ខេត្តត្បូងឃ្មុំ ៖ ដោយសារតែមើលឃើញពីការកាប់បំផ្លាញនូវព្រៃលិចទឹកធ្វើជាកម្មសិទ្ធចេះតែមានជាបន្តបន្ទាប់នោះទើបនៅថ្ងៃទី១៦ តុលា ២០១៨ អាជ្ញាធររួមនឹងបរិស្ថានខេត្ត បាននាំគ្នាលើកស្លាកបម្រាមមួយផ្ទាំងធំ នៅភូមិយាយ.ស ឃុំទន្លេបិទ ស្រុកត្បូងឃ្មុំ ។ ប្រយោជន៍ទប់ស្កាប់មិនឲ្យមានការបំផ្លាញបន្តទៀត ហើយបើពុំនោះទេនឹងត្រូវប្រឈមមុខផ្លូវច្បាប់ ។
លោកចាន់ ខូវ វ័យ៥៦ឆ្នាំ នៅភូមិយាយ.ស ឃុំទន្លេបិទឲ្យដឹងថា រូបលោកបានមកតាំងលំនៅឋានសាងសង់ផ្ទះឈើនៅជាប់ផ្លូវជាតិលេខ៧ ដែលរហូតមកដល់សព្វថ្ងៃមានរយៈពេលជាង៣០ឆ្នាំមកហើយ ។ ទាំងរដូវវស្សានិងរដូវប្រាំងគាត់មានទូកមួយគ្រឿង អុំនឹងដៃតែងតែចេញទៅបឹងក្រោយផ្ទះរាយមងដាក់ត្រីសម្រាប់លក់ដោះស្រាយជីវភាពគ្រួសាររហូតមកដល់សព្វថ្ងៃនេះ ។
ពលរដ្ឋរូបនេះប្រាប់បន្តថា ជាក់ស្តែងនៅព្រឹកថ្ងៃខាងលើបានឃើញពីសកម្មភាពរបស់អាជ្ញាធរបានចុះ
មកលើកស្លាកសញ្ញាដាក់បម្រាមផ្សេងៗ មិនឲ្យមានកាប់បំផ្លាញព្រៃលិចទឹក រូបលោកសូមគាំទ្រចំពោះ
ទង្វើរល្អនេះ ។ ដើម្បីឲ្យធនធានធម្មជាតិសំបូរទៅបានទាល់តែមាន កិច្ចសហការចូលរួមពីពលរដ្ឋនៅ
តំបន់នេះប្រឹងប្រែងថែរក្សា និងអភិរក្សក្នុងពេលអនាគត ត្រីនឹងសំបូរកាន់តែច្រើនឡើង ហើយគាត់ក៏អាចនេសាទ បានច្រើនសម្រាប់លក់ដោះស្រាយជីវភាពគ្រួសារ ។ ហើយក្នុងនាមរូបលោកជាពលរដ្ឋមួយរូបសូមគាំទ្រចំពោះសកម្មភាពល្អបែបនេះជាមួយនោះគាត់នឹងត្រូវអនុវត្តន៍នូវអ្វីដែលស្របច្បាប់ ។
លោកហួរ សាអ៊ុន ជំទប់ទី១ ឃុំទន្លេបិទមានប្រសាសន៍ឲ្យដឹងដែរថា នៅតំបន់អភិរក្សនេះកន្លងមក
ធ្លាប់មានបុគ្គលមួយចំនួនបាននាំគ្នាកាប់បំផ្លាញព្រៃលិចទឹកអស់ជាច្រើន ហើយយកដីធ្វើជាកម្មសិទ្ធ
របស់ខ្លួនផ្ទុយទៅនឹងច្បាប់ដែលបានហាមនោះ ។ ដោយមើលឃើញបែបនេះហើយទើបអាជ្ញាធរបានសហការជាមួយនឹងមន្ទីរបរិស្ថានខេត្តចុះលើកស្លាកសញ្ញាបម្រាមមានរហូតដល់ទៅចំនួន១២ចំណុចក្នុងនោះមានដូចជា ១-ហាមកាប់គាស់រុករានដីព្រៃ ឆ្ការ ដុត និងឈូសឆាយដីព្រៃ ដើម្បីយកធ្វើកម្មសិទ្ធ ២-បោះបង្គោលហ៊ុំព័ទ្ធដាក់សញ្ញាសម្គាល់ក្នុងគោលបំណងកាន់កាប់ជាកម្មសិទ្ធ ៣-យកថ្ម ក្រួស ខ្សាច់ រ៉ែ ការគាស់ ឈូសឆាយ កកាយយកដី ចាក់លុបដោយគ្មានការអនុញ្ញាត ៤-ដឹកជញ្ជូន និងប្រមូលផលអនុផលធនធានធម្មជាតិសោយគ្មានការអនុញ្ញាត ។
៥-ប្រមូលសន្និផលអនុផលធម្មជាតិដោយគ្មានការអនុញ្ញាត ។ រួមនឹងចំណុចផ្សេងៗទៀត ដូច្នេះសូមឲ្យពលរដ្ឋត្រូវតែនាំគ្នាខិតខំការពារ និងថែរក្សាទាំងអស់គ្នាឲ្យបានគង់វង្ស និងសំបូរព្រៃលិចទឹកឡើងវិញ ហើយបើពលរដ្ឋបានឃើញពីសកម្មភាព ឈូសឆាយដីព្រៃដោយខុសច្បាប់សូមប្រញាប់រាយការណ៍មកស្ថាប័នដែលនៅកៀក ដើម្បីទប់ស្កាត់ ៕
ចែករំលែកព័តមាននេះ