រាជធានីភ្នំពេញ ៖ នារីរូបស្រស់ម្នាក់បើកបររថយន្តស៊េរីទំនើបមួយគ្រឿងទៅបុករថយន្តកងរាជអាវុធហត្ថលើផ្ទៃប្រទេសមួយគ្រឿង ដែលបត់ឆ្វេងឆ្លងផ្លូវបំពានគំនូសសញ្ញាចរាចរណ៍ កាលពីវេលាម៉ោង៧និង២០នាទីយប់ថ្ងៃទី១៧ ខែតុលា ឆ្នាំ២០១៨ ត្រង់ចំណុចខាងមុខកងរាជអាវុធហត្ថលើផ្ទៃប្រទេស តាមបណ្តោយផ្លូវ២៨៩ ស្ថិតក្នុងសង្កាត់បឹងកក់ទី១…
រាជធានីភ្នំពេញ ៖ នារីរូបស្រស់ម្នាក់បើកបររថយន្តស៊េរីទំនើបមួយគ្រឿងទៅបុករថយន្តកងរាជអាវុធហត្ថលើផ្ទៃប្រទេសមួយគ្រឿង ដែលបត់ឆ្វេងឆ្លងផ្លូវបំពានគំនូសសញ្ញាចរាចរណ៍ កាលពីវេលាម៉ោង៧និង២០នាទីយប់ថ្ងៃទី១៧ ខែតុលា ឆ្នាំ២០១៨ ត្រង់ចំណុចខាងមុខកងរាជអាវុធហត្ថលើផ្ទៃប្រទេស តាមបណ្តោយផ្លូវ២៨៩ ស្ថិតក្នុងសង្កាត់បឹងកក់ទី១ ខណ្ឌទួលគោក ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តរបស់កងរាជអាវុធហត្ថលើផ្ទៃប្រទេសមួយគ្រឿងម៉ាកតូយ៉ូតាកូម៉ា ពណ៌ស ពាក់ស្លាកលេខ ភ្នំពេញ 2AP -2630 បើកបរដោយមន្ត្រីកងរាជអាវុធហត្ថម្នាក់ និងបីនាក់ទៀតរួមដំណើរជាមួយ តាមបណ្តោយផ្លូវ២៨៩ ក្នុងទិសដៅពីត្បូងទៅជើង ។
លុះមកដល់ចំណុចកើតហេតុក៏បានបត់ឆ្វេងឆ្លងផ្លូវបំណងចូលទៅក្នុងបន្ទាយកងរាជអាវុធហត្ថលើផ្ទៃប្រទេសទាំងបំពានគំនូសសញ្ញាចរាចរណ៍ ស្រាប់តែមានរថយន្តមួយគ្រឿងទៀត ពណ៌ខ្មៅ ពាក់ស្លាកលេខ ភ្នំពេញ 2BB -2272 បើកបរដោយនារីម្នាក់ក្នងទិសដៅបញ្ច្រាសទិសគ្នា និងក្នុងល្បឿនលឿនក៏ជ្រុលទៅបុករថយន្តរបស់កងរាជអាវុធហត្ថខាងលើចំពីចំហៀងខាងឆ្វេងពេញទំហឹង បណ្តាលឲ្យរថយន្តទាំងពីរគ្រឿងខាងលើរងការខូចខាតក្រពឹតផ្នែកខាងមុខចំហៀងខាងឆ្វេងទាំងសងខាង តែមិនបង្កឲ្យមានអ្នកណាម្នាក់រងរបួសនោះទេ ។
ក្រោយពេលកើតសមត្ថកិច្ចមូលដ្ឋាន និងសមត្ថកិច្ចជំនាញបានចុះមកដល់ចំណុចកើតហេតុ រួចបានឲ្យភាគីទាំងពីរធ្វើដោះស្រាយសម្របសម្រួលគ្នា ហើយដោយភាគីទាំងពីរមិនចង់មានរឿងវែងឆ្ងាយក៏ព្រមយករថយន្តទៅជួសជុលរៀងៗខ្លួន ដើម្បីបញ្ចប់រឿងនៅនឹងកន្លែងកើតហេតុ ៕
ចែករំលែកព័តមាននេះ