ខេត្តក្រចេះ ៖ ទីតាំងរ៉ែមាសដែលធ្លាប់បានធ្វើឱ្យកម្មករខ្មែរជាច្រើននាក់បានស្លាប់ ដោយសារបាក់រណ្តៅនៅក្នុងបាតដីដែលមានជម្រៅជ្រៅ ទោះបីកន្លងមកអាជ្ញាធរមានសមត្ថកិច្ចធ្លាប់បានចុះទប់ស្កាត់ និងហាមឃាត់យ៉ាងដាច់អហង្ការ មិនឱ្យធ្វើអាជីវកម្មអស់រយៈពេលជាច្រើនខែយ៉ាងណាក្តី ស្រាប់តែរយៈពេលចុងក្រោយនេះ ក៏មានការធ្វើអាជីវកម្មដោយលួចលាក់ ជីកកកាយនៅតំបន់នោះជាថ្មី និងកាន់តែខ្លាំងជាងមុនទៅទៀត ។
តាមសេចក្តីរាយការណ៍បានឲ្យដឹងថា សព្វថ្ងៃមានទីតាំងជីករ៉ែមាសខុសច្បាប់យ៉ាងហោចពី៥ទៅ៦កន្លែង
ធំៗ នៅចំណុចព្រៃតំបន់រ៉ែ ក្នុងភូមិអូរត្រូន ឃុំក្បាលដំរី ស្រុកសំបូរ និងមានសកម្មភាពជីកកាយយ៉ាងអនាធិបតេយ្យផងដែរ ។អ្នករស់នៅ ចំណុចតំបន់ព្រៃមាសនោះបានឲ្យដឹងថា សកម្មភាពលួចជីកកកាយយករ៉ែមាសពីសំណាក់ក្រុមឈ្មួញ កំពុងតែមានសកម្មភាពសាជាថ្មីឡើងវិញហើយ ក្នុងអំឡុងរយៈពេលជាង៣ខែកន្លងមកនេះ ។
ពួកគាត់ថា ក្រុមឈ្មួញរ៉ែមាសដែលមកលួចធ្វើអាជីកម្មខុសច្បាប់ គឺសុទ្ធសឹងតែសមាសភាពអ្នកមកពីខាងក្រៅស្រុក ។ អាជីវកម្មរបស់ពួកគេមានលក្ខណៈទ្រង់ទ្រាយធំ ប្រើសុទ្ធតែកម្មករវៀតណាម ហើយបំពាក់ដោយសម្ភារទំនើបៗដូចជាម៉ាស៊ីនកែច្នៃ ព្រមទាំងសារធាតុគីមីជាដើម។ប្រភពពដដែលនេះ បានឲ្យដឹងទៀតថា កាលពីចុងឆ្នាំ២០១៧ អាជ្ញាធរខេត្តក្រចេះ ដឹកនាំដោយមន្ត្រីនៃមន្ទីររ៉ែ និងថាមពល ធ្លាប់បានចុះបង្ក្រាបទប់ស្កាត់បទល្មើសជីករុករករ៉ែ នៅតំបន់នោះ មានចំនួនជាង១០ទីតាំង ។ តែការបង្ក្រាបពីសំណាក់អាជ្ញាធរត្រូវបានពល រដ្ឋនៅតំបន់នោះមើលឃើញថា គឺធ្វើឡើងបានតែមួយប្រាវ ប្រៀបដូចជាវែកចក ដោយពួក ក្រុមឈ្មួញតែងឆក់ឱកាសព្យាយាមបន្តសកម្មភាពលួចធ្វើអាជីវកម្មបានដដែល ។
អ្វីដែលជាការផ្ទុយគ្នាពីការលើកឡើងរបស់ក្រុមមន្ត្រីមន្ទីររ៉ែ និងថាមពល ដែលបានចុះទៅបង្ក្រាបនោះ បានបង្ហាញថា អ្នកធ្វើអាជីវកម្មរុករករ៉ែមាសនៅតំបន់នោះសុទ្ធសឹងជាពលរដ្ឋក្រីក្រ ។ តែពលរដ្ឋនៅតំបន់នោះបានលើកឡើងថា ពួកគាត់មិនមានលទ្ធភាពក្នុងការជីកកកាយជាលក្ខណៈទ្រង់ទ្រាយធំបែបនេះ បាននោះទេ ក្រៅពីឈ្មួញដែលមានឥទ្ធិពលមានលុយ និងមានខ្នងបង្អែកក្រាស់នោះ ។ ពួកគាត់ថា ពលរដ្ឋនៅតំបន់នោះគឺមានលទ្ធភាពត្រឹមកម្មករធ្វើការស៊ីឈ្នួល យកប្រាក់កម្រៃពីឈ្មួញប្រចាំថ្ងៃរស់មួយពេលប៉ុណ្ណោះ អ្នកក្រីក្រឯណាមានគ្រឿងចក្រ មានយួនបែបនេះ ។
ទន្ទឹមនឹងសកម្មភាពការជីកកាយរ៉ែមាសយ៉ាងអនាធិបតេយ្យ ដែលកំពុងតែកើតមាន នៅចំណុចព្រៃមាសនោះ ការទិញលក់រណ្តៅរ៉ែមាសនៅក្នុងព្រៃពីម្ចាស់មួយទៅម្ចាស់មួយ រវាងឈ្មួញនិងឈ្មួញ គឺធ្វើឡើងក្នុងការចរចាតម្លៃទិញលក់ប្រៀបដូចជាកម្មសិទ្ធិស្របច្បាប់ទៅហើយ។ ប្រធានមន្ទីររ៉ែ និងថាមពលខេត្តក្រចេះលោក សុខ គីរីរ័ត្ន បានឲ្យដឹងតាមទូរស័ព្ទនៅថ្ងៃទី១៧ តុលា នេះថា ប៉ុន្មានថ្ងៃមុននេះ លោកបានចុះទៅពិនិត្យដល់ទីតាំងតំបន់រ៉ែ ខុសច្បាប់ខាងលើ និងបានហៅម្ចាស់អាជីវកម្មទាំង៦កន្លែងមកធ្វើកិច្ចសន្យាឲ្យបញ្ឈប់សកម្ម ភាពខុសច្បាប់ទាំងអស់នោះ ។
លោកថា ទីតាំងដែលពួកគាត់កំពុងតែជីកកាយ គឺស្ថិតក្នុង បរិវេណរបស់ក្រុមហ៊ុនរ៉ែដែលមានអាជ្ញាប័ណ្ណ ។ លោកអះអាងទៀតថា លោកនឹងបង្កើតគណៈកម្មការមួយដើម្បីមានវិធានការចុះលុបរណ្តៅរ៉ែទាំងនោះ ចោលទាំងស្រុងតែម្តង ។ ហើយសកម្មភាពនេះក៏នឹងធ្វើឡើងនាពេលឆាប់ៗខាងមុខនេះ ។ លោកប្រធានមន្ទីរបានបញ្ជាក់ទៀតថា ម្ចាស់អាជីវកម្មរណ្តៅរ៉ែមាសទាំងអស់នោះគឺសុទ្ធសឹងជាពលរដ្ឋ ដែលរស់នៅតំបន់រ៉ែខាងលើ ដែលបានមកលួចជីកកកាយតាមរណ្តៅចាស់ៗដែលអាជ្ញាធរធ្លាប់បានចុះទៅហាមឃាត់ នាពេលកន្លងមក ៕
ចែករំលែកព័តមាននេះ