ខេត្តកោះកុង ៖ ដោយរដូវវស្សាឆ្នាំនេះបានអូសបន្លាយពេលច្រើនខែពេក (១០ខែ) លើសឆ្នាំមុនៗ បណ្តាលឲ្យជំនន់ទឹកភ្លៀងគំរាមកំហែងយ៉ាងខ្លាំងនៅបណ្តាខេត្តនានាប៉ែកនិរតីនៃប្រទេស ដែលជាខេត្តជាប់តំបន់ឆ្នេរសមុទ្រ និងបណ្តាលឲ្យប៉ះពាល់យ៉ាងធ្ងន់ធ្ងរដល់ជីវភាពរស់នៅរបស់ប្រជាពលរដ្ឋ និងហេដ្ឋារចនាសម្ព័ន្ឋសំខាន់ៗមួយចំនួន ហើយចាំបាច់ត្រូវតែបើកយុទ្ធនាការស្តា និងជួសជុលជាបន្ទាន់ទៀតផង ។
ជាក់ស្តែងនៅខេត្តកោះកុងដោយសារឥទ្ធិពលជំនន់ទឹកភ្លៀងអូសបន្លាយបានបង្កឲ្យកំណាត់ផ្លូវជាតិលេខ៤៨ ប្រវែង ១៥០គីឡូម៉ែត្រ ត្រូវទទួលរងការខូចខាតយ៉ាងដំណំ បណ្តាលឲ្យសក្តានុពលចរាចរទាំងវិស័យទេសចរ និងវិស័យសេដ្ឋកិច្ចមានការធ្លាក់ចុះ ។
ដោយមើលឃើញហានិភ័យទាំងនេះផង និងនៅពាក់កណ្តាលខែធ្នូ ឆ្នាំ២០១៨ ត្រូវរៀបចំបុណ្យសមុទ្រលើកទី៧ជំទី២ នៅខេត្តកោះកុងផង លោរដ្ឋមន្ត្រីក្រសួងសាធារណៈការក៏បានប្តេជ្ញាបើកយុទ្ធនាការស្តា និងជួសជុលផ្លូវជាតិលេខ៤៨នេះ ក្នុងជំហានអន្តរកាលចាប់ពីដើមខែតុលានេះតទៅឲ្យរួចរាល់ជាស្ថាពរមុនពេលបុណ្យសមុទ្រមកដល់ ។
លោកអាន ដាវុធ ប្រធានមន្ទីរសាធារណៈការខេត្តបានបញ្ជាក់ថា តាមការវាយតម្លៃរបស់វិស្វករបច្ចេកទេសបានកំណត់ទំហំការខូចខាតកំណាត់ផ្លូវជាតិលេខ៤៨ មានប្រវែង ៦២;៩៤០គីឡូម៉ែត្រ ហើយក្រសួងគ្រោងនឹងចំណាយប្រាក់ប្រមាណ១២លានដុល្លារ សំរាប់ការជួសជុលថែទាំក្នុងជំហានអន្តរកាលរយៈពេល២ឆ្នាំ គឺចាប់ពីឆ្នាំ២០១៨ ដល់ឆ្នាំ២០២០ ទើបក្រុមហ៊ុនកូរ៉េចាប់ផ្តើមបើកការស្ថាបនាផ្លូវជាតិនេះសារជាថ្មី ។
លោកប្រធានមន្ទីរសាធារណៈការបញ្ជាក់ទៀតថា ក្រសួងបានបែងចែកក្រុមជួសជុលចេញជា៣កងធំៗ គឺទី១ កងរបស់នាយកដ្ឋានគ្រឿងចក្រ និងស្ថាបនាមាន២កង់តូចៗ ទី២ កងរបស់នាយកដ្ឋានជួសជុល និងថែទាំផ្លូវថ្នល់ មាន២កងតូចៗ និងទី៣ កងរបស់វិស្វកម្មនៃកងយុទ្ធពលខេមរៈភូមិន្ទមាន២កងតូច ៕
ចែករំលែកព័តមាននេះ