ខេត្តបាត់ដំបង ៖ ទំនងជាអស់លទ្ធភាពក្នុងការប្ដឹងសុំជំនួយអន្តរាគមន៍ច្រើនលើកច្រើនសាពីសមត្ថកិច្ចគ្រប់ស្ថាប័ន និងលោកអភិបាលស្រុកសំឡូត ដើម្បីឲ្យជួយទប់ស្កាត់ឬបង្ក្រាបល្បែងស៊ីសង ដែលទទួលរងនូវការរិះគន់កប់ៗមាត់ពីប្រជាពលរដ្ឋផងនោះ ទើបលោកមេឃុំ និងមន្ត្រីក្រោមឱវាទ សម្រេចទម្លាយរឿងអាស្រូវនេះដល់អ្នកសារព័ត៌មាន ដើម្បីឲ្យជួយផ្សព្វផ្សាយក្រែងបានលេចឮដល់ថ្នាក់ដឹកនាំខេត្ត និងសមត្ថកិច្ច
គ្រប់ស្ថាប័ន ជួយអន្តរាគមន៍បង្ក្រាបបនល្បែងរបស់មន្ត្រីនគរបាលនោះ ដែលកំពុងកើតមាននៅក្នុងមូលដ្ឋាន ។
លោក ប៉ុម ម៉ុន មេឃុំ និងលោក ព្រំ តុល ជំទប់ទី១ឃុំស៊ុង ស្រុកសំឡូត បានផ្ដល់បទសម្ភាសន៍ស្ដីពីល្បែងស៊ីសងនេះ ដោយផ្ទាល់ជាមួយកោះសន្តិភាព កាលពីព្រឹកថ្ងៃទី១៦ ខែតុលា នៅខាងមុខអគារសាលាឃុំដែលកំពុងសាងសង់ ។ លោក ប៉ុម ម៉ុន និយាយះថា «ក្នុងនាមខ្ញុំជាមេឃុំ និងសមាជិកក្រុមប្រឹក្សាឃុំទាំងអស់ ហាក់ដូចជាអស់លទ្ធភាពហើយ ក្នុងការស្នើសុំឲ្យកម្លាំងសមត្ថកិច្ចគ្រប់ស្ថាប័ន គ្រប់លំដាប់ថ្នាក់ រួមទាំងលោកអភិបាលស្រុកសំឡូតផង ដើម្បីឲ្យជួយអន្តរាគមន៍ទប់ស្កាត់ឬបង្ក្រាបបនល្បែងនេះ ព្រោះរហូតមកដល់ពេលនេះសំណូមពររបស់ខ្ញុំគ្មានប្រសិទ្ធភាពទេ» ។លោកមេឃុំរូបនេះបានចង្អុលមុខចំៗថា ឈ្មោះស៊ូ គឹមអាន ជាមន្ត្រីនគរបាលនៅអង្គភាពវរៈព្រំដែនគោកលេខ៣១០ គឺជាអ្នកបើកល្បែងនោះ ។
លោកមេឃុំបន្តថា ទីតាំងល្បែងនេះ ស្ថិតនៅភូមិស៊ុង១ ឃុំស៊ុង ស្រុកសំឡូត ។ ល្បែងដែលកំពុងដំណើរសព្វថ្ងៃមាន ភ្នាល់កីឡា អាប៉ោង និងបៀ ដែលមានគ្រប់សមាសភាពចូលលេង ។ លោកដង្ខៅល្បែងឈ្មោះ គឹមអាន បានបើកដំណើរការល្បែងគ្មានច្បាប់នេះប្រមាណ៣ឆ្នាំហើយ តែបានផ្អាកមួយរយៈបន្ទាប់ពីកម្លាំងស្នងការដ្ឋានខេត្តចុះបង្ក្រាបម្ដង ។ ប៉ុន្តែមិនបានមួយដង្ហើមចង្រិតផង បនល្បែងនេះបានបើកដំណើរការវិញ។លោកមេឃុំស៊ុង ក៏ដូចលោក ព្រំ តុល ជំទប់ទី១ដែរ បានលើកឡើងថា ក្រុមការងារក្នុងឃុំរបស់លោក តែងលើកឡើងអំពីបញ្ហាល្បែងស៊ីសងរបស់មន្ត្រីនគរបាលឈ្មោះ ស៊ូ គឹមអាន នេះស្ទើររាល់ពេលបើកកិច្ចប្រជុំគណៈបញ្ជាការកងឯកភាពស្រុកម្ដងៗ ដើម្បីស្នើសុំឲ្យសមត្ថកិច្ច និងលោកអភិបាលស្រុកជួយដោះស្រាយ តែគ្មានថ្នាក់ដឹកនាំមួយណាយកចិត្តទុកដាក់ចំពោះសំណូមពររបស់លោកឡើយ ទាំងលោក កោ ស៊ុនកាំង អធិការនគរបាលស្រុក ទាំងលោកសើ សាម៉េត អភិបាលស្រុក ។
លោកមេឃុំបានរំឭកថា ដោយសារតែបនល្បែងរបស់មន្ត្រីឈ្មោះ គឹមអាន នេះប្រជាពលរដ្ឋក្នុងឃុំបានរិះគន់រូបលោកនិងសមាជិកឃុំយ៉ាងចាស់ដៃស្ទើរងើបមុខមិនរួច នៅក្នុងកិច្ចប្រជុំផ្សព្វផ្សាយពីគោលនយោបាយ«ភូមិ ឃុំមានសុវត្ថិភាព» ឬនៅក្នុងវេទកាសាធារណៈម្ដងៗ ។ លោក ប៉ុម ម៉ុន និយាយថា នៅក្នុងវេទិកាសាធារណៈ ពលរដ្ឋបានរិះគន់ថា «អាជ្ញាធរឬសមត្ថកិច្ចបង្ក្រាបបានតែអ្នកលេងបៀកំប៉ិកកំប៉ុក តែចំពោះអ្នកបើកបនល្បែងធំៗ ដូចជានៅផ្ទះមន្ត្រីនគរបាលឈ្មោះ ស៊ូ គឹមអាន ដែលអ្នកចូលលេងសុទ្ធតែជាសមត្ថកិច្ចគ្រប់សមាសភាព លោកមេឃុំនិងសមត្ថកិច្ចមិនហ៊ានបង្ក្រាបទេ» ។
លោកមេឃុំបញ្ជាក់ថា «ពេលខ្ញុំឮពលរដ្ឋរិះគន់នៅក្នុងអង្គប្រជុំបែបនេះ ខ្ញុំមានការឈឺចាប់ខ្លាំងណាស់ ថែមទាំងខ្មាសពលរដ្ឋស្ទើរងើបមុខមិនរួចទៀតផង…រហូតមកដល់ពេលនេះខ្ញុំនៅតែឈឺចាប់និងខ្មាសពលរដ្ឋ ដោយសារតែបនល្បែងនេះមិនត្រូវបានគេបង្ក្រាប ។ ដូច្នេះ ខ្ញុំមានតែពឹងលើអ្នកសារព័ត៌មានទេ…ដើម្បីជួយផ្សព្វផ្សាយក្រែងបានជ្រាបដល់ថ្នាក់លើជួយដោះស្រាយ ព្រោះបើពឹងលើថ្នាក់ដឹកនាំស្រុកសំឡូត មិនអាចដោះស្រាយចេញឡើយ រីឯពលរដ្ឋនៅតែតិះដៀលអាជ្ញាធរឃុំដដែល…។
កោះសន្តិភាពមិនអាចធ្វើទំនាក់ទំនងទៅលោកសើ សាម៉េត អភិបាលស្រុកសំឡូត ដើម្បីបំភ្លឺករណីនេះបានទេ នៅរសៀលថ្ងៃទី១៧ ខែតុលា ។ ប៉ុន្តែលោក កោ ស៊ុនកាំង អធិការនគរបាលស្រុកសំឡូតបានឆ្លើយតបនឹងការលើកឡើងរបស់លោកមេឃុំស៊ុងថា កន្លងមកមិនមែនលោកមិនធ្វើទេ គឺក្រោយពីលោកមេឃុំបានលើកឡើងអំពីបញ្ហានេះ លោកបានហៅម្ចាស់ទីតាំងដែលជាមន្ត្រីនគរបាលនោះមកធ្វើកិច្ចសន្យាដើម្បីបញ្ឍប់ ។ ប៉ុន្តែ ផ្ទុយពីការឆ្លើយតបរបស់លោក កោ ស៊ុនកាំង លោក ព្រំ តុល ជំទប់ទី១ឃុំ និងលោកប៉ុម ម៉ុន មេឃុំស៊ុង បានអះអាងថា អាជ្ញាធរឃុំ ធ្លាប់បានចេញលិខិតកោះហៅម្ចាស់បនល្បែងឈ្មោះ ស៊ូ គឹមអាននេះមកធ្វើកិច្ចសន្យាបញ្ឍប់ តែជននេះគេចវេះមិនព្រមចូលខ្លួនមកសាលាឃុំឡើយ ។ រហូតមកដល់បច្ចុប្បន្ន ទីតាំងល្បែងនេះនៅតែដំណើរការយ៉ាងរលូនដដែល ។
លោកមេឃុំរូបនេះបានព្រមានថា ប្រសិនបើលោកប្រមូលបានវត្ថុតាង លោកនឹងឡើងទៅប្ដឹងលោកអភិបាលខេត្ត និងលោកស្នងការនគរបាលខេត្តដោយផ្ទាល់តែម្ដង ដើម្បីសុំអន្តរាគមន៍ ព្រោះបើពឹងលើ
ថ្នាក់ស្រុកគ្មានប្រយោជន៍ទេ ។ជាមួយនឹងបនល្បែងស៊ីសងរបស់មន្ត្រីនគរបាលឈ្មោះស៊ូ គឹមអាន នៅស្រុកសំឡូតនេះនៅឯស្រុកសំពៅលូនឯណោះវិញ ប្រភពព័ត៌មានបានរាយការណ៍ដែរថា បនល្បែងដុះស្លែដ៏ធំមួយកន្លែងដែលគេដឹងថា មានឈ្មោះមន្ត្រីកងរាជអាវុធហត្ថស្រុកម្នាក់ជាខ្នងបង្អែកផង ក្នុងចំណោមមេល្បែងចំនួន៣នាក់ ក៏កំពុងប្រព្រឹត្តយ៉ាងវក់វីដែរ ដោយគ្មានការទប់ស្កាត់ឬចុះបង្ក្រាបពីកម្លាំងសមត្ថកិច្ចឡើយ ។ ប្រភពព័ត៌មានឲ្យដឹងទៀតថា ទីតាំងល្បែងអាប៉ោងដ៏ធំនោះ ស្ថិតនៅក្បែរស្ពានមួយ ក្នុងភូមិគីឡូ១២ ឃុំសន្តិភាព ស្រុកសំពៅលូន ។ បនល្បែងនេះត្រូវគេដឹងថា មានភាគហ៊ុនចំនួន៣នាក់ គឺឈ្មោះតាយេន ជាមន្ត្រីប៉េអឹមស្រុក ឈ្មោះតាក្រឹម ជាពលរដ្ឋ និងឈ្មោះព្រីង ជាពលរដ្ឋ ។ បនល្បែងនេះកំពុងបើកលេងនៅផ្ទះឈ្មោះក្រឹម ហៅតាក្រឹម និងពេលខ្លះចល័តទីតាំងដែរ តែគ្មានការរំខានដល់សមត្ថកិច្ចឡើយ។
មហាជនបានស្គាល់យ៉ាងច្បាស់អំពីសកម្មភាពក្រុមអ្នកញៀនល្បែងទាំងនេះ ដែលគេសង្ស័យមានជាប់ពាក់ព័ន្ធនឹងមន្ត្រីមួយចំនួននៅក្នុងស្រុកសំពៅលូនផង ដូច្នេះហើយទើបគ្មានការបង្ក្រាប ។ លោក ពេជ្រ សារ៉ែន អធិការនគរបាលស្រុកសំពៅលូន ធ្លាប់បានប្រាប់ថា ក្រុមអ្នកប្រព្រឹត្តល្បែងទាំងនោះ តែងនាំគ្នាបោះទីតាំងលេងចល័ត ជាហេតុធ្វើឲ្យសមត្ថកិច្ចជួបការលំបាកក្នុងការចុះបង្ក្រាប ។ ប៉ុន្តែមហាជនបានផ្ដល់ជាមតិជុំវិញវិធានការបង្ក្រាបដូច្នេះថា ប្រសិនបើសមត្ថកិច្ចមានឆន្ទៈក្នុងការបង្ក្រាបបនល្បែងរបស់លោកប៉េអឹមឈ្មោះតាយេន តាក្រឹម និងពូព្រីង នេះមែនវាមិនពិបាកទេ ដោយគ្រាន់តែអញ្ជើញមេៗល្បែងទាំងនោះមកសួរនាំធ្វើកិច្ចសន្យាបញ្ឈប់ទៅជាការស្រេចហើយ ព្រោះនៅក្នុងស្រុកសំពៅលូន អ្នកណាក៏ស្គាល់ដង្ខៅល្បែងដុះស្លែទាំង៣នាក់នេះដែរ ៕
ចែករំលែកព័តមាននេះ