រាជធានីភ្នំពេញ ៖ ឃ្លាំងចំហុយកាវមួយកន្លែងត្រូវទុស្សេខ្សែភ្លើងឆាបឆេះត្រូវបានកម្មករ និងថៅកែជនជាតិចិនជួយពន្លត់ទាន់ពេលវេលា ដែលបង្កឲ្យមានការភ្ញាក់ផ្អើលកាលវេលាម៉ោង១១យប់ ថ្ងៃទី១៧ ខែតុលា ឆ្នាំ២០១៨ នៅរោងចក្រ (See want color pinging co ltd) ស្ថិតក្នុងភូមិស្រែជំរៅ សង្កាត់ ចោមចៅទី២ ខណ្ឌពោធិ៍ពោធិសែនជ័យ ។
តាមប្រភពព័ត៌មានពីកម្មករជនជាតិខ្មែរម្នាក់បានឲ្យដឹងថា នៅមុនពេលកើតហេតុមានលឺសំឡេងទុស្សេខ្សែភ្លើងនៅក្នុងឃ្លាំងឡចំហុយកាវ បន្ទាប់មកមានអណ្តាតភ្លើងឆាបឆេះយ៉ាងសន្ធោសន្ធៅ ភ្លាមៗនោះមានកម្មករប្រមាណ ៦ទៅ៧នាក់ និងជនជាតិចិនដែលមិនចេះនិយាយភាសាខ្មែរ បាននាំគ្នាយកបំពង់ពន្លត់អគ្គិភ័យមកជួយបាញ់ពន្លត់ភ្លើងខាងលើ ដោយប្រើអស់រយៈពេលជិត១ម៉ោងទើបរលត់ ។ កម្មករខាងលើបានបន្តទៀតថា បំពង់ដែលពន្លត់អស់៣៤បំពង់ ក្នុងនោះបំពង់ធំចំនួន៤ផងដែរ ភ្លើងឆេះនៅតែឆេះ ហើយបំពង់ពន្លត់អគ្គិភ័យអស់ពួកគាត់បានយកទឹកមកពន្លត់បន្ថែមទៀតទើបរលត់អស់ ។
ចំណែកនគរបាលបានឲ្យដឹងថា បន្ទាប់ពីដឹងដំណឹងថា អគ្គិភ័យកំពុងឆាបឆេះរោងចក្រខាងលើភ្លាមៗបានហៅរថយន្តពន្លត់អគ្គិភ័យនៃស្នងការនគរបាលរាជធានីភ្នំពេញចំនួន២គ្រឿងមកជួយបាញ់ទឹកពន្លត់ ពេលមកដល់ទីតាំងខាងលើបានរលត់បាត់ទៅហើយ ។ ដោយឡែកជនជាតិចិនដែលសម្រាកនៅក្នុងរោងចក្រខាងលើ ពេលសមត្ថកិច្ចនឹងរថយន្តពន្លត់អគ្គិភ័យ មកដល់បាននាំគ្នាគេចខ្លួនអស់ ហើយសមត្ថកិច្ចចង់សួរនាំបំភ្លឺ ករណីខាងលើក៏មិនកើត ព្រោះមិនមាននាក់បកប្រែទេ ។
ក្រោយពេលកើតហេតុសមត្ថកិច្ចនឹងរថយន្តពន្លត់អគ្គិភ័យបានត្រឡប់ទៅ ភ្លាមៗផងដែរ ព្រោះមិនមាននាក់បំភ្លឺក្នុងករណីនោះឡើយ ៕
ចែករំលែកព័តមាននេះ