ខេត្តបន្ទាយមានជ័យ ៖ ឃាតករដែលសម្លាប់មិត្តភក្តិព្រោះតែរឿងគំនុំ បានត្រូវនគរបាលការិយាល័យព្រហ្មទណ្ឌខេត្ត សហការជាមួយនគរបាលក្រុងសិរីសោភ័ណ ដឹកនាំបញ្ជាផ្ទាល់ដោយលោកឧត្តមសេនីយ៍ទោ អាត់ ខែម ស្នងការនគរបាលខេត្ត និងលោកឧត្តមសេនីយ៍ត្រី សិទ្ធ ឡោះ ស្នងការរងទទួលផែននគរបាលព្រហ្មទណ្ឌ ចុះស្រាវជ្រាវឈានទៅចាប់ខ្លួនបាន និងបង្ហាញមុខជាសាធារណៈនៅថ្ងៃទី១៧ខែតុលា
និងរៀបចំសំណុំរឿងបញ្ជូនទៅសាលាដំបូងខេត្ត ។ ការបង្ហាញមុខឃាតករនេះ គឺបន្ទាប់ពីសពបុរសម្នាក់ត្រូវបានគេប្រទះឃើញនៅក្បែរផ្លូវជាតិលេខ៥ ក្បែរអតីតសាលាអុិន តាំ ដែលពេលនេះ បន្សល់ទុកតែដីទួលមួយទៅហើយនោះ ។
លោកឧត្តមសេនីយ៍ត្រី សិទ្ធិ ឡោះ បានឲ្យដឹងថា នៅវេលាម៉ោង១២ថ្ងៃត្រង់ថ្ងៃទី១៥ ខែតុលា មានពលរដ្ឋផ្តល់ព័ត៌មានថា បានប្រទះឃើញសពបុរសម្នាក់នៅក្នុងគុម្ពស្បូវភ្លាំង ចំណុចអតីតសាលាអុិន តាំ ក្បែរផ្លូវជាតិលេខ៥ ស្ថិតក្នុងភូមិទឹកថ្លា សង្កាត់ទឹកថ្លា ក្រុងសិរីសោភ័ណ ។ ក្រោយពេលទទួលបានព័ត៌មាននេះ លោកឧត្តមសេនីយ៍ទោ អាត់ ខែម ស្នងការនគរបាលខេត្ត និងរូបលោកផ្ទាល់ បានដឹកនាំកម្លាំងជំនាញ ផែននគរបាលព្រហ្មទណ្ឌ និងកម្លាំងនគរបាលក្រុងសិរីសោភ័ណ ចុះទៅដល់ទីកន្លែងដើម្បីពិនិត្យសព ។ បន្ទាប់មក បើកការស៊ើបអង្កេតនិងឈានដល់ការបង្ក្រាបជនដៃដល់នៅល្ងាចថ្ងៃដដែល តាមបញ្ជារបស់លោកស្នងការ និងដោយមានការសម្របសម្រួលពីព្រះរាជអាជ្ញាអមសាលាដំបូងខេត្តគឺលោក មាស ច័ន្ទពិសិដ្ឋ ។
លោកស្នងការរង សិទ្ធ ឡោះ បញ្ជាក់ថា ជនរងគ្រោះឈ្មោះ ជុង អ៊ុង អាយុ៣១ឆ្នាំ នៅភូមិព្រះពន្លា សង្កាត់ព្រះពន្លា ក្រុងសិរីសោភ័ណ ចំណែកជនដៃដល់ឈ្មោះ មាស គីហុង ភេទប្រុស អាយុ២១ឆ្នាំ នៅភូមិសូភី សង្កាត់កំពង់ស្វាយ ក្រុងសិរីសោភ័ណ ។ ជនរងគ្រោះគឺជាបងធំរបស់ជនដៃដល់ ក្នុងករណីជួញដូរគ្រឿងញៀន ។ ចំពោះករណីឈានដល់ការកើតមានឃាតកម្មនេះ បើតាមការសារភាពរបស់ជនដៃដល់គឺផ្តើមចេញពីបញ្ហា៣ចំណុច ៖១-ជនរងគ្រោះបានយកម៉ូតូរបស់ជនដៃដល់ធ្វើជាកម្មសិទ្ធិ ជាមធ្យោបាយក្នុងការលក់ចែកចាយគ្រឿងញៀន ២-ករណីជនរងគ្រោះមិនឲ្យខ្លួនចេញពីបន្ទប់ជួល បង្អត់បាយ និងបំបាក់ទំនុកទុកចិត្តមកលើខ្លួនក្នុងរឿងស្រីញី(ប្រចណ្ឌខ្លួននិងសង្សាររបស់គេ) និង៣-បញ្ហាគ្រឿងញៀន ។
លោកស្នងការរងបន្តទៀតថា តាមចម្លើយរបស់ជនដៃដល់ជាឃាតករ គឺនៅយប់ថ្ងៃកើតហេតុរូបគេនិងជនរងគ្រោះឈ្មោះ ជុង អ៊ុង ជាបងធំ បានជិះម៉ូតូទៅទិញថ្នាំញៀនពីឈ្មោះ អ៊ុក ពិន នៅភូមិបាលិលេយ្យ២ សង្កាត់ប៉ោយប៉ែត ដោយរូបគេជាអ្នកឌុប ។ ពេលត្រឡប់មកវិញ រូបគេមានបំណងចង់ព្រមានជនរងគ្រោះ ដោយឲ្យជនរងគ្រោះជាអ្នកបើកម៉ូតូម្តង តែនិយាយជាច្រើនដង ឈ្មោះ អ៊ុង មិនព្រម ។ ពេលនោះរូបគេបានបើកម៉ូតូឲ្យលឿនដល់ចំណុចអតីតសាលាអុិន តាំ ក៏លោតចេញពីម៉ូតូបណ្តាលឲ្យជនរងគ្រោះនិងម៉ូតូធ្លាក់ពីលើថ្នល់សន្លប់ ។ ដោយជាឱកាសល្អ រូបគេក៏ច្របាច់បំពង់កជនរងគ្រោះសម្លាប់ នៅវេលាម៉ោង១រំលងអធ្រាត្រឈានចូលថ្ងៃទី១៥ ខែតុលា បន្ទាប់មកក៏ជិះម៉ូតូគេចខ្លួន ។
លោកឧត្តមសេនីយ៍ស្នងការរង បញ្ជាក់ថា ការបំបែកសំណុំរឿងឃាតកម្មនេះ កម្លាំងនគរបាលជំនាញបានស្រាវជ្រាវនិងឈានដល់ការចាប់ឃាត់ខ្លួនឈ្មោះ អ៊ុក ពិន នៅភូមិបាលិលេយ្យ២ សង្កាត់ប៉ោយប៉ែត ក្នុងករណីជួញដូរគ្រឿងញៀន ដែលធ្វើសកម្មភាពលក់ឲ្យជនដៃដល់និងជនរងគ្រោះនោះផងដែរ ។ ជនជាប់
ចោទក្នុងករណីអំពើឃាតកម្មនិងជួញដូរគ្រឿងញៀន ត្រូវបានកសាងសំណុំរឿងបញ្ជូនទៅសាលាដំបូងខេត្ត ៕
ចែករំលែកព័តមាននេះ