជាមួយក្លឹបកម្សាន្តនានាក៏នៅមិនទាន់បានគ្រប់ជ្រុងជ្រោយជាដើម។ លោក ឃួង ស្រេង បានលើកឡើងថា នៅភ្នំពេញមានកន្លែងសប្បាយភាព២.៦៤២ទីតាំង ក្នុងនោះសម្រាប់ខណ្ឌឫស្សីកែវ ក៏មានក្លឹបកម្សាន្ត កន្លែងសប្បាយភាពច្រើនដែរ ដែលអាជ្ញាធរ ត្រូវណែនាំឲ្យម្ចាស់ក្លឹបកម្សាន្តទាំងអស់នោះបំពេញបែបបទច្បាប់ឲ្យបានត្រឹមត្រូវ។
ចំណែកបញ្ហាគ្រឿងញៀន បើទីតាំងណាមានបទល្មើសគ្រឿងញៀន ទីតាំងនោះត្រូវតែបិទចោល ហើយម្ចាស់ទីតាំងក៏ត្រូវប្រឈមនឹងការមានទោសទណ្ឌថែមទៀត។ លោក ឃួង ស្រេង ក៏បានជំរុញឲ្យមានការបង្ការទប់ស្កាត់បទល្មើស លួច ឆក់ ប្លន់គ្រប់ប្រភេទ ដើម្បីការពារសន្តិសុខ និងសុវត្ថិភាពជូនប្រជាពលរដ្ឋ។ ព្រោះសន្តិសុខនេះ ជាតម្រូវការចាំបាច់ និងចង់បានរបស់មនុស្សគ្រប់គ្នា មិនថា អ្នកមាន និងអ្នកក្រនោះទេ។ ក្នុងឱកាសនោះ លោកឃួង ស្រេង បានដាក់ចេញនូវផែនការ ចំនួន១៣ចំណុចបន្ថែមទៀត ដើម្បីឲ្យអាជ្ញាធរខណ្ឌឫស្សីកែវ អនុវត្តបន្ត ក្នុងនោះ មានមិនអនុញ្ញាតឲ្យផ្លូវជាតិលេខ៥ ចតយានយន្តនៅលើទ្រូវផ្លូវ ធ្វើឲ្យបាត់បង់សណ្តាប់ធ្នាប់ និងធ្វើឲ្យកកស្ទះចរាចរណ៍ ការរឹតបណ្តឹងច្បាប់ចរាចរណ៍ ដោយត្រូវកោះហៅអ្នកពាក់ព័ន្ធមកប្រជុំ ដើម្បីមានវិធានការលើបញ្ហានេះ យកចិត្តទុកដាក់លើបញ្ហា លូស្ទះ និងបញ្ហាកកស្ទះសំរាមជាដើម។
លោកបញ្ជាក់ថា ដាច់ខែនេះ រដ្ឋបាលរាជធានីភ្នំពេញនឹងបើកយុទ្ធនាការជួសជុលផ្លូវខូច តែសុំឲ្យអាជ្ញាធរខណ្ឌ សង្កាត់ត្រូវចុះមើល ក្នុងមូលដ្ឋានរបស់ខ្លួនតើមានផ្លូវខូចប៉ុន្មាន និងខូចមានទំហំណា ? ត្រូវចុះពិនិត្យមើលចំពោះការសាងសង់រោងបុណ្យរោងការនៅលើទ្រូងផ្លូវ គឺអាចឲ្យធ្វើតែលើចិញ្ចើមផ្លូវ និងលើទ្រូវផ្លូវតែមួយប្រឡោះបាន មិនឲ្យបិទផ្លូវជាដាច់ខាត ដែលការងារនេះអាជ្ញាធរខណ្ឌសង្កាត់ត្រូវធ្វើការណែនាំ។ ព្រោះវាធ្វើឲ្យកកស្ទះ និងគ្រោះថ្នាក់ចរាចរណ៍ផងដែរ។ ការងារពិនិត្យអាវុធជាតិផ្ទុះ និងការអនុវត្តច្បាប់ចរាចរណ៍ផ្លូវគោក ត្រូវតែធ្វើ ទោះជាក្នុងបុរីក៏ដោយ និងត្រូវចល័តគោលដៅជានិច្ចកុំនៅមួយកន្លែង។
លោក ឃួង ស្រេង បានបញ្ជាក់ថា បញ្ហាអន្តោប្រវេសន៍នៅតាមដងទន្លេសាប ពិសេស ការចិញ្ចឹមត្រីដែលធ្វើឲ្យខូចបរិស្ថាន និងបានធ្វើឲ្យខូចខាតដល់វិស័យទេសចរណ៍នោះ អាជ្ញាធរត្រូវសហការ ជាមួយសមាគមន៍ជនជាតិ វៀតណាម និងឥស្លាមជាដើម ដើម្បីរឹតបណ្តឹងច្បាប់អន្តោប្រវេសន៍ ថាតើពួកគាត់មានច្បាប់រស់នៅ និងរកស៊ីនៅស្រុកខ្មែរត្រឹមត្រូវឬទេ ? ត្រូវរួមគ្នាធ្វើការងារនេះទាំងអស់គ្នា ដើម្បីបម្រើផលប្រយោជន៍ជាតិ និងប្រជាពលរដ្ឋ។ ក្នុងពិធីខាងលើនោះ បានអនុញ្ញាតឲ្យមន្ត្រីរដ្ឋបាលខណ្ឌ និងសង្កាត់ បានលើកឡើងពីកង្វល់ បញ្ហាប្រឈម និងចំណុចខ្វះខាតនានាដូចជា មានការផ្តល់សេវាជូនប្រជាពលរដ្ឋ បញ្ហាលូ សំរាម ការកសាងស្នាក់ការប៉ុស្តិ៍ សង្កាត់ទើបបង្កើតថ្មី ជាដើម។ ដើម្បីរិះរកវិធីបម្រើប្រជាពលរដ្ឋ ឲ្យកាន់តែល្អប្រសើរជាងមុន និងសុំឲ្យអាជ្ញាធររាជធានីភ្នំពេញ ជួយសម្រួលផងដែរ៕
ចែករំលែកព័តមាននេះ