ខេត្តបាត់ដំបង៖ មន្ត្រីនគរបាលចរាចរណ៍បានឲ្យដឹងថា គ្រាន់តែក្នុងរយៈជិត១ម៉ោងគ្រោះថ្នាក់ចរាចរណ៍បានកើតឡើង២លើកផ្ទូនៗគ្នា ដែលបណ្ដាលឲ្យមនុស្សស្លាប់៣នាក់ និង២នាក់ទៀតរងរបួសធ្ងន់ ដែលកើតឡើងនៅក្នុងស្រុកមោងប្ញស្សី និងស្រុកថ្មគោល រវាងរថយន្តជាមួយអ្នកជិះម៉ូតូ ។
យោងតាមរបាយការណ៍របស់សមត្ថកិច្ចបានឲ្យដឹងថា ករណីទី១ បានកើតឡើងនៅវេលាម៉ោង៨ និង៤០នាទីយប់ថ្ងៃទី១៦ តុលា នៅលើផ្លូវជាតិលេខ៥ ត្រង់ចំណុចភូមិអូរគ្រៀត ឃុំគារ ស្រុកមោងប្ញស្សី។ ករណីនេះ កើតឡើងរវាងរថយន្តម៉ាកហាយឡិនឌ័រ ពាក់ស្លាកលេខ បាត់ដំបង 2A-1680 អ្នកបើកបរបានរត់គេចខ្លួន និងម៉ូតូម៉ាកហុងដាឌ្រីម ពាក់ស្លាកលេខ ភ្នំពេញ 1FQ-8981 ដែលជិះឌុបគ្នា២នាក់។
សមត្ថកិច្ចបាននិយាយថា រថយន្តនិងម៉ូតូបានធ្វើដំណើរស្របទិសគ្នា ពីទិសខាងកើតទៅលិច លុះមកដល់ចំណុចកើតហេតុ អ្នកជិះម៉ូតូបានបត់ឆ្វេងកាត់មុខរថយន្ត ទើបត្រូវរថយន្តបុកពីក្រោយពេញទំហឹងតែម្ដង។ សមត្ថកិច្ចបានបញ្ជាក់ថា ឧប្បតិហេតុនេះ បានធ្វើឲ្យអ្នកជិះម៉ូតូ២នាក់ស្លាប់ ដែលមានឈ្មោះឌួង សារ៉ាយ ភេទប្រុស និងឈ្មោះចិត្ត រស្មី ប្រូសអាយុ១១ឆ្នាំ ពួកគេរស់នៅភូមិ ឃុំកើតហេតុខាងលើ។
ករណីទី២ ខណៈដែលកម្លាំងជំនាញកំពុងពិនិត្យទីតាំងកើតហេតុនៅស្រុកមោងប្ញស្សី ស្រាប់តែមានសេចក្ដីរាយការណ៍ថា ករណីគ្រោះថ្នាក់ចរាចរណ៍បានកើតឡើង១លើកទៀត នៅវេលាម៉ោង៩ និង១០នាទីយប់ថ្ងៃដដែលនេះ បង្កឡើងរវាងរថយន្តជាមួយអ្នកជិះម៉ូតូដូចគ្នា នៅលើកំណាត់ផ្លូវជាតិលេខ៥ ត្រង់ចំណុចភូមិស្វាយជ្រុំ ឃុំជ្រៃ ស្រុកថ្មគោល បណ្ដាលឲ្យមនុស្សម្នាក់ស្លាប់ និង២នាក់ទៀតរងរបួសធ្ងន់។
លោកផង់ សុភាព អធិការស្រុកថ្មគោលបានឲ្យដឹងថា បើតាមការពិនិត្យជាក់ស្ដែង នៅក្នុងឧប្បតិហេតុនេះ គឺរថយន្តនិងអ្នកជិះម៉ូតូ បានធ្វើដំណើរស្របទិសគ្នាពីជើងទៅត្បូង ។ លោកអធិការបានបញ្ជាក់ថា ភាគីម៉ូតូជិះឌុបគ្នា៣នាក់ ជិះក្នុងល្បឿនលឿន លុះដល់ចំណុចខាងលើក៏បុកគូថរថយន្តនីស្សាន់ដឹកទំនិញ ដែលកំពុងឈប់ប្ដូរកង់នៅលើចិញ្ចើមថ្នល់។
លោកថា ករណីនេះបានធ្វើឲ្យអ្នកជិះម៉ូតូម្នាក់ស្លាប់និង២នាក់របួសធ្ងន់។ អ្នកជិះម៉ូតូទាំង៣នាក់មាន ១ឈ្មោះសារិន ទិនឡោះ អាយុ២២ឆ្នាំស្លាប់ ២ឈ្មោះយឿន ម៉ុនថៃ អាយុ២០ឆ្នាំរបួសធ្ងន់ និង៣ឈ្មោះតែម តា អាយុ២២ឆ្នាំរបួសធ្ងន់ ហើយពួកគេរស់នៅក្នុងភូមិអូរតាគី ឃុំអូរតាគី ស្រុកថ្មគោល តែអ្នកបើកបររថយន្តបានដាក់មេប្រូចក្រោយជួបគ្រោះថ្នាក់។
ជុំវិញករណីគ្រោះថ្នាក់ចរាចរណ៏ទាំង២លើកខាងលើនេះ មន្ត្រីជំនាញទាំង២ស្រុកបានឲ្យដឹងប្រហាក់ប្រហែលគ្នាថា គឺកើតឡើងដោយសារអ្នកបើកបរខ្វះការប្រុងប្រយ័ត្ន ទើបបង្កឲ្យមានគ្រោះថ្នាក់ដល់
ជីវិតធ្ងន់ធ្ងរបែបនេះ។ ទោះយ៉ាងណាក្រោយពីធ្វើការវាស់វែង មន្ត្រីការិយាល័យចរាចរណ៏ខេត្ត បាននាំយកមធ្យោបាយបង្កគ្រោះថ្នាក់ទាំង២ករណីនេះ ទៅរក្សាទុកនៅការិយាល័យជំនាញ ដើម្បីដោះស្រាយតាមនីតិវិធីច្បាប់ហើយ ៕
ចែករំលែកព័តមាននេះ