យោងតាមសារព័ត៌មានបានឲ្យដឹងថា ស្មាតហ្វូនអាចបត់បានរបស់ Samsung អាចអនុញ្ញាតឲ្យអ្នកប្រើប្រាស់ប្រើវាជាថេប្លេតបាន ដែលអាចបើកដំណើរការកម្មវិធីច្រើនក្នុងពេលតែមួយ និងមានស្គ្រីនធំ ។ ប៉ុន្តែស្មាតហ្វូនថ្មីនេះ ប្រៀបបានជាការសាកល្បងមួយដើម្បីស្វែងយល់ថាតើអ្នកតាមដាន និងទីផ្សារ នឹងឆ្លើយតបយ៉ាងដូចម្តេច ។
លោក DJ Koh ប្រធានផ្នែកទូរស័ព្ទរបស់ Samsung បាននិយាយកាលពីថ្ងៃសុក្រសប្ដាហ៍មុនថា ៖« ពេលដែលពួកយើងចាប់ផ្តើមលក់ស្មាតហ្វូនដែលអាចបត់បែនបាន ទីផ្សារអាចនឹងតូចចង្អៀត ប៉ុន្តែវានឹងរីកលូតលាស់កាន់តែធំ ។ ខ្ញុំជឿជាក់ថា ពួកយើងត្រូវការទូរស័ព្ទដែលអាចបត់បែនបាន »។
នៅក្នុងសេចក្តីរាយការណ៍ដែលយោងទៅតាមបទសម្ភាស៍ជាមួយលោក Koh បានឲ្យដឹងថា ទូរស័ព្ទដែលអាចបត់បែនបាននេះ នឹងត្រូវលក់ទូទាំងពិពភលោក ហើយនឹងមិនបាត់ខ្លួនទៅវិញក្នុងរយៈពេល៦ខែ បន្ទាប់ពីការចេញលក់ឡើយ ។
ដោយមានការផ្តោតសំខាន់លើនិន្នាការស្គ្រីនទូរស័ព្ទធំៗក្នុងទីផ្សារស្មាតហ្វូន សេចក្តីរាយការណ៍ខាងលើបានអះអាងថា ទូរស័ព្ទថ្មីរបស់ Samsung អាចមានស្គ្រីនដែលមានទំហំលើសពី៦,៥អីញទៅទៀត ។
លោក Koh បានបញ្ជាក់ថា ទូរស័ព្ទដែលអាចបត់បែនបាន នឹងត្រូវដាក់លក់នៅចុងឆ្នាំ២០១៨ ឬអាចនៅក្នុងអំឡុងខែវិច្ឆិកាខាងមុខនេះ ។
កាលពីក្នុងអំឡុងកម្មវិធីចេញលក់ Galaxy Note 9 នៅដើមខែនេះ លោក DJ Koh នាយកប្រតិបត្តិរបស់ Samsung បានប្រាប់ដល់សារព័ត៌មានថា ពួកគេនឹងមិនធ្វើឲ្យពិភពលោករង់ចាំយូរទេចំពោះការចេញលក់ស្មាតហ្វូននេះ ។
ចំណែកក្រុមហ៊ុនអេឡិចត្រូនិក Huawei របស់ប្រទេសចិនវិញ ក៏កំពុងតែត្រៀមខ្លួនក្នុងការចេញលក់ទូរស័ព្ទដែលអាចបត់បែនដំបូងនៅខែវិច្ឆិកាខាងមុខនេះផងដែរ ។
លោក Richard Yu នាយកប្រតិបត្តិរបស់ Huawei បានប្រាប់មកថា ក្រុមហ៊ុនលោកមាន គំរូស្មាតហ្វូនដែលអាចដំណើរការបានរួចជាស្រេចតាំងពីឆ្នាំ២០១៧មក ។
បច្ចុប្បន្ន ក្រុមហ៊ុនទាំងពីរកំពុងប្រជែងចេញលក់ស្មាតហ្វូនដែលអាចបត់បែនបាននេះ ឲ្យបានមុនគ្នាទៅវិញទៅមក តើព្រោះតែមូលហេតុអ្វី ? មានហេតុផលមួយចំនួនត្រូវបានគេរកឃើញពីការចង់យកឈ្នះចាញ់គ្នានេះ ។
-ទី១ គឺព្រោះតែការចូលក្នុងទីផ្សារមុនគេ នឹងអនុញ្ញាតឲ្យក្រុមហ៊ុននេះតាំងខ្លួនជាអ្នកដឹកនាំក្នុងបច្ចេកវិទ្យាទូរស័ព្ទដែលអាចបត់បែនបានមុនគេជាប្រវត្តិសាស្ត្រ ។ វាមានគុណតម្លៃទាំងសម្រាប់ការផ្សព្វផ្សាយ និងគោលជំហរក្នុងវិស័យនេះ ព្រោះក្រុមហ៊ុនផលិតទូរស័ព្ទដទៃអាចនឹងចង់ទិញការអនុញ្ញាតឲ្យប្រើប្រាស់បច្ចេកវិទ្យារបស់អ្នកដែលនាំមុខនេះ ។
-ទី២ គឺព្រោះតែស្មាតហ្វូនដែលអាចបត់បែនបាន ប្រៀបបានជាទីផ្សារស្មាតហ្វូនប្រភេទថ្មីមួយទៀតដែលអាចលូតលាស់បានច្រើន ។ Huawei និង Samsung ផ្តោតសំខាន់ទៅលើផ្នែកស្មាតហ្វូនកម្រិតខ្ពស់ ហើយការក្លាយជាក្រុមហ៊ុនទីមួយដែលផលិតស្មាតហ្វូន អាចបត់បែនបានកម្រិតខ្ពស់ អាចជួយដល់ពួកគេក្នុងការទាក់ទាញអតិថិជនពីដៃគូប្រកួតប្រជែងដូចជា Apple ជាដើម ។
-ទី៣ គឺវាផ្តល់ជាឱកាសដ៏ល្អក្នុងការផ្លាស់ប្តូររូបរាង និងការប្រើប្រាស់ស្មាតហ្វូន ដោយស្មាតហ្វូនដែលអាចបត់បែនបាន អាចផ្លាស់ប្តូរទម្លាប់របស់អ្នកប្រើប្រាស់។ ប្រាកដណាស់កម្មវិធីលើទូរស័ព្ទទាំងនេះ អាចទាញអត្ថប្រយោជន៍កាន់តែច្រើនពីបច្ចេកវិទ្យា3D និងVirtual reality (VR) ឬ Augmented reality (AR) ជាដើម ។
យោងតាមរបាយការណ៍របស់ក្រុមហ៊ុនស្រាវជ្រាវGartner បានឲ្យដឹងថា Huawei បានដណ្តើមតំណែងពីApple ជាក្រុមហ៊ុនលក់ស្មាតហ្វូនបានច្រើនជាងគេលេខ២ កាលពីត្រីមាសទី២នាឆ្នាំ២០១៨កន្លងមក ជាមួយនឹងចំនួនលក់ប្រមាណ៤៩លានគ្រឿង ខណៈដែល Apple ត្រូវបានរុញដល់ចំណាត់ថ្នាក់លេខ៣វិញ ជាមួយនឹងចំនួនលក់បាន៤៤លានគ្រឿង ។ ចំណែកឯ Samsung វិញ បានបន្តតំណែងជាក្រុមហ៊ុនលក់ស្មាតហ្វូនបានច្រើនជាងគេដដែល បើទោះចំនួនលក់បានធ្លាក់ចុះ១២,៧%កាលពីត្រីមាសទី២ក៏ដោយ ៕
ចែករំលែកព័តមាននេះ