រាជធានីភ្នំពេញ ៖ តំណាងរដ្ឋសភាកម្ពុជាបានបង្ហាញប្រាប់មហាសន្និបាតសហភាពអន្តរសភា(IPU) ពីដំណើរប្រជាធិបតេយ្យ និងភាពរីកចម្រើនមិនដូចជា ការលើកឡើងរបស់មួយចំនួ នោះទេ ។ ក្នុងនាមគណៈប្រតិភូសភាកម្ពុជាជាផ្លូវការ និងពេញសិទ្ធិចូលរួមមហាសន្និបាតលើកទី១៣៩…
រាជធានីភ្នំពេញ ៖ តំណាងរដ្ឋសភាកម្ពុជាបានបង្ហាញប្រាប់មហាសន្និបាតសហភាពអន្តរសភា(IPU) ពីដំណើរប្រជាធិបតេយ្យ និងភាពរីកចម្រើនមិនដូចជា ការលើកឡើងរបស់មួយចំនួ នោះទេ ។
ក្នុងនាមគណៈប្រតិភូសភាកម្ពុជាជាផ្លូវការ និងពេញសិទ្ធិចូលរួមមហាសន្និបាតលើកទី១៣៩ ដែលកំពុងប្រព្រឹត្តធ្វើនៅទីក្រុងហ្សឺណែវប្រទេសស្វីសលោកស្រី ឃួន សុដារី អនុប្រធានទី២ នៃរដ្ឋសភា និងជាប្រធានគណៈប្រតិភូសភាកម្ពុជាបានជម្រាបមហាសន្និបាតសហភាពអន្តរសភាដែលហៅកាត់ថា IPU ពីការរីកចម្រើន និងដំណើរការលិទ្ធិប្រជាធិបតេយ្យនៅកម្ពុជាថា ដល់សមាជិក IPU បានដឹងកាន់តែច្បាស់ ។
យោងតាមបណ្តាញសង្គមហ្វេសប៊ុកផ្លូវការរបស់លោកស្រី អនុប្រធានទី២ រដ្ឋសភា នៅថ្ងៃទី១៧ តុលានេះ លោកស្រីបានលើកឡើងថាពីអតីតកាលកម្ពុជាត្រូវបានពិភពលោកស្គាល់ថា វាលពិឃាដ តែបច្ចុប្បន្នប្រទេសកម្ពុជាត្រូវបានល្បីឈ្មោះថា ជាគោលដៅទេសចរក្នុងតំបន់ អាស៊ីអាគ្នេយ៍ ។ ជាងនេះទៀតប្រទេសកម្ពុជាតែងតែបានស្វាគមន៍ភ្ញៀវទេសចរជាង៥លាន នាក់ជារៀងរាល់ឆ្នាំ និងមានកំណើនជាប្រចាំទៀតផង ។ ប្រធានគណៈប្រតិភូសភាកម្ពុជាបានគូសបញ្ជាក់ថា កាលពីមុនប្រទេសកម្ពុជាត្រូវបានគេដាក់ស្លាកឲ្យថា ជាប្រទេសមិនមានការអភិវឌ្ឍសេដ្ឋកិច្ចឡើយ តែឥឡូវនេះបែរជាគេទទួលស្គាល់ថា ជាប្រទេសមួយមានកំណើនសេដ្ឋកិច្ចលឿនបំផុត ក្នុងពិភពលោកហើយថ្មីៗនេះបានជាប់ចំណាត់ថ្នាក់ដោយជោគជ័យថា ជាប្រទេសមានកំណើនចំណូលទាបឋិតក្នុងអត្រាកំណើន៧%ជាប្រចាំឆ្នាំ ។
លោកស្រីបានបន្តថា បន្ទាប់ពីបានបញ្ចប់សង្គ្រាមស៊ីវិលជាង៣ទស្សវត្សក្នុងឆ្នាំ១៩៩៨ មក សិទ្ធិនយោបាយសិទ្ធិមនុស្សក្នុងប្រទេសកម្ពុជាត្រូវបានទទួលស្គាល់ និងការពារយ៉ាងទូលំទូលាយព្រមទាំងជំរុញឥតឈប់ឈរ ។ ប្រទេសកម្ពុជាជាប្រទេសដែលគោរពសិទ្ធិមនុស្ស និងសេចក្តីថ្លៃថ្នូររបស់ប្រជាពលរដ្ឋ ហេតុដូច្នេះកម្ពុជាបានតាក់តែងដាក់បញ្ចូលសេចក្តីប្រកាស ជាសកលនៃការគោរពសិទ្ធិក្នុងរដ្ឋធម្មនុញ្ញ ។ ប្រទេសកម្ពុជា គឺជាកន្លែងមួយដែលសមាគមន៍ជាតិ និងអន្តរជាតិប្រមាណ៦០០០បានចុះបញ្ជីហើយនឹងមានអង្គការក្រៅរដ្ឋាភិបាលព្រមទាំង សហជីពចំនួន៤០០០ទៀត បើគិតមកដល់ខែឧសភា ឆ្នាំ២០១៨នេះ ។ លោកស្រីបន្ថែមថា បើប្រៀបធៀបទៅនឹងប្រទេសជិតខាងវាមានចំនួនតួលេខលើសលប់ ។ គណបក្សនយោបាយច្រើនកំពុងអនុវត្តសកម្មភាពរបស់ខ្លួនស្របតាមរដ្ឋធម្មនុញ្ញ និងអនុលោមតាមគោលការណ៍លទ្ធិប្រជាធិបតេយ្យសេរីពហុបក្ស ។ លោកស្រីគូសបញ្ជាក់ថា«សន្តិភាពបើគ្មានការអភិវឌ្ឍ គឺមិនអាចមានស្ថេភាពបានទេ ។ ប្រទេសកម្ពុជាឥឡូវជាប្រទេសមួយដែលគោរពយ៉ាងមុតមាំនូវគោលការណ៍លទ្ធិប្រជាធិបតេយ្យសេរីពហុបក្សដោយមានការបោះឆ្នោតដោយសេរី និងយុត្តិធម៌ដែលឱ្យប្រជាពលរដ្ឋជ្រើសរើសមេដឹកនាំរបស់ខ្លួនបាន ។ យើង គឺជារដ្ឋអធិបតេយ្យ ឯករាជ្យបូរណភាពដែនដីពេញលេញមួយដែលគ្រប់គ្រងដោយច្បាប់ ហើយនិយាយរួម គឺជានីតិរដ្ឋ» ។
សូមជម្រាបថា សហភាពអន្តរសភាដែលហៅកាត់ថា IPU ជាអង្គការសភាដ៏ធំមួយដែលមានសភាមកពីប្រទេសនានាជុំវិញពិភពលោកចំនួន១៧៣ជាសមាជិក ។ មហាសន្និបាតលើកទី១៣៩ របស់ IPU នាឱកាសនេះប្រារព្ធធ្វើឡើងក្រោមប្រធានបទ«ភាពជាអ្នកដឹកនាំរបស់សភាក្នុងការជម្រុញសន្តិភាព និងជម្រុញឱ្យមានការបង្កើតអ្វីថ្មីៗ (នវានុវត្តន៍) និងការផ្លាស់ប្តូរបច្ចេកវិទ្យាថ្មីៗនាយុគសម័យថ្មី ៕
ចែករំលែកព័តមាននេះ