រាជធានីភ្នំពេញ ៖ សេចក្តីរាយការណ៍បឋមឲ្យដឹងថា ស្ត្រីពីរនាក់ គឺម្តាយក្មេក និងកូនប្រសា ត្រូវបានកម្លាំងសមត្ថកិច្ចមន្ទីរប្រឆាំគ្រឿងញៀនឃាត់ខ្លួន ពាក់ព័ន្ធករណីនាំយកថ្នាំញៀនប្រមាណជិត១គីឡូក្រាម ទៅផ្ញើកញ្ចប់ប្រៃសណីយ៍បំរុងចេញទៅប្រទេសអូស្ត្រាលី ។
សេចក្តីរាយការណ៍បឋមបន្តថា កាលពីរសៀលថ្ងៃទី១៥ តុលា មានស្ត្រីជនជាតិចិន២នាក់ (ម្តាយក្មេក និងកូនប្រសារ) បានយកកេសក្រដាស១បិតស្កុតជិតឈឹង ទៅកាន់ប្រៃសណីយ៍ក្នុងគោលបំណងផ្ញើទៅប្រទេសអូស្ត្រាលី តាមរយៈក្រុមហ៊ុនមួយ ។
ពេលស្ត្រី២នាក់ម្តាយក្មេក និង កូនប្រសា បានយកកេសនោះទៅដាក់ផ្ញើ នៅបញ្ជរប្រៃសណីយ៍ តែត្រូវបានមន្ត្រីគយ និងមន្ត្រីពាក់ព័ន្ធប្រចាំការនៅទីនោះ រួមទាំងបុគ្គលិកប្រៃសណីយ៍បានត្រួតពិនិត្យ និងស្កែន ស្រាប់តែចេញលទ្ធឃើញមានថ្នាំញៀននៅក្នុងកេសនោះ ។ ឃើញដូច្នោះសមត្ថកិច្ចប្រចាំការនៅបញ្ជរប្រៃសណីយ៍ បានឃាត់ខ្លួនស្ត្រី២នាក់នោះ និងបានរាយការណ៍ទៅកាន់មន្ទីរប្រឆាំងគ្រឿងញៀន ដើម្បីឲ្យសមត្ថកិច្ចជំនាញចាត់ការតាមផ្លូវច្បាប់ ។
គ្រាន់តែទទួលបានព័ត៌មានខាងលើនោះភ្លាម លោកនាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិកាន់កាប់ផែនប្រយុទ្ធប្រឆាំងគ្រឿងញៀន បានដាក់បទបញ្ជារទៅមន្ទីរប្រឆាំងគ្រឿងញៀនក្រសួងមហាផ្ទៃ ក្រោមការដឹកនាំដោយលោកឧត្តមសេនីយ៍ឯក ឡឹក វណ្ណៈ ឲ្យកម្លាំងឲ្យជំនាញចុះទៅសហការណ៍ និងនាំខ្លួនជនសង្ស័យពីរនាក់ម្តាយកូន រួមជាមួយថ្នាំញៀនដែលដាក់ក្នុងកេសនោះ ដោយមានការសម្របសម្រួលពីស្ថាប័នអយ្យការសាលាដំបូងរាជធានីភ្នំពេញ ដើម្បីយកទៅធ្វើការសាកសួរ ។
សេចក្តីរាយការណ៍បន្តថា នៅពេលសមត្ថកិច្ចសាកសួរ ជនសង្ស័យបានសារភាពថា ពួកគេមិនមែនជាម្ចាស់ថ្នាំញៀននេះទេ ហើយពួកគេក៏មិនដឹងថានៅក្នុងកេសនោះមានថ្នាំញៀនដែរ ។ ចម្លើយម្តាយ និងកូននៅចំពោះមុខសមត្ថកិច្ចបានឱ្យដឹងថា ពួកគេត្រូវបានបុរសជាជនជាតិចិនម្នាក់ពឹងពាក់ឲ្យជួយយកកេសខាងលើនោះទៅកាន់ប្រៃសណីយ៍កម្ពុជា ដើម្បីផ្ញើចេញទៅប្រទេសអូស្ត្រាលី ដែលពួកគេមិនបានដឹងថានៅក្នុងកេសនោះមានអ្វីទេ លុះពេលទៅដល់កន្លែងផ្ញើត្រូវសមត្តកិច្ចឃាត់ខ្លួនតែម្តង ។
ក្រោយពីស្តាប់ចម្លើយជនសង្ស័យ កាលពីព្រឹកថ្ងៃទី១៧ តុលា សមត្ថកិច្ចមន្ទីរប្រឆាំងគ្រឿងញៀន បានបង្កើតគណៈកម្មការដែលមានតំណាងព្រះរាជអាជ្ញាចូលរួម បានយកកេសថ្នាំញៀននោះបើកពិនិត្យ ដោយឃើញថា ពិតជាមានម្សៅថ្នាំញៀននៅក្នុងនោះមែន ។
ម្សៅថ្នាំញៀនត្រូវបានក្រុមឧក្រិដ្ឋប្រើប្រាស់ និងរៀបចំវេចខ្ចប់តាមបច្ចេកទេសជំនាញបំផុត ដោយច្រកថ្នាំក្នុងស្បោងប្លាស្ទិចអ៊ុនមាត់ថង់ជិត ដែលមានទំហំ២ទៅ៣តឹកបិតភ្ជាប់ និងសំបកកេស៣ជ្រុង ហើយគេទិញរូបតុក្កតាមួយដាក់ចូលកណ្តាល ដើម្បីបន្លំភ្នែកសមត្ថកិច្ច ។ ពេលសមត្ថកិច្ចយកស្បោង៣ កញ្ចប់នោះចាក់ម្សៅថ្នាំញៀនចេញមក និងយកទៅថ្លឹងទៅ ឃើញមានទម្ងន់ជិត១គីឡូក្រាម ។
ខាងក្រោមនេះជារបាយការណ៍ផ្លូវការរបស់មន្ទីរប្រឆាំង គ្រឿងញៀន គឺនៅថ្ងៃទី១៥ តុលា ឆ្នាំ ២០១៨ វេលាម៉ោង១៦ និង៥០នាទី កម្លាំងជំនាញ ការិយាល័យរដ្ឋបាលសរុប(ក១) នៃមន្ទីរប្រឆាំងគ្រឿងញៀន ដោយមានការដឹកនាំសម្របសម្រួលពីលោក សៀង សុខ ព្រះរាជអាជ្ញារង និងក្រឡាបញ្ជី គឹម ឆេងប៊ុន បានចុះបង្ក្រាបករណី ដឹកជញ្ជូនគ្រឿងញៀនឆ្លងដែនខុសច្បាប់ ពីប្រទេសកម្ពុជាទៅប្រទេសអូស្ត្រាលី នៅចំណុចមុខក្រុមហ៊ុនផ្ញើបញ្ញើ ផ្លូវសហព័ន្ធរុស្សី សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
ជាលទ្ធផល ឃាត់ខ្លួនជនសង្ស័យ២នាក់ ម្នាក់ឈ្មោះ ចាន់ ដារ៉ា ភេទស្រី អាយុ២៧ឆ្នាំ ជនជាតិខ្មែរ និងម្នាក់ឈ្មោះ TAM HIU TING ភេទស្រី អាយុ៥៥ឆ្នាំ ជនជាតិវៀតណាម សញ្ជាតិចិនកុងកុង ។ វត្ថុតាងចាប់យករួមមាន គ្រឿងញៀនប្រភេទមេតំហ្វេតាមីន(ICE) ទម្ងន់ជិត១គីឡូក្រាម ដែលលាក់បង្កប់ក្នុងជញ្ជាំងកេស៕
ចែករំលែកព័តមាននេះ