ខេត្តកណ្តាល ៖ ជនសង្ស័យជាមុខសញ្ញាប្រើប្រាស់គ្រឿងញៀន និងធ្លាប់ជាប់ពន្ធនាគារម្តងរួចហើយនោះ ពេលចេញមកវិញមិនរាងចាល បែកគំនិតជួញដូរគ្រឿងញៀនម្តងទៀត ត្រូវនគរបាលស្រុកអង្គស្នួល ឃាត់ខ្លួនចាប់វាយខ្នោះ។ ហេតុការណ៍នេះបានកើតឡើងនៅថ្ងៃអង្គារ ០៧កើត ខែអស្សុជ ឆ្នាំច សំរិទ្ធិស័ក ព.ស២៥៦២ ត្រូវនឹងថ្ងៃ១៦ តុលា ២០១៨ វេលាម៉ោង១៤ និង៤០នាទី នៅចំណុចផ្លូវលំភូមិជង្រុក ឃុំម្កាក់ស្រុក អង្គស្នួល ខេត្តកណ្តាល។
ជនសង្ស័យឈ្មោះ ធី សៀកហុង ភេទប្រុស អាយុ២០ឆ្នាំ ជនជាតិខ្មែរ មុខរបរមិនពិត សព្វថ្ងៃនៅភូមិបាត់ដឹង ឃុំក្សេមក្សាន្ត ស្រុកឧដុង្គ ខេត្តកំពង់ស្ពឺ។ វត្ថុតាងចាប់យកមានម្សៅក្រាមពណ៌សថ្លា សង្ស័យថា ជាសារធាតុញៀន(ម៉ាទឹកកក) ចំនួន០៣កញ្ចប់ធំ ជញ្ជីងថ្លឹងថ្នាំញៀនចំនួន០១ ប្រាក់ដុល្លារ១០ដុល្លារ ប្រាក់រៀល ៣០.០០០រៀល ទូរស័ព្ទដៃ០១គ្រឿង ម៉ាកណូគារ ប្រអប់ដាក់ថ្នាំញៀន និងជញ្ជីងថ្លឹងថ្នាំញៀន ម៉ូតូ០១គ្រឿង ម៉ាកហុងដា សេ១២៥ ពណ៌ខ្មៅ ស៊េរី២០១២ គ្មានស្លាកលេខ។
លោកវរសេនីយ៍ មាន សំណាង អធិការនគរបាលស្រុកអង្គស្នួល បានប្រាប់ឲ្យដឹងថា នៅថ្ងៃខែឆ្នាំ កើតហេតុខាងលើ កម្លាំងជំនាញផ្នែកប្រឆាំង បទល្មើសគ្រឿងញៀន បានទទួលព័ត៌មានពីកម្លាំងមហាជនល្អ ថាមានមុខសញ្ញាកំពុងចែកចាយថ្នាំញៀន ភ្លាមនោះកម្លាំងផ្នែកប្រឆាំងគ្រឿងញៀនស្រុកបានសហការជាមួយកម្លាំងប៉ុស្តិ៍រដ្ឋបាលម្កាក់បានចុះទៅដល់កន្លែងកើតហេតុខាងលើ បានឃើញជនសង្សយ័ឈ្មោះ ធី សៀកហុង កំពុងជិះម៉ូតូដោយមានការសង្ស័យ កម្លាំងជំនាញបាន ឃាត់ត្រួតឆែកត្រួតពិនិត្យខ្លួន ឃើញមានថ្នាំញៀនចំនួន០១ញ្ចប់ដាក់ក្នុងហោប៉ៅអាវ និង០២កញ្ចប់ទៀតដាក់ នៅក្នុងប្រអប់ជាមួយជញ្ជីងដាក់លើម៉ូតូ។
នៅចំពោះមុខសមត្ថកិច្ចនគរបាល ជនសង្ស័យបានឆ្លើយសារភាពថា ខ្លួនបានទិញថ្នាំញៀនពីមនុស្សប្រុសម្នាក់មិនស្គាល់ឈ្មោះយកមកលក់ឲ្យតាមផ្លូវជាតិលេខ៥១ នៅផ្តុំខ្លោងទ្វារវត្តសុខារ៉ាម ទិញក្នុងតម្លៃ១.៤០០.០០០រៀល (មួយលានសែសិបម៉ឺនរៀល) និងធ្លាប់ប្រើប្រាស់ថ្នាំញៀនប្រាកដមែន។ បញ្ជាក់ ជនសង្ស័យធ្លាប់ជាប់ពន្ធនាគារខេត្តកំពង់ស្ពឺ ពីបទប្រើប្រាស់នូវសារធាតុញៀន(រyយៈពេល០១ឆ្នាំ០៦ខែ)។ បច្ចុប្បន្នជនសង្ស័យ រួមជាមួយវត្ថុតាង ត្រូវបានបញ្ជូនមកកាន់អធិការដ្ឋាននគរបាលស្រុក ដើម្បីសាកសួរបន្ត និងកសាងសំណុំរឿងចាត់ការតាមនីតិវិធីច្បាប់៕
ចែករំលែកព័តមាននេះ