រាជធានីភ្នំពេញ ៖ នៅថ្ងៃទី២៣ ខែតុលា ឆ្នាំ២០១៨ ខាងមុខនេះ គឺជាខួប២៧ឆ្នាំ នៃការឯកភាពគ្នា រវាងខ្មែរ និងខ្មែរក្នុងការឯកភាពគ្នាឈានដល់បញ្ចប់សង្គ្រាម ហើយនាំមកនូវសន្តិភាពវិញដែលគេឲ្យឈ្មោះថា «កិច្ចព្រមព្រៀងទីក្រុងប៉ារីស ២៣ តុលា ឆ្នាំ១៩៩១» ។
បើគិតចាប់ពីថ្ងៃទី២៣ ខែតុលា ឆ្នាំ១៩៩១ រហូតមកដល់ថ្ងៃទី២៣ តុលា ឆ្នាំ២០១៨នេះ គឺជា២៧ឆ្នាំ ហើយនៃកិច្ចព្រមព្រៀងទីក្រុងប៉ារីស ។ លោកសុខ ឥសាន មន្ត្រីជាន់ខ្ពស់ និងជាអ្នកនាំពាក្យគណបក្សប្រជាជនកម្ពុជាបានឲ្យដឹងនៅថ្ងៃទី១៧ តុលានេះថា ក្រោយថ្ងៃជ័យជំនះ៧មករា ១៩៧៩ ទោះបីសាធារណរដ្ឋប្រជាមានិតកម្ពុជាកាន់កាប់ប្រជាជន និងទឹកដីជាង៨០ភាគរយ ក៏ប៉ុន្តែដោយមិនចង់ឃើញទុក្ខលំបាករបស់ប្រជាជនកម្ពុជាដោយសារសង្គ្រាមទើបគណបក្សប្រជាជនកម្ពុជាបានដាក់ចេញនូវនយោបាយបង្រួបបង្រួមជាតិស្វែងរកការចរចាដើម្បីបញ្ចប់សង្គ្រាមនាំមកនូវសន្តិភាពជូនជាតិមាតុភូមិកម្ពុជា និងប្រជាជនកម្ពុជាដែលនាំឲ្យមានការជួបចរចារវាងសម្តេចព្រះនរោត្តមសីហនុ និងប្រធានរដ្ឋាភិបាលចំរុះត្រីភាគីនៅជាយដែន និងសម្តេចតេជោហ៊ុន សែន តំណាងរដ្ឋាភិបាលសាធារណរដ្ឋប្រជាមានិតកម្ពុជា ។
លោកក៏បានលើកឡើងថា ដើម្បីឲ្យបានសម្រេចការអនុវត្តកិច្ចព្រមព្រៀងនេះត្រូវមានយន្តការមួយហៅថា អាជ្ញាធរបណ្តោះអាសន្នអសបហៅកាត់ថា អ៊ុនតាក់ និងមានក្រុមប្រឹក្សាជាតិជាន់ខ្ពស់កម្ពុជា (SNC) ជាតំណាងអធិបតេយ្យភាពកម្ពុជាចាត់ចែងបណ្តាការងារសំដៅសម្រេចកិច្ចព្រមព្រៀងរួមមាន១- ការដកកងទ័ពបរទេសទាំងអស់ចេញពីកម្ពុជាដោយមានការត្រួតពិនិត្យជាអន្តរជាតិ ។ ២- ការធ្វើមាតុភូមិនិវត្តន៍ជនភៀសខ្លួន នៅក្រៅប្រទេសមកក្នុងកម្ពុជាវិញ ដោយមានការត្រួតពិនិត្យពីអសបពីបញ្ហាសិទ្ធិមនុស្សការរើសអើងជាតិសាសន៍ និងការសងសឹក ។ ៣ – ការរៀបចំការបោះឆ្នោតដោយសេរីត្រឹមត្រូវ និងយុត្តិធម៌ដោយអ៊ុនតាក់ ដើម្បីបង្កើតសភាធម្មនុញ្ញតាក់តែងរដ្ឋធម្មនុញ្ញមួយសម្រាប់កម្ពុជារួច ហើយនឹងក្លាយទៅជារដ្ឋសភាជាតិនីតិកាលទី១ ។ ៤- ការធានាជាអន្តរជាតិនូវឯករាជ្យអធិបតេយ្យភាព និងភាពមិនអាចបំបែកបាននៃកម្ពុជា ។ ៥- ការស្តារ និងកសាងប្រទេសកម្ពុជាឡើងវិញក្រោមការសន្យារបស់បណ្តាប្រទេសជាហត្ថលេខីនៃកិច្ចព្រមព្រៀង ។
លោកបញ្ជាក់ថា ក្រោយការបោះឆ្នោតនៅឆ្នាំ១៩៩៣រៀបចំដោយអ៊ុនតាក់ បង្កើតរាជរដ្ឋាភិបាលកម្ពុជានីតិកាលទី១រួចហើយ កម្លាំងអ៊ុនតាក់ទាំងអស់ត្រូវដកចេញពីកម្ពុជា ។ បណ្តាចំណុចសំខាន់ៗនៃកិច្ចព្រមព្រៀងនឹងត្រូវបញ្ចូលទៅក្នុងខ្លឹមសារនៃរដ្ឋធម្មនុញ្ញនៃព្រះរាជាណាចក្រកម្ពុជារួមមាន របបនយោបាយប្រជាធិបតេយ្យសេរីពហុបក្ស របបរាជានិយមអាស្រ័យរដ្ឋធម្មនុញ្ញ ,អំណាចទាំងបី នីតិបញ្ញត្តិ នីតិប្រតិបត្តិ និងតុលាការចែកដាច់ពីគ្នា និងមានតុល្យភាព , ធានាការគោរពធម្មនុញ្ញអសប និងកតិកាសញ្ញាអន្តរជាតិស្តីពីសិទ្ធិមនុស្សសិទ្ធិ កុមារ និងស្ត្រី ការរំលោភបំពានរាងកាយ និងការធ្វើទារុណកម្មត្រូវលុបំបាត់ និងហាមឃាត់ ។
ចំណែកលោកយ៉ែម បុញ្ញាឬទ្ធិ អតីតអ្នកនាំពាក្យគណបក្សសង្គ្រោះជាតិបានលើកឡើងលើ បណ្តាញសង្គមហ្វេសប៊ុកយ៉ាងដូច្នេះថា ស្មារតីនៃកិច្ចព្រមព្រៀងសន្តិភាពទីក្រុងប៉ារីស២៣ តុលា ១៩៩១ ដែលខ្មែរគ្រប់ភាគីចុះហត្ថលេខាឯកភាពបានផ្ដល់ដល់កម្ពុជានូវការទទួលបាន ពីស្ថាប័នហិរញ្ញវត្ថុអន្តរជាតិ និងប្រទេសជាមិត្តផ្ដល់ជំនួយឥតសំណងប្រាក់កម្ចីសម្បទានជាមួ យការប្រាក់ទាប ដើម្បីអភិវឌ្ឍន៍ស្ដារកម្ពុជាឡើងវិញ និងដោះស្រាយបញ្ហាផ្សេងៗទៀត ជាមួយនឹងការតម្រូវឱ្យមានការផ្សះផ្សាជាតិការគោរពសិទ្ធិមនុស្សប្រជាធិបតេយ្យសេរីពហុបក្ស.. .៕
ចែករំលែកព័តមាននេះ