ខេត្តព្រៃវែង ៖ ស្ពានបេតុងមួយកន្លែងដែលមានឈ្មោះថា ស្ពានស្អាង ស្ថិតនៅក្នុងភូមិថ្មី ឃុំព្រែកអន្ទះ ស្រុកពោធិ៍រៀង ខេត្តព្រៃវែង បានស្រុតបាក់ធ្លាក់ចូលទៅក្នុងទឹក កាលពីវេលាម៉ោង៩យប់ថ្ងៃទី១៤ តុលាថ្មីៗនេះ និងបានកាត់ផ្តាច់លែងអាចធ្វើចរាចរណ៍ឆ្លងកាត់បានដូចមុនទៀតហើយ។
លោក សយ ស៊ីណាត អភិបាលស្រុកពោធិ៍រៀងបានឲ្យដឹងថា មូលហេតុដែលនាំឲ្យស្ពានស្អាងស្រុតបាក់បែបនេះ គឺបណ្ដាលមកពីទឹកហូរច្រោះផង និងមកពីគ្រឹះស្ពានមិនរឹងមាំផង ប៉ុន្តែបើសិនជាស្ពាននេះមានគ្រឹះរឹងមាំ កំលាំងទឹកហូរច្រោះប៉ុណ្ណេះ វាបាក់ដាច់តែដីទេ ចំណែកស្ពានមិនអាចបាក់ឡើយ តែនេះគឺមកពីគ្រឹះស្ពានមិនរឹងមាំដែរ។
ដោយសារស្ពានស្អាងនេះបាក់ដាច់ ធ្វើអោយប្រជាពលរដ្ឋមិនអាចធ្វើចរាចរណ៍ឆ្លងកាត់ទៅវិញទៅមកដូចមុនបានទៀតទេ ចំពោះបញ្ហានេះលោកអភិបាលស្រុកបានបញ្ជាក់ថា លោកក៏ មិនទាន់ដឹងថា តើត្រូវដោះស្រាយបែបណាដែរ ព្រោះខាងមន្ត្រីជំនាញមិនទាន់បានចុះទៅសិក្សា ប៉ុន្តែអាចនិងត្រូវប្រើវិធីសាស្ត្រឆ្លងទូកដរ ឬក៏ចាក់ដីលុបបណ្តោះអាសន្ន ដើម្បីអោយអ្នកស្រុកអាចធ្វើចរាចរណ៍ឆ្លងកាត់បានសិន។
គួរបញ្ជាក់ផងដែរថា ស្ពានស្អាងនេះ ត្រូវបានសាងសង់ឡើងដោយ បញ្ជាការដ្ឋានវិស្វកម្មអគ្គបញ្ជាការ ដឹកនាំដោយឩត្តមសេនីយឯក ឈន សារ៉ាណេ កាលពីឆ្នាំ២០០៤ ជាគំរោងរបស់ក្រសួងអភិវឌ្ឍន៌ជនបទ និងប្រើប្រាស់ថវិការបស់រាជរដ្ឋាភិបាល។ ស្ពាននេះ មានប្រវែង៣០ម៉ែត្រ ទទឹង១០ម៉ែត្រ ស្ថិតនៅភូមិថ្មី ឃុំព្រែកអន្ទះ ស្រុកពោធិ៍រៀង ខេត្តព្រៃវែង៕
ចែករំលែកព័តមាននេះ