រាជធានីភ្នំពេញ ៖ គ្មានអ្នកណាមិនដឹងនោះទេថាកីឡាការិនីល្បីឈ្មោះ កញ្ញា អេ យ៉ានុត បានបោះជំហានក្លាយជាអ្នកប្រដាល់សេរីតាំងពីវ័យ១៣ឆ្នាំ ដោយនាងក៏ប្រឹងពុះពារវិវត្តន៍ខ្លួនក្លាយជាកីឡាការិនីផ្នែកប្រដាល់សាកល វ៉ូវីណាម និងល្បុក្កតោ យ៉ាងគួរឱ្យសរសើរផងដែរ ប៉ុន្តែគេនៅតែកត់សម្គាល់ថា នាងមិនទាន់ទទួលជោគជ័យលើផ្នែកណាមួយដែលនាងផ្លាស់ប្ដូរនៅឡើយ ខណៈពេលនេះនាងក៏បានបំលាស់ខ្លួនក្លាយជាតារាសម្ដែងដែលមិនធ្លាប់មានចំណូលចិត្តក៏នៅតែមិនទាន់ជោគជ័យតាមការចង់បាន ។
យ៉ាងណាមិញ លោក អេ ភូថង ដែលរមែងប្រកាន់ជំហរមិនឱ្យកូនស្រីដកខ្លួនពីកីឡានៅតែអះអាងថា ខ្លួនគាំទ្រកូនស្រីគ្រប់ទម្រង់ មិនថាកូនស្រីចង់ក្លាយជាអ្នកប្រដាល់សេរី ប្រដាល់សាកល ល្បុក្កតោ ឬជាតារាសម្ដែងនោះទេ ដោយលោកបានប្រើពាក្យថា ឱ្យតែកូនស្រីអាចរកលុយបានគឺលោកគាំទ្រ។
មកទល់ពេលនេះ ភាពយន្តរឿង«កញ្ញាជើងខ្លាំង» ដែលកីឡាការិនី អេ យ៉ានុត បានសម្ដែង ត្រូវបានបញ្ចប់ និងចាក់ផ្សាយនៅលើកញ្ចក់ទូរទស្សន៍ហើយ ដោយភាពយន្តរបស់នាងក៏ទទួលបានជោគជ័យផងដែរ ។ ប៉ុន្តែកីឡាការិនីនេះ នៅតែមិនទាន់ទទួលបានទីផ្សារណាមួយគួរឱ្យទាក់ទាញនោះទេ ដោយនាងបញ្ជាក់ថា ក្រោយពីសម្ដែងបាន១រឿង ផលិតករផ្សេងទៀតហាក់មិនសូវចាប់អារម្មណ៍ផ្ដល់ឱកាសឱ្យនាងសម្ដែងបានច្រើនប៉ុន្មានឡើយ ដែលធ្វើឱ្យនាងយល់ថា ខ្លួននៅទ្រឹង ។
នាងថាមិនមែនជារឿងងាយស្រួលនោះទេទម្រាំតែអាចសុំឪពុកចូលសម្ដែងបាន អ៊ីចឹងហើយទើបនាងយល់ថា បើការងារសម្ដែងនៅតែមិនអាចធ្វើឱ្យខ្លួនទទួលបានជោគជ័យខ្លាំងទៀត នោះគឺជារឿងមួយពិបាក ។ យ៉ាងណាមិញ នាងថាមិនបាក់ទឹកចិត្តនោះទេ ដោយសារតែឪពុករបស់ខ្លួនទម្រាំតែបានទទួលជោគជ័យក៏ត្រូវប្រើពេលច្រើនគួរសមដែរ ។ កញ្ញាថា កាលពីមុនឪពុកបានប្រកាសយ៉ាងដាច់អហង្ការមិនឱ្យនាងសម្ដែងហើយបោះបង់កីឡានោះទេ ដោយសារតែលោកបារម្ភខ្លាចនាងសប្បាយនឹងការតែងខ្លួន ក្នុងអាជីពសម្ដែង ហើយឈប់ចង់ងាកទៅរកការប្រដាល់ ។
ក្នុងនោះសូម្បីតែម្ដាយរបស់នាងដែលជាគ្រូបង្វឹកកីឡាករ និងជាអាជ្ញាកណ្ដាលនៅប៉ុស្ដិ៍បាយ័ន ក៏មិនសូវចង់ឱ្យនាងសម្ដែងដែរព្រោះចង់ឱ្យនាងបន្តស្នងការប្រដាល់ និងអាជីពកីឡាផ្សេងទៀត ក្នុងពេលដែលម្ដាយនាងក៏ចង់ឱ្យនាងក្លាយជាគ្រូបង្វឹកកីឡាច្រើនជាងការសម្ដែង ។
នាងអះអាងថា ការប្រដាល់នាពេលកន្លងមក បើទោះជាមានចំណូលចិត្តផ្សំ តែក៏មានការជំរុញ និងបង្គាប់ពីឪពុកម្ដាយមួយផ្នែកផងដែរ ស្របគ្នាដែលនាងក៏ចង់បានប្រាក់ចំណូលផ្ទាល់ខ្លួនច្រើនជាង ទើបប្រឹងឡើងប្រកួតទាំងវ័យក្មេង ដើម្បីបន្ថយបន្ទុករបស់គ្រួសារ ។ អ៊ីចឹងហើយទើបគ្រាន់តែមានឱកាសសម្ដែងភាពយន្ត គឺនាងរំពឹងតែម្ដងថាខ្លួននឹងអាចរកលុយពីការងារថ្មីមួយនេះបានច្រើនជាងកីឡា តែចុងក្រោយក្រោយសម្ដែងបានមួយរឿង គឺហាក់ស្ងប់ស្ងាត់ ដែលធ្វើឱ្យនាងយល់ថានៅទ្រឹងលើអាជីពមួយនេះ មិនខុសគ្នានឹងការប្រដាល់ដែលនាងតស៊ូកន្លងមក ។
នាងថា សប្បាយចិត្តណាស់ ទម្រាំអាចកែប្រែជំហរលោក អេ ភូថង ដែលជាអ្នកមានឥទ្ធិពលជាងគេនៅក្នុងជីវិតរបស់នាង ឱ្យទទួលយកជម្រើសរបស់នាងឈោងចាប់អាជីពសម្ដែង ក្នុងរឿង«កញ្ញាជើងខ្លាំង» ដោយនាងរំពឹងថា តាមរយៈការសម្ដែងមួយរឿងនេះ គឺនាងមានទីផ្សារសម្ដែងច្រើនទៀត ប៉ុន្តែចុងក្រោយបែរជាស្ងប់ស្ងាត់ទៅវិញ។
អ្វីដែលនាងបារម្ភ គឺលោកឪពុកបានជំរុញឱ្យនាងលាឈប់កីឡា ដោយរំពឹងថានឹងមានទីផ្សារសម្ដែងជំនួស អ៊ីចឹងហើយទើបនាងអាចនឹងពិបាកបើអាជីពកីឡាក៏មិនសូវទៅមុខរលូន ហើយងាកមកការសម្ដែងក៏ស្ងាត់ក្រោយបានតំណែងមួយរឿងនៅប៉ុស្ដិ៍លេខ៥នោះទៀត ។ ទោះបីយ៉ាងណា នាងថាសប្បាយចិត្តដែលលោក អេ ភូថង ឈប់ដាក់សម្ពាធឱ្យខ្លួន ដោយនាងចង់សម្ដែងក៏បាន ហើយចង់ឈប់សម្ដែងងាកទៅស៊ប់នឹងកីឡាវិញក៏បាន ។
នាងនិយាយថា «សម្រាប់ខ្ញុំពិតជាចង់ជោគជ័យក្នុងអាជីពសម្ដែងណាស់ ដល់បានតែមួយរឿងបែរជានៅទ្រឹង ទើបចង់ខ្មាសប៉ា ព្រោះធ្លាប់ប្រាប់គាត់ថា អត់ចង់ប្រដាល់ទេ ចង់សម្ដែងឱ្យស្រួលខ្លួន តែដល់ពេលអ៊ីចឹង គឺមានតែដើរតាមជំហានៗ ហើយបែបប្រដាល់ផង សម្ដែងផង អីហ្នឹងឯង!»។ នាងថា ខ្លួនកាន់តែមានវ័យច្រើន មិនចង់បន្តប្រដាល់ទេ ប៉ុន្តែបើស្ថានភាពបែបហ្នឹងគឺមានតែចាប់ខាងនេះខ្លះខាងនោះខ្លះប៉ុណ្ណោះ។
លោក អេ ភូថង និយាយថា កូនស្រីរបស់លោកដ្បិតថានៅវ័យក្មេង តែនាងមានការតាំងចិត្តខ្ពស់មិនខុសពីមនុស្សពេញវ័យនោះទេ។ លោកថា នាងតស៊ូតាំងពីប្រដាល់រហូតដល់ក្លាយជាអ្នកសម្ដែង ។ ដូច្នេះបើការងារសម្ដែងចុងក្រោយមិនសូវទទួលជោគជ័យ ក៏លោកនឹងជំរុញលើផ្នែកកីឡាវិញដែរ ដើម្បីឱ្យនាងអាចរកចំណូលបាន គ្រាន់មិនពិបាកដល់លោកក្នុងពេលដែលលោកក៏កាន់តែចាស់មិនអាចរកលុយបានស្រួលដូចមុន ។
លោកថា៖«ពីមុនខ្ញុំចេះតែឱ្យកូនប្រដាល់ទៅគ្រាន់បានលុយទប់គ្រួសារ ប៉ុន្តែបើគាត់មានគេហៅថត ឬមានការអីផ្សេង មិនឱ្យគាត់បន្តទេ ព្រោះកូនយើងកាន់តែធំ ពិបាកដែររឿងប្រដាល់ហ្នឹង ហើយបើបែរជាគាត់សម្ដែងមិនសូវមានការហៅថត ឱ្យគាត់បង្វឹកក្មេង ឬប្រដាល់អីវិញខ្លះចឹងទៅ!»។
លោកទទូចឱ្យផលិតករផ្ដល់ឱកាសដល់កូនស្រីលោកប្រឡូកការសម្ដែងបានច្រើន ដើម្បីឱ្យនាងអាចរកបានចំណូលមួយខ្ពស់ ក្នុងពេលដែលលោកក៏យល់ថា អេ យ៉ានុត ជាកូនស្រី បើបានក្លាយជាអ្នកសម្ដែងគឺល្អជាងចាប់អាជីពប្រដាល់កន្លងមក៕
ចែករំលែកព័តមាននេះ