រាជធានីភ្នំពេញ៖ បេក្ខនារីកម្ពុជាជាប់ក្នុងលំដាប់ទី១ចំពោះការគ្រងឈុតតំណាងជាតិក្នុងវគ្គដំបូងនៃការប្រកួតMiss Grand International ។ ហាក់ដូចជាច្រណែននឹងរឿងនេះ ក្រុមវប្បធម៌ថៃមួយក្រុមបែរជាថាឈុតសម្លៀកបំពាក់ដែលគ្រងដោយកញ្ញាឌី លីកា នោះជាឈុតរបស់ជាតិគេទៅវិញ ។…
រាជធានីភ្នំពេញ៖ បេក្ខនារីកម្ពុជាជាប់ក្នុងលំដាប់ទី១ចំពោះការគ្រងឈុតតំណាងជាតិក្នុងវគ្គដំបូងនៃការប្រកួតMiss Grand International ។ ហាក់ដូចជាច្រណែននឹងរឿងនេះ ក្រុមវប្បធម៌ថៃមួយក្រុមបែរជាថាឈុតសម្លៀកបំពាក់ដែលគ្រងដោយកញ្ញាឌី លីកា នោះជាឈុតរបស់ជាតិគេទៅវិញ ។ លើសពីនេះថាជាឈុតសម្លៀកបំពាក់ថៃមានតាំងពី៥លានឆ្នាំមុន !
ឈុតសម័យចេនឡារបស់កម្ពុជានេះរចនាឡើង ដើម្បីរំឭកនឹកគុណ បុព្វបុរសខ្មែរដែលបានលះបង់ និងការពារថែរក្សាព្រះនគរខ្មែរឱ្យកូនខ្មែរបានរស់នៅ រំលឹកគុណដល់ភាពរីកចម្រើននៃអរិយធម៌ វប្បធម៌ខ្មែរដើមដ៏រុងរឿង និងភាពរួបរួមគ្នា ដោយគិតពីប្រយោជន៍រាស្ត្រ និងព្រះនគរខ្មែរជាធំ ។
ជាងនេះទៅទៀត គឺចង់បង្ហាញដល់កូនខ្មែរជំនាន់ក្រោយឱ្យចេះថែរក្សាការពារ ស្រាវជ្រាវអំពីដើមកំណើត និងអរិយធម៌ជាតិរបស់ខ្លួន ពិតៗ កុំឱ្យជនបរទេសមកកាឡៃបានថាយើងចម្លងពីគេបាននោះ ។
សម័យចេនឡា ជាសម័យកាលមួយនៃខឿនវប្បធម៌ដ៏ចំណាស់ និងសម្បូរបែប និងជាមរតកតំណសម្រាប់កម្ពុជាសម័យ ក្រោយៗទៀត ហើយបាននឹងបន្តមកដល់សម័យបច្ចុប្បន្ននេះ ពុំមែនមានត្រឹមតែសម័យអង្គរ ឬក្រោយអង្គរនោះឡើយ ។
ឈុត«ទេពីស្រីសួគ៌បវរឦសានបុរៈ» ដែលបេក្ខនារីកម្ពុជាគ្រងដ៏ស្រស់ប្រណីតត្រូវបានបញ្ចូលគ្នានូវទម្រង់នៃទេវធីតា និងទម្រង់នៃការគ្រងភូសាមាលានៃខត្តិយកញ្ញានាសម័យចេនឡា ដោយស្របតាមតឹកតាងដែលបានមកពីរូបចម្លាក់ និងចម្លាក់នៅតាមជញ្ជាំងប្រាសាទ ក៏ដូចតឹកតាងនានាបានមកពីកំណាយដែលជាមរតកដ៏មានតម្លៃពុំអាចកាត់ថ្លៃបាន ។ ឈុតនេះក្នុងដៃនៃ Miss Grand Cambodia 2018 កាន់កង្វេរដំរី បញ្ជាក់នូវការបន្តវេននៃអាណាចក្រភ្នំ បញ្ជាក់នូវភាពសម្បូណ៌រុងរឿង និងជាអាណាចក្រដែលសម្បូណ៌ដោយដំរី ។
កាលពីថ្ងៃទី១៦ តុលា អ្នកនាងខាត់ សុឃីមបានបញ្ចេញប្រតិកម្មក្នុងចំណោមប្រតិកម្មជាច្រើនទៀត ដោយនាងសរសេរលើហ្វេសប៊ុកថា «គិតទៅពួកអាអស់នេះពិតជាពូកែមែនវើយ អាវប្បធម៌ច្រណែនហ្នឹង ។ កាលគេរៀបប្រកួតគេផុសឈុតហ្នឹងងពួកវាមិនប្រកាច់ទើស មិនក្រកាច់ថាគេចម្លងទៅ ! ដល់តែគេប្រកួតឈ្នះសុទ្ធតែគេចម្លងពីពួកវា ហើយគេអត់គំនិតច្នៃប្រឌិតអត់មានម៉ូឌដូនតាគេមែន ពួកអាប្រេតវង្វេងទិសនេះ ! ហើយដូនតាវាអីក៏សាហាវម្ល៉េះ តាំងពី៥លានឆ្នាំមុន »។
ទោះបីទទួលលទ្ធផលល្អក្នុងវគ្គមុននេះក្តី បេក្ខនារីកម្ពុជានៅត្រូវការការគាំទ្រពីមហាជននាវគ្គបន្តទៀត ពិសេសមហាជនជាតិយើង ។
យោងតាមផេក Miss Grand International បានប្រកាសពីឈុតតំណាងជាតិចំនួន២០ដែលជាប់ពីការបោះឆ្នោតតាមរយៈហ្វេសប៊ុក និងការជ្រើសរើសរបស់គណៈកម្មការប្រកួត ។ ឈុតតំណាងជាតិទាំង២០ដែលមានទាំងកម្ពុជាផងនោះតម្រូវឲ្យមហាជនបោះឆ្នោតជាថ្មី ។
ឈុតតំណាងជាតិកម្ពុជា«ទេពីស្រីសួគ៌បវរឦសានបុរៈ»ទទួលបានពិន្ទុខ្ពស់ពីការចុច Like & Share នៅវគ្គមុន ។
ឈុតតំណាងជាតិប្រទេស នីមួយៗ ត្រូវជម្រុះយកចំនួន១០ប៉ុណ្ណោះ ដោយ៥ឈុតជ្រើសរើសតាមរយៈការបោះឆ្នោត និង៥ឈុតទៀតជ្រើសរើសដោយគណៈកម្មការ ។
ចំពោះការបោះឆ្នោតចាប់ផ្តើមពីពេលនេះ រហូតដល់ថ្ងៃទី១៩ ខែតុលា ឆ្នាំ២០១៨ វេលាម៉ោង៥ល្ងាច ។
ឈុតតំណាងជាតិ Miss Grand International 2018 ដែលស្អាតបំផុតនឹងត្រូវជ្រើសរើសដោយគណៈកម្មការ ដោយប្រកាសលទ្ធផលនៅវគ្គផ្តាច់ព្រ័ត្រ នាថ្ងៃទី២៥ ខែតុលា ឆ្នាំ២០១៨ ។
នៅវគ្គមុនគិតត្រឹមរាត្រីថ្ងៃទី១៥ ខែតុលា ឆ្នាំ២០១៨ ជាកាលបរិច្ឆេទចុងក្រោយនៃការប្រកួតប្រជែងMiss Grand International សម្រាប់ឈុតប្រចាំជាតិតាមរយៈការបោះឆ្នោតដោយមហាជន គឺឈុតតំណាងជាតិកម្ពុជាដែលគ្រងដោយកញ្ញាកញ្ញាឌី លីកា បានជាប់លំដាប់ទី១ក្នុងចំណោម១០ប្រទេស ។
ការប្រកួតនៅប្រទេសមីយ៉ាន់ម៉ា នេះស្រីស្អាតឌី លីកា បានគ្រងឈុតប្រចាំជាតិកម្ពុជា ឈ្មោះ «ទេពីស្រីសួគ៌បវរឦសានបុរៈ» ទទួលបានការបោះឆ្នោតពីមហាជនតាមរយៈការចុច “Like” និង “Share” ច្រើនជាងគេ ។ នាងបានឈរក្នុងលំដាប់កំពូលលេខ១ នៃឈុតតំណាងជាតិល្អផ្តាច់គេទាំង១០ ប្រទេស ក្នុងនោះមានកម្ពុជា, វៀតណាម, ហៃទី, ឥណ្ឌូណេស៊ី, ម៉ិកស៊ីកូ, ប៉ារ៉ាហ្គាយ, ប៉េរូ, ហ្វ៊ីលីពីន, ឥណ្ឌា និងមីយ៉ាន់ម៉ា ៕
ចែករំលែកព័តមាននេះ