តម្លៃប្រេងពិភពលោកបានធ្លាក់ចុះបន្ដិចមកវិញហើយ
ទីក្រុងវ៉ាស៊ីនតោន ៖ បន្ទាប់ពីតម្លៃប្រេងកើនឡើងអស់៤សប្តាហ៍កន្លងមក តម្លៃប្រេងរបស់ West Texas Intermediate (WTI) សម្រាប់ខែវិច្ឆិកា និងតម្លៃ…
ទីក្រុងវ៉ាស៊ីនតោន ៖ បន្ទាប់ពីតម្លៃប្រេងកើនឡើងអស់៤សប្តាហ៍កន្លងមក តម្លៃប្រេងរបស់ West Texas Intermediate (WTI) សម្រាប់ខែវិច្ឆិកា និងតម្លៃ…
ទីក្រុងវ៉ាស៊ីនតោន ៖ បន្ទាប់ពីតម្លៃប្រេងកើនឡើងអស់៤សប្តាហ៍កន្លងមក តម្លៃប្រេងរបស់ West Texas Intermediate (WTI) សម្រាប់ខែវិច្ឆិកា និងតម្លៃ Brent សម្រាប់ខែធ្នូ បានធ្លាក់ចុះ ៤,០៣% និង៤,៤៣% រៀងគ្នា ។
កាលពីសប្តាហ៍ទីមួយនាខែតុលា តម្លៃប្រេងរបស់ WTI និង Brent ស្មើនឹង៧៤,៣៤ដុល្លារ និង៨៤,១៦ដុល្លារ ក្នុងមួយធុង ។
កាលពីថ្ងៃអង្គារ តម្លៃប្រេងរបស់ក្រុមហ៊ុនទាំងពីរបន្តកើនឡើងទៀត ដោយមានតម្លៃប្រេង WTI កើនបាន០,៦៧ដុល្លារមកស្មើ៧៤,៩៦ដុល្លារក្នុងមួយធុង និងតម្លៃប្រេង Brent កើនបាន១,០៩ដុល្លារមកស្មើ៨៥ដុល្លារក្នុងមួយធុង ។
ប៉ុន្តែតម្លៃប្រេងដែលមានកម្រិតខ្ពស់ជាងគេតាំងពី៤ឆ្នាំមុនមកនេះ បានបង្កឲ្យមានកង្វល់ពីតម្រូវការ ខណៈដែលលោកប្រធានាធិបតីដូណាល់ត្រាំ (Donald Trump) បានរិះគន់ថា OPEC បានបង្កើនតម្លៃប្រេងឥន្ធនៈសម្រាប់អតិថិជនអាមេរិក ។
លើសពីនេះទៀត មូលនិធិរូបិយវត្ថុអន្តរជាតិ (IMF) បានបន្ថយការព្យាករលើការលូតលាស់សេដ្ឋកិច្ចពី៣,៩%មកស្មើត្រឹម៣,៧%ប៉ុណ្ណោះសម្រាប់ឆ្នាំ២០១៨ និង២០១៩ ។
កាលពីថ្ងៃពុធ និងព្រហស្បតិ៍ តម្លៃប្រេងឆៅបានធ្លាក់ចុះវិញ ស្របទៅនឹងទីផ្សារភាគហ៊ុន ខណៈដែលលោកប្រធានាធិបតីត្រាំបន្តរិះគន់ដល់ប្រទេសដែលមិនគោរពតាមការដាក់ទណ្ឌកម្មរបស់អាមេរិក ។ តម្លៃប្រេង WTI បានធ្លាក់ចុះ១,៧៩ដុល្លារ និង២,២ដុល្លារក្នុងមួយធុង ខណៈដែលតម្លៃប្រេង Brent ធ្លាក់ចុះ១,៩១ដុល្លារនិង ២,៨៣ដុល្លារក្នុងមួយធុង ។
អ្នកវិភាគគិតថា ទិន្នន័យប្រេងឥន្ធនៈប្រចាំសប្តាហ៍របស់រដ្ឋបាលព័ត៌មានថាមពលអាមេរិក (EIA) ជាកត្តាដែលដាក់សម្ពាធលើតម្លៃប្រេងឆៅ ។
យោងតាមរបាយការណ៍ដែលបានចេញកាលពីថ្ងៃព្រហស្បតិ៍ បានឲ្យដឹងថា ចំនួនប្រេងឆៅស្តុកទុករបស់អាមេរិកបានកើនឡើង៥,៩៨លានធុងកាលពីសប្តាហ៍ដំបូងនាខែតុលា ហើយចំនួនប្រេងឥន្ធនៈដែលស្តុកទុកក្នុងប្រទេសនេះបានកើនឡើង១១,៣លានធុងក្នុងមួយសប្តាហ៍ផងដែរ មានន័យថា មានការផ្គត់ផ្គង់ច្រើន ៕
ចែករំលែកព័តមាននេះ