ទីក្រុងគូឡាឡាំពួ ៖ ក្រសួងកសិកម្ម និងកសិឧហ្សាហកម្មម៉ាឡេស៊ី (MOA) បានប្រកាសពីគម្រោងផ្អាកការនាំចូលម្ទេសពីប្រទេសវៀតណាម បន្ទាប់ពីប្រទះឃើញសារធាតុគីមីដែលប្រើសម្រាប់ការពារដំណាំលើសកម្រិត ។
ទោះយ៉ាងនេះក្ដី លោក Pham Quoc Anh អគ្គកុងស៊ុលពាណិជ្ជកម្មវៀតណាមប្រចាំនៅម៉ាឡេស៊ី បានប្រាប់ដល់ភ្នាក់ងារព័ត៌មានក្នុងស្រុកថា ការផ្អាកនេះមានបញ្ហាធំៗពីរ ។
លោកថា ៖« ជាដំបូង មិនមែនគ្រប់អ្នកផលិតម្ទេសក្នុងប្រទេសវៀតណាមបានល្មើសនឹងស្តង់ដាកម្រិតធាតុគីមីរបស់ម៉ាឡេស៊ីទេ។ លើសពីនេះទៀត ការសម្រេចចិត្តក្នុងការផ្អាកនាំចូលម្ទេស អាចទាក់ទិននឹងការខិតខំប្រឹងប្រែងរបស់រដ្ឋាភិបាលម៉ាឡេស៊ី ដើម្បីគាំទ្រដល់សហគ្រិនវ័យក្មេង »។
លោក Anh បាននិយាយថា MOA បានយកចិត្តទុកដាក់យ៉ាងខ្លាំងទៅលើគ្រួសារដាំដុះម្ទេសនៅម៉ាឡេស៊ី និងបានជំរុញដល់កសិករវ័យក្មេងឲ្យចូលរូមកម្មវិធីដាំដុះនេះដែរ។ ក្រសួងនេះក៏សង្ឃឹមថាកសិកររបស់ពួកគេអាចប្រកួតប្រជែងជាមួយនឹងកសិករដាំម្ទេសនៅបរទេសទៀតផង ។
ដោយហេតុដូចនេះ MOAបានសម្រេចចិត្តបញ្ជូនក្រុមប្រតិភូទៅកាន់ប្រទេសវៀតណាម និងថៃដែលជាប្រទេសនាំចេញម្ទេសច្រើនជាងគេទៅកាន់ម៉ាឡេស៊ី ។
ពួកគេក៏បានធ្វើការស៊ើបអង្កេតទៅលើម្ទេសដែលបាននាំចូលទៅកាន់ម៉ាឡេស៊ីផងដែរហើយលទ្ធផលបានបង្ហាញថាមិនមានមូលហេតុក្នុងការចេញវិធានការឡើយ ប៉ុន្តែតម្លៃលក់ដ៏ទាបនៃម្ទេសដែលនាំចូលបានដាក់សម្ពាធដល់ផលិតផលក្នុងស្រុក ។
ឧទាហរណ៍ ម្ទេសដែលដាំនៅ Johor លក់ក្នុងតម្លៃ១,៩ដុល្លារក្នុង១គីឡូក្រាម ខណៈដែលម្ទេសដែលនាំចូលពីវៀតណាមលក់ក្នុងតម្លៃតែ០.៩ដុល្លារប៉ុណ្ណោះ ។
ការផ្អាកនេះមិនត្រឹមតែប៉ះពាល់ដល់កសិករដាំម្ទេសវៀតណាមទេ តែក៏ប៉ះពាល់ដល់អតិថិជនម៉ាឡេស៊ីដែរព្រោះប្រទេសនេះនាំចូលប្រមាណ ៨០%នៃតម្រូវការម្ទេសទាំងអស់នៅប្រទេសម៉ាឡេស៊ីទៅហើយ ៕
ចែករំលែកព័តមាននេះ