រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានឹងអញ្ជើញទៅបំពេញទស្សនកិច្ចការងារនៅសាធារណរដ្ឋតួកគីពីថ្ងៃទី២០ដល់ថ្ងៃទី២២ ខែតុលា ឆ្នាំ២០១៨ តបតាមការអញ្ជើញរបស់រដ្ឋាភិបាលតួកគី ។…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជានឹងអញ្ជើញទៅបំពេញទស្សនកិច្ចការងារនៅសាធារណរដ្ឋតួកគីពីថ្ងៃទី២០ដល់ថ្ងៃទី២២ ខែតុលា ឆ្នាំ២០១៨ តបតាមការអញ្ជើញរបស់រដ្ឋាភិបាលតួកគី ។
សម្រាប់ដំណើរទស្សនៈកិច្ចនោះភាគីកម្ពុជា និងតួកគីក៏នឹងមានការចុះអនុស្សរណៈយោគយល់ចំនួនផងដែរ ។ នេះបើតាមសេចក្ដីជូនដំណឹងរបស់ក្រសួងការបរទេសខ្មែរនៅថ្ងៃទី១៧ ខែតុលា ឆ្នាំ២០១៨ ។ យោងតាមសេចក្តីជូនដំណឹងដដែលបានឲ្យដឹងថា នៅទីក្រុងអ៊ីស្តង់ប៊ុល សម្តេចតេជោនឹងជួបប្រជុំទ្វេភាគីជាមួយលោករ៉េជីបថាយយ៉ីបអ៊ែរឌូហ្គាន់ ប្រធានាធិបតីនៃសាធារណរដ្ឋតួកគីដែលនៅក្នុងឱកាសនោះថ្នាក់ដឹកនាំទាំងពីរនឹងពិភាក្សាផ្លាស់ប្តូរទស្សនគ្នាសំដៅស្វែងរកលទ្ធភាពពង្រឹង និងពង្រីកបន្ថែមទៀតនូវកិច្ចសហប្រតិបត្តិការទ្វេភាគី ដើម្បីនាំមកនូវផលប្រយោជន៍រួម ជូនប្រជាជន និងប្រទេសទាំងពីរ ។ ជាមួយគ្នានោះក៏មានកិច្ចព្រមព្រៀងអនុស្សរណៈនៃការយោគយល់គ្នាមួយចំនួនក៏ត្រូវបានគ្រោងនឹងចុះហត្ថលេខាផងដែរ ដោយផ្តោតលើកិច្ចសហប្រតិបត្តិការក្នុងវិស័យវប្បធម៌ អប់រំ កីឡា កសិកម្ម ធនធានទឹក ទេសចរណ៍ វិនិយោគ និងសកម្មភាពកំចាត់មីន ។
ប្រភពបន្តថា នៅក្នុងអំឡុងពេលស្នាក់នៅទីក្រុងអ៊ីស្តង់ប៊ុល សម្តេចតេជោ នឹងអញ្ជើញចូលជួបសម្តែងការគួរសមជាមួយ លោក ប៊ីណាលី យីលឌីរីម ប្រធានរដ្ឋសភាតួកគី ។ សម្តេចតេជោនាយករដ្ឋមន្ត្រីនឹងអញ្ជើញចូលរួម និងថ្លែងសុន្ទរកថា ក្នុងពិធីបើកវេទិកាធុរកិច្ចកម្ពុជា-តួកគី ក្នុងគោលបំណងលើកទឹកចិត្តធុរជនតួកគីមកវិនិយោគនៅកម្ពុជា ។
គួររំលឹកថា កម្ពុជានឹងបើកស្ថានឯកអគ្គរាជទូតរបស់ខ្លួនប្រចាំនៅទីក្រុងអង់ការ៉ានៅឆ្នាំ២០១៩ ។ ប្រទេសទាំងពីរប្តេជ្ញានឹងបង្កើនទំហំពាណិជ្ជកម្មទ្វេភាគីឲ្យដល់ចំនួន៥០០លានដុល្លារអាមេរិកក្នុងប៉ុន្មានឆ្នាំខាងមុខនេះ ។ នៅក្រៅទស្សនកិច្ចនេះសម្តេចតេជោនឹងទទួលជួបសិស្ស-និស្សិតកម្ពុជា ដែលកំពុងសិក្សានៅប្រទេសតួកគីព្រមទាំងអញ្ជើញទស្សនាទីកន្លែងប្រវត្តិសាស្ត្រមួយចំនួនផងដែរ ។
សូមជម្រាបថា សម្រាប់ការអញ្ជើញអមដំណើរសម្តេចតេជោនៅតួកគីមានលោកប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិលោកស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូនលោកថោង ខុន រដ្ឋមន្ត្រីក្រសួងទេសចរព្រមទាំងឥស្សរៈជនជាន់ខ្ពស់នៃរាជរដ្ឋាភិបាល និងថ្នាក់ដឹកនាំធុរកិច្ចនៃសភាពាណិជ្ជកម្មកម្ពុជាផងដែរ ៕
ចែករំលែកព័តមាននេះ