សហរដ្ឋអាមេរិក ៖ យោងតាមតុល្យការថ្មីមួយរបស់អាជ្ញាធរមូលដ្ឋានបានដកស្រង់ផ្សាយកាលពីថ្ងៃទី១៦ តុលា ដោយបណ្ដាសារព័ត៌មានថា មនុស្សយ៉ាងតិច៣០នាក់បានត្រូវស្លាប់ដោយសារព្យុះ MICHAEL ដែលបោកបក់លើរដ្ឋ៤នាភាគខាងត្បូង សហរដ្ឋអាមេរិក កាលពីសប្ដាហ៍មុន។…
សហរដ្ឋអាមេរិក ៖ យោងតាមតុល្យការថ្មីមួយរបស់អាជ្ញាធរមូលដ្ឋានបានដកស្រង់ផ្សាយកាលពីថ្ងៃទី១៦ តុលា ដោយបណ្ដាសារព័ត៌មានថា មនុស្សយ៉ាងតិច៣០នាក់បានត្រូវស្លាប់ដោយសារព្យុះ MICHAEL ដែលបោកបក់លើរដ្ឋ៤នាភាគខាងត្បូង សហរដ្ឋអាមេរិក កាលពីសប្ដាហ៍មុន។
មេប៉ូលិសម្នាក់បាននិយាយឱ្យដឹងថា សាកសពមនុស្ស១២នាក់ ត្រូវបានរកឃើញក្នុងតំបន់ BAY ធ្វើឲ្យចំនួនអ្នកស្លាប់នៅរដ្ឋផ្លរីដា ឡើងដល់២០នាក់។
ព្យុះ MICHAEL ជាព្យុះសង្ឃរាខ្លាំងប្រភេទទី៤ ក្នុងចំណោមព្យុះខ្លាំងទាំង៥ប្រភេទ នាថ្ងៃទី១០ តុលា បានវាយប្រហារពេញបន្ទុកលើតំបន់ឆ្នេរសមុទ្រនៃឈូងសមុទ្រម៉ិកស៊ិក ជិតទីក្រុងប៉ាណាម៉ាស៊ីធី។ ព្យុះនោះក៏បណ្ដាលឲ្យមនុស្សស្លាប់ម្នាក់នៅរដ្ឋចចជៀ ៣នាក់នៅរដ្ឋការ៉ូលីនខាងជើង និង៦នាក់នៅរដ្ឋវៀជីនៀ។
ព្យុះនេះបន្សល់ទុកពីក្រោយវានូវទិដ្ឋភាពនៃការបំផ្លិចបំផ្លាញយ៉ាងអាក្រក់បំផុត ជាពិសេសនៅរដ្ឋផ្លរីដា។ ហើយអាជ្ញាធរខ្លាចក្រែងតុល្យការធ្ងន់ធ្ងរថែមទៀត ខណៈប្រតិបត្តិការរុករកបន្តធ្វើក្រោមគំនរបាក់បែក។
នៅរដ្ឋផ្លរីដា មនុស្សជិត១៣៧.០០០គ្រូសារ ព្រមទាំងហាងនានានៅពុំទាន់មានអគ្គិសនីប្រើប្រាស់ឡើងវិញ ហើយចំណុចចែកចាយទឹក និងស្បៀងនៅតែមានក្នុងតំបន់ផ្សេងៗនៃរដ្ឋនោះ។ ទីក្រុងជាច្រើនបានដាក់បំរាមគោចរណ៍ពេលយប់ ហើយសាលាភាគច្រើនក្នុងបណ្ដាតំបន់រងការប៉ះពាល់ដោយព្យុះ នៅតែបិទទ្វាររហូតដល់មានបទបញ្ជាជាថ្មី៕
ចែករំលែកព័តមាននេះ