ខេត្តបាត់ដំបង ៖ សូឡាចំនួន៤គ្រឿង ម៉ាស៊ីនភ្លើង (5kwa) ១គ្រឿង និងថវិកាសប្បុរសជនបានផ្តល់ជូនកងអនុសេនាធំលេខ២ វរសេនាតូចរថក្រោះលេខ៦៧ នៅព្រឹកថ្ងៃទី១៧ ខែតុលា…
ខេត្តបាត់ដំបង ៖ សូឡាចំនួន៤គ្រឿង ម៉ាស៊ីនភ្លើង (5kwa) ១គ្រឿង និងថវិកាសប្បុរសជនបានផ្តល់ជូនកងអនុសេនាធំលេខ២ វរសេនាតូចរថក្រោះលេខ៦៧ នៅព្រឹកថ្ងៃទី១៧ ខែតុលា ឆ្នាំ២០១៨ ដឹកនាំដោយលោកឧត្តមសេនីយ៍ទោ ឈុន ម៉ៅ មេបញ្ជាការរងយោធភូមិភាគទី៥ មេបញ្ជាការរងតំបន់ទី១ បានអញ្ជើញជាអធិបតីក្នុងពិធីទស្សនកិច្ចសិក្សា ស្តីពីការងារកសាងពង្រឹងអង្គភាពរឹងមាំលើគ្រប់វិស័យ នៅកងអនុសេនាធំទី២ វរសេនាតូចរថក្រោះលេខ៦៧ ស្ថិតក្នុងភូមិពង្រ សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ដោយមានការចូលរួមពីលោកឧត្តមសេនីយ៍ត្រី ជុំ ស៊ីថា មេបញ្ជាការរងកងពលតូចថ្មើរជើងលេង៥១ និងសប្បុរសជនផងដែរ ។
បន្ទាប់ពីប្រតិភូអញ្ជើញចុះត្រួតពិនិត្យជាក់ស្តែងតាមបណ្តាគោលដៅនានាក្នុងកងអនុសេនាធំទី២ វរសេនាតូចរថក្រោះលេខ៦៧រួចមក គណៈអធិបតី និងប្រតិភូក៏បានចូលរួមមតិវាយតម្លៃនូវចំណុចវិជ្ជមាន និងអវិជ្ជមានដែលអង្គភាពទាំងមូលធ្វើបាន ។ ក្នុងនោះសរុបវាយតម្លៃក្នុងអង្គពិធីជាបឋម អស់លោកមេបញ្ជាការតាមបណ្តអង្គភាពផ្សេងៗ ជាអធិបតីបានធ្វើការកោតសរសើរ និងថ្លែងអំណរគុណយ៉ាងជ្រាលជ្រៅចំពោះវត្តមាន នៃការអញ្ជើញចូលរួមដ៏កុះករពីសំណាក់អស់លោកពីគ្រប់បណ្តាអង្គភាពជិតឆ្ងាយទាំងអស់ដែលបានចូលរួមធ្វើទស្សនកិច្ចសិក្សាដើម្បីចែករំលែកបទពិសោធន៍រកការរីកចម្រើនផ្លាស់ប្តូរពីគ្នាទៅវិញទៅមកផងដែរ ។
ចំពោះអង្គភាពវរសេនាតូចលេខ១នាពេលនោះលោកឧត្តមសេនីយ៍ទោ ឈុន ម៉ៅ បានថ្លែងការកោតសរសើរ ដោយសារជាក់ស្តែងឃើញថា មានការវិវត្តន៍ឈានឡើងច្រើនបើប្រៀបធៀបទៅនឹងរយ:ពេល៣ឆ្នាំមុន(២០១៥)កន្លងមកនេះតាមទិសដៅលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥ តែងតែដាស់តឿនជាប្រចាំសំខាន់ការធានាជីវភាពកងទ័ព កសាងជំរុំជំរកស្នាក់នៅ កសាងទីបញ្ជាការសម្រាប់ការងារក្នុងអង្គភាពបន្ថែមទៀតបានយ៉ាងល្អប្រសើរ ។
ព្រមជាមួយនេះលោកឧត្តមសេនីយ៍ទោក៏បានក្រើនរំលឹកគ្រប់អង្គភាពអនុវត្តឲ្យរឹងមាំភារកិច្ចនៃកងយោធពលខេមរភូមិន្ទ ការពារជាតិបូរណភាពទឹកដី ការពាររដ្ឋធម្មនុញ្ញ ការពារព្រះមហាក្សត្រ ការពាររាជរដ្ឋាភិបាលស្របច្បាប់ ការពារសុខសន្តិភាព ស្ថិរភាពសង្គមជាតិកម្ពុជានៃយើងឲ្យបានដាច់ខាតទោះជាតម្លៃណាក៏ដោយ ហើយក៏បានផ្តល់សូឡាបំភ្លឺក្នុងអង្គភាពចំនួន៤គ្រឿង ម៉ាស៊ីនភ្លើង(5kwa)១គ្រឿង ថវិកាសប្បុរសជនចំនួន១៣៥៧ដុល្លារ ថវិកាផ្ទាល់ខ្លួនឧបត្ថម្ភកម្មវិធី១លានរៀល ចែកជូននាយទាហាន៥០នាក់ក្នុងម្នាក់ទទួលបាន២ម៉ឺនរៀល, ទឹកសុទ្ធ៥០កេស, មី២០កេស, ទឹកត្រី៥យួរ, ទឹកស៊ីអ៊ីវ៥យួរ បន្ថែមទៀតផងដែរ ៕
ចែករំលែកព័តមាននេះ